سیناریۆ

شفق نيوز

  به‌زم فریه‌یگ له‌لى دریه‌ید ئه‌را پیكهاوردن كابینه‌ى هه‌یشته‌م حكوومه‌ت هه‌رێم كوردستان، ك بڕیگیان ته‌نیا ئه‌زره‌تن و ناگونجیه‌ن وه‌ل واقع و بڕیگیش له‌لیان ته‌نیا ئاره‌زووه‌.

ئیسه‌ وه‌ بوونه‌ى ئى هه‌لچوژاردنه‌یل دویاخره‌، ته‌رازوى هیز له‌ كوردستان ئاڵشت بویه‌و هیزه‌یل بان مه‌یدان سیاسى كوردستان ئاڵشتكارى ئه‌نجام دانه‌. ئنجا كابینه‌یل زویتر له‌ناونى پارتى و یه‌كێتى و جارجاریگیش حزبیگ ئسلامى دامه‌زریاو ئه‌و باقى حزبه‌یل تر له‌ په‌رله‌مان جوور ئۆپۆزسیۆن مه‌ندیان.

ئه‌و حزبه‌یله‌ ك جوور ئۆپۆزسیۆن بوین له‌ په‌رله‌مان چالاكى داشتیان و جارجاریگیش كار ره‌سیاده‌ تون و تیژییش له‌لایه‌ن ئه‌ندامه‌یل فراكسیۆنه‌یلیان، وه‌لى له‌وه‌خت هه‌ڵوژاردن به‌ڵنس نه‌عره‌ته‌ى هه‌ڵوژاردن گۆران ئاڵشت بوى و داواى جڵه‌و ده‌سڵات كردیان ك هه‌رچه‌نى نه‌تویه‌نن ئه‌و كاریشه‌ بارنه‌ دى ك ئه‌ڕایان ده‌س نه‌كه‌فت، وه‌لى هه‌ر جوور بانگه‌وازیگ وتیان خوازیار به‌شداریكردن ده‌سڵاتیم و دى نوڕید وه‌قسه‌ى خوه‌یان به‌شدارى له‌ ده‌سڵات كه‌ن.

ئیسه‌یش پارتى یه‌كه‌م ده‌نگ و گۆڕان دویه‌مه‌ له‌بان ئاست هه‌رێم كوردستان، ئنجا پرسیاره‌گه‌ ئه‌وه‌سه‌ ك ئایا ئى هه‌ردوگ لایه‌نه‌ وه‌ یه‌كه‌و ك زوورمینه‌ پیك ئه‌یه‌رن، تویه‌نن وه‌بى به‌شدارى یه‌كێتى كابینه‌ى هه‌یشته‌م دامه‌زرنن؟ من باوه‌ڕم ئه‌وه‌سه‌ ناتویه‌نن هه‌ردوگیان وه‌ته‌نیا ئه‌و كاره‌ بكه‌ن، چوینكه‌ له‌وه‌خت هه‌ڵمه‌ت هه‌ڵوژاردن گۆڕان وه‌ جووریگ ناو پارتى بردیاد ك شایه‌ت ئیسه‌ وه‌ زه‌حمه‌ت بتویه‌نن قه‌ناعه‌ت وه‌ لایه‌نگره‌یلیان بكه‌ن ك تویه‌نن وه‌ یه‌كه‌و وه‌ل پارتى حكوومه‌ت دامه‌زرنن و وڵات وه‌ڕیه‌و بووه‌ن. ئه‌ى ئه‌و سیاناریۆگه‌ى تر؟ ئه‌گه‌ریش وه‌ دقه‌ته‌و ته‌ماشاى كیشمه‌كیش وه‌خت هه‌ڵوژاردن بكه‌یم وه‌ ئاشكرا دو ئاراسته‌ له‌تى دیار بوى، یه‌كیگیان ئسلامى و ئه‌واكه‌ى تر علمانى، ك هه‌رچه‌نى بڕیگ له‌ كاندیده‌یل گۆڕان پابه‌ندبوین خوه‌یان وه‌ شه‌ریعه‌ت ئسلامیه‌و نه‌شاردیانه‌وه‌و هه‌ر وه‌ئاشكرا ریڕه‌و داشتن، وه‌لى وه‌ل ئه‌وه‌یشا زوورمینه‌ى گۆڕانیش رویه‌ علمانیه‌گه‌ى خوه‌یان ئه‌ڕایان نه‌شاریاوه‌.

هه‌ر له‌وه‌ر ئه‌وه‌یش خاسترین چاره‌سه‌ر ئه‌را بار ئیسه‌ ئه‌وه‌سه‌ ك پارتى و گۆڕان و یه‌كێتى و حزبه‌یل بویچگ وه‌یه‌كه‌و حكوومه‌ت دامه‌زرنن و حزبه‌یل ئسلامییش وه‌یه‌كه‌و بوونه‌ ئۆپۆزسیۆن، دى ئه‌و وه‌خته‌ نه‌ گۆڕان ناڕه‌حه‌ت بوود و نه‌یش یه‌كێتى مه‌غدوور ئه‌كریه‌ید و نه‌یش پارتى حكوومه‌تیگ بنگه‌ فراوان له‌ده‌س ئه‌یادو ئسلامیه‌یلیش وه‌ ئسراحه‌ت ئه‌تویه‌نن نه‌خش ئسلامگه‌رى خوه‌یان بوینن له‌ په‌رله‌مان.

سه‌لام عه‌بدوڵڵا

ج . أ