هه‌ژاريگ ده‌وڵه‌مه‌ن و ده‌وڵه‌مه‌نه‌يل هه‌ژار

شفق نيوز


دره‌وشان دياره‌ و له‌ڕێ خزمه‌ت وه‌ ملله‌ته‌گه‌يان ناو خوه‌يان له‌ لاپه‌ڕه‌يل مێژوو تومار كردنه‌ تا وه‌ نه‌مری بمينێده‌يان؛ كورديش ك ملله‌تيگ خاون فه‌رهه‌نگ و ئه‌ده‌بيات ره‌سه‌ن و ده‌وڵه‌مه‌نيگه له‌ناو ملله‌ته‌يل ناوچه‌گه‌‌، كه‌سايه‌تييه‌يل گه‌ورا و نه‌مر فره‌يگ داشتگه‌ و ديرێ ك له‌وه‌ختيگ داگيركه‌ره‌يل كوردستان هه‌ميشه‌ و وه‌رده‌وام ته‌قلا ئه‌را له‌ناوبردن ئه‌ده‌ب و فه‌رهه‌نگ و كلتوور و كه‌له‌پوور و...هتد ملله‌ته‌گه‌مان دانه‌، ئه‌وان وه‌خوين دڵ و وه‌ هوير و قه‌ڵه‌م خوه‌يان له‌وه‌رانوه‌ر ئه‌و پيلانه‌يله‌ وسيانه‌ و وه‌رگری له‌ زووان و ناسنامه‌ی ئه‌ده‌بی و فه‌رهه‌نگی ملله‌ته‌گه‌يان كردنه‌، جوور شه‌ميگ له‌ تيه‌ريكی ئه‌را رووشنايی سزيانه‌؛ وه‌لی وه‌داخه‌و تويه‌نم بويشم ئيمه‌ی كورد وه‌چه‌واشه‌ی ده‌وڵه‌مه‌نيمان له‌ بواره‌يل جياجيا، له‌ بوار قه‌درناين له‌ گه‌ورايه‌يلمان ملله‌تيگ‌ ‌ژاريمن، فره‌ جار باس له‌وه‌ كه‌يمن ك وڵاته‌يل و ملله‌ته‌يل هاوسا ناسنامه‌ی كه‌سايه‌تييه‌يلمان ئاڵشته‌و كردنه‌ و زانا و شاعر و نويسه‌ر و رووشنهويره‌يل ئيمه‌ وه‌ فارس و تورك و عه‌ره‌ب ناويان به‌ن، وه‌لی ئی گله‌ييه‌ له‌خوه‌مان نيه‌كه‌يمن ك ئايا خود خوه‌مان تا چه‌نيگ ناو ئه‌و ناوداره‌يله‌ به‌يمن و باسيان كه‌يمن و قه‌در خوه‌يان و شاكاره‌يل كه‌موينه‌يان زانيم؟! راسه‌ كومه‌ڵگايه‌يل رووژهه‌ڵاتی كومه‌ڵگايه‌يليگ مردگ په‌ره‌سن، وه‌لی كورد له‌وه‌رانوه‌ر ناوداره‌يلی نه‌ مردگ په‌ره‌سه‌ و نه‌ زينگ په‌ره‌س.

 

21 مانگ شوبات ساڵڕووژ كووچ دويايی هه‌ژاريگه‌ ك وه‌ دريژايی هه‌فتا ساڵ ته‌مه‌نی خه‌م ملله‌تيگ له‌دڵی په‌روه‌رده‌ كردويد ك وه‌رده‌وام هه‌ڕه‌شه‌ له‌ زووان و ناسنامه‌ و فه‌رهه‌نگ و دارونه‌داری كريه‌ێد و ئه‌و يه‌كيگ له‌و عاشقه‌يله‌ بوی ك ساڵه‌يل سه‌خت ژيانی ئه‌را ملله‌ت و نيشتمانه‌گه‌ی ته‌رخان كرد ك (بۆ كوردستان) شايه‌تيده‌ر ئه‌و ڕاسيه‌سه‌:

 

به‌خته‌وه‌رم هه‌ڵكه‌وت هه‌ل      خۆم ده‌كه‌م به‌ قوربانی گه‌ل

ده‌ڕۆم به‌ره‌و ژينی  نه‌مر       له‌   ژينتان  ده‌بم   به‌   ئاگر

 

 

(هه‌ژار موكریانی) ده‌وڵه‌مه‌ن له‌ روی هویر ‌و نويسانن یه‌كيگه‌ له‌ ناوه‌يل‌ دیار فه‌رهه‌نگ‌ و زووان و ئه‌ده‌بیات كوردی ك وه‌داخه‌و له‌ ساڵڕووژ كووچ دويايی، رووشنهويره‌يل و رووژنامه‌نويسه‌يل ملله‌ته‌گه‌ی ك وه‌رده‌وام له‌ هه‌نبانه‌ بوورينه‌‌ ئه‌را كاره‌يليان نه‌ف وه‌رگرن له‌هويريه‌وبردنه‌، گله‌يی له‌ ره‌سانن كوردی نيه‌كه‌يمن ك ئه‌را چه‌ هه‌ژار له‌ هويره‌وبردنه‌ و ناوی نيه‌وه‌ن چوينكه‌ ته‌نيا هه‌ژاره‌يل نين ك له‌ ره‌سانن كوردی ئمڕوومان له‌ هويره‌و بريانه‌ به‌ڵكم فره‌ كه‌س و فره‌ چشته‌يل له‌و كه‌ناڵ و گوڤار و سايت و رووژنامه‌يله‌ له‌ هويره‌و چوينه‌ ك دروشميان (كوردايه‌تی)يه‌، وه‌لی پرسيار يه‌سه‌ ك ئايا ئه‌و نويسه‌ر و رووشنهويره‌يله‌ ك ئی رووژه‌يله‌ قه‌ڵه‌ميان ته‌نيا ئه‌را باسكردن خۆپيشاندانه‌يل مسر و تونس و يه‌مه‌ن و به‌حره‌ين و ئاژاوه‌ناين له‌ كوردستان تيه‌رنه‌بان قاقه‌ز، ئه‌را چه‌ بوونه‌يل گرنگ نه‌ته‌وه‌يی(جوور: ساڵڕووژ كووچ دويايی شاعر مللی كورد ھەژار موکریانی) له‌ هويريانه‌و چويه‌...؟ يه‌ پرسياريگه‌ و چه‌وه‌ڕی جوواو كه‌ێد!

هزاران ره‌حمه‌ت ل رووح هه‌ژار مه‌كريانی ك وه‌ فكر و خزمه‌ت و خه‌بات فره‌ ده‌وڵه‌مه‌نه‌ و تا كورد هه‌سه‌ێ ناوی هه‌ر مينێ.

 

ن: ئاراس جه‌واد