مقه‌يه‌تيكردن له‌ ئه‌زموون ديموكراسی كوردستان ئه‌ركيگ نه‌ته‌وه‌يی و نيشتمانيه‌

شفق نيوز

زامن كرياس و ده‌سكه‌فته‌يل تر ستايش كه‌ن، وه‌جووريگ هه‌رێم كوردستان سيستم ديموكراسی فيدراڵی ديريگ. ئه‌ی ده‌سكه‌فته‌يله‌ وه‌ئاسانی وه‌ده‌س نه‌هاتنه‌ به‌ڵكم نه‌تيجه‌ی خه‌بات دريژماوه‌و قوربانیداينه‌يل ملله‌ت كورده‌ له‌ دريژه‌ی ده‌يان ساڵ ‌سه‌ده‌ی وه‌رين. له‌ی وه‌خته‌ جمشت ئاوادانی و دامه‌زرانن چالاكيگ له‌ هه‌رێم كوردستان وجوود ديريگ و وڵاته‌يل هاوسا و دووس له‌ پرۆژه‌يل هه‌رێم سه‌رمايه‌گوزاری كه‌ن. هه‌ركه‌سيگ سه‌ردان هه‌رێم كوردستان ئه‌كا له‌و پێشكه‌فتن و پرۆژه‌يل ئاوادانی گه‌ورا ك جيوه‌جی كريانه‌ و پێشكه‌ش كردن گشت هه‌وه‌جه‌يل ژيان وه‌ هاووڵاتيه‌يل و له‌و ئاڵشتكاريه‌ ك له‌ وه‌زع هه‌رێم كوردستان ئه‌نجام گرتگه‌ و جياوازييگ له‌ناونی وه‌زع هه‌رێم له‌وه‌خت ده‌سه‌ڵات ديكتاتۆری به‌عس و وه‌زع ئيسه‌ی سه‌ری سڕ مينێ.

وه‌يخاتره‌ ئه‌رك نه‌ته‌وه‌يی و نيشتمانيه‌ ك ته‌قالا بكريه‌ێد ئه‌را مقه‌يه‌تیكردن له‌ ئه‌زموون ديموكراسی كوردستان ك نيشانه‌ی ده‌سه‌ڵاتداری تايبه‌ت سه‌رۆك هه‌رێم و سه‌رۆك حكوومه‌ت هه‌رێم كوردستانه‌ ك له‌ڕيگه‌ی دياری كردن پلانيگ ته‌قالا كه‌ن ئه‌را جيوه‌جیكردن داواكاری هاووڵاتيه‌يل و چه‌وديری كردن له‌ هه‌قه‌يليان و زامنكردن ده‌سكه‌فته‌يل زياتريگ ئه‌رايان و چه‌سپانن دادوه‌ری و يه‌كسانی له‌ناونی هاووڵاتيه‌يل. حكوومه‌ت بايه‌د له‌ گيان و ماڵ هاووڵاتيه‌يل و رووژنامه‌نويسه‌يل مقه‌يه‌تی بكا و روح هاوكاری له‌ناونی هاووڵاتيه‌يل به‌رزه‌و بكا تا بتويه‌نن له‌ ئه‌من و سه‌قامگيری هه‌رێم چه‌وديری بكه‌ن و بايه‌د گشت جاریگ ته‌قالا بكا ئه‌را ئارامه‌وكردن وه‌زع و په‌خشه‌وكردن دووسی و ئاشتی له‌ هه‌رێم و گرنگیداين وه‌ به‌رژه‌وه‌نديه‌يل گشتی هه‌رێم و ملله‌ت كوردستان. حكوومه‌ت ئيمان وه‌ ئه‌وه‌ ديريگ ك خوه‌ی نيشانداين هه‌ق سرووشتی هاووڵاتييه‌ و تويه‌نن له‌ڕيگه‌ی گفتوگوو و ئاشتيانه‌ كيشه‌ و ناكووكييه‌يل چاره‌سه‌ر بكه‌ن و هه‌ميش پارت ديموكرات كوردستان نامه‌يگ ئه‌را خاسسازی ديريگ و سه‌رۆكايه‌تی هه‌رێميش ئاماده‌س چاكسازييه‌يليگ بكا ئه‌را چاره‌سه‌ركردن كيشه‌يل هه‌رێم وه‌گوره‌ی ياسا و له‌ هه‌ر جوور توندوتيژی و بشيوييگ دويری بگرێ و گامه‌يل گه‌ورايگ وه‌ره‌و گه‌شه‌په‌ياكردن و پێشكه‌فتن هه‌ڵگرێ تا بتويه‌نن له‌ فيدراڵيه‌ت هه‌رێم كوردستان و ئه‌زموون ديموكراسی و گشت ده‌سكه‌فته‌يل هه‌رێم چه‌وديری بكه‌ن و له‌هه‌مان وه‌ختيش پرۆسه‌ی خاسسازی چالاكه‌و بكه‌ن و ئامانج و داواكاری ياسايی و پاوه‌جی ملله‌ت كوردستان پيشكه‌ش بكريه‌ێد و دادوه‌ری كومه‌ڵايه‌تی و ئاوادانی و سه‌روه‌ری ياسايی زامن بوود. وه‌يخاتره‌ ئه‌رك نيشتمانی و نه‌ته‌وه‌ييگه‌ ك له‌ ئه‌زموون كوردستان و ئازادی هاووڵاتيه‌يل چه‌ودێری بكريه‌ێد.

محه‌مه‌د عه‌لی سه‌ماوی