دويه‌ت وه‌ بتڵه‌ غاز؟!

شفق نيوز

له‌ هه‌مان وه‌خت قه‌يرانيگ تر ك له‌و شاره‌ دروس بوی پيكهات له‌ به‌رزه‌وبوين نرخ كه‌ره‌سه‌و هه‌وه‌جه‌يل رووژانه‌، ك تاڕاده‌يگ بڕيگ خيزان توانای ئه‌و چشته‌يله‌ نه‌يرن، ئه‌را نموونه‌: له‌ ماوه‌ی گوزه‌يشت نرخ يه‌ك بتڵه‌ غاز له‌ شار موسڵ ره‌سيه‌ ١٠٠ دۆلار و نه‌فتيش وه‌ده‌س نه‌كه‌فت، ك ئه‌تويه‌نيم بويشيم گرانی غاز له‌يوا كرد هاووڵاتيه‌يل وه‌ناچاری ئه‌را دروسكردن خواردن نه‌ف له‌ دار و په‌ره‌ميز وه‌ربگرن.‌

بريگ له‌ خزانه‌يل شار موسڵ له‌وه‌ر خراوی بار ژيان و كه‌مدرامه‌تيان و له‌وه‌ر نه‌وه‌ك دويه‌ته‌يليان له‌لايه‌ن گرووپه‌يل چه‌كدار داعشه‌و ده‌س وه‌سه‌ر بكريه‌ن و ده‌سدريژی بكه‌نه‌ بانيان له‌يوا وه‌پيان خاستر بوی ك دويه‌ته‌يليان بيه‌نه‌ شوی، وه‌لی بزانن چ وه‌شويداينيگ؟!

ئه‌وه‌سه‌ سه‌رچه‌وه‌يل هه‌واڵ ئاماژه‌ وه‌ ئه‌وه‌ ئه‌كه‌ن ك له‌چه‌ن رووژ گوزه‌يشت چه‌ن خيزانيگ دويه‌تيليان دانه‌سه‌ شوی له‌وه‌رانوه‌ر وه‌رگرتن و ده‌سكه‌فتن سوزه‌مه‌نی وه‌تايبه‌ت بتڵه‌ غاز، ك باوگيگ دويه‌ته‌گه‌ی خوه‌ی داسه‌ شوی له‌ وه‌رانوه‌ر داواكردن ١٥ بتڵه‌ غاز له‌ زاوا، وه‌و مانا ئه‌گه‌ر هه‌ر بتڵه‌ غازيگ ١٠٠ دۆلار بدێ، ئه‌وه‌ دويه‌ته‌گه‌ بدريه‌يده‌ زاوا وه‌ ١٥ بتڵه‌ غاز و ئه‌وه‌ ده‌ركه‌فيد ك ك دويه‌تيگ وه‌ ١٥٠٠ دۆلار فرووشياگه‌، ئمجا هه‌نای ك پرسياريش له‌ باوگی كرياگه‌ ك ئه‌راچه‌ دويه‌ته‌گه‌ی وه‌ بتڵه‌ غاز فرووشتگه‌، وتگه‌: خاستر ئه‌وه‌سه‌ دويه‌ته‌گه‌م شوی بكا نه‌ك چه‌كداره‌يل داعش وه‌ وه‌رچه‌و خوه‌مه‌و بووه‌نه‌ی و ده‌سدريژی بكه‌نه‌ بانی، چوينكه‌ ئه‌و خيزانه‌يله‌ هه‌ميشه‌ له‌ چه‌وه‌ڕی هه‌ڕه‌شه‌و ده‌سدريژی ئه‌و گرووپه‌يله‌ ژيانه‌ ئه‌وه‌نه‌ سه‌ر.

دوياخريش ئه‌خوازم بويشم ك گشت وه‌خت و سات و سه‌رده‌ميگ فرووشتن دويه‌ته‌يل و مامڵه‌كردن وه‌پيانه‌و چشتيگ نه‌خوازرياگ و ناپوخت بويه‌و له‌لايه‌ن ماف ئاده‌ميزاده‌و قه‌يه‌غه‌ كرياگه‌و سزای ياسايی ئه‌رای دانرياگه‌، وه‌لی ئه‌وه‌سه‌ دوينيم له‌و ناوچه‌يله‌ ك كه‌فتنه‌سه‌ ژير ده‌سڵات داعش دويه‌ته‌يل وه‌بی خواست خوه‌يان وه‌ناچاری له‌لايه‌ن خيزان و كه‌س وكاريانه‌و له‌وه‌ر ده‌سكه‌فتن چه‌ن به‌رميليگ نه‌فت و چه‌ن بتڵه‌ غازيگ فرووشيه‌ن و مامڵه‌ وه‌پيانه‌و ئه‌كريه‌يد، ك له‌ی حاڵه‌تيشه‌ نه‌ هويچ كه‌سيگ په‌يجووری له‌ی مه‌سه‌له‌ ئه‌كاو نه‌ ياسايگيش هه‌س ريگری له‌لی بكا، ك ئه‌گه‌ر مه‌سه‌له‌گه‌ وه‌ی شيوه‌ وه‌رده‌وام بدێ، ئه‌وه‌ ئاينده‌يگ مه‌ترسيدار چه‌وه‌ڕی دويه‌ته‌يل و ئه‌و ناوچه‌يليشه‌ ئه‌كا.

مونيره‌ مه‌خمووری

ج . أ