ئه‌نجوومه‌ن نوێنه‌ره‌یل قانوونه‌یل فره‌یگ هاوه‌رده‌مى ئه‌را نویسانن

شفق نيوز

ئه‌راى مه‌نیه‌سه‌وه‌ ك بایه‌ته‌ بنویسنیده‌یان و بخه‌یده‌یانه‌ ده‌نگداین ك زوورمیان قانوونه‌یل گرنگیگن و بوینه‌سه‌ هووكار سه‌ره‌كى ناكوونى ناونى فراكسیۆنه‌یل سیاسى جیاجا و هه‌وه‌جه‌یان ها وه‌ ته‌وافق سیاسى له‌ناونیان.

ئه‌ندامیگ لوجنه‌ى قانوونى ئه‌نجوومه‌ن نوێنه‌ره‌یل ئه‌وه‌ ئاشكراكرد ك ئه‌نجوومه‌نه‌گه‌ له‌ى وه‌خته‌ كووشش و هه‌وڵ و ته‌قه‌لاى فره‌یگ ده‌ید ئه‌را ته‌شریعكردن ئه‌و قانوونه‌یله‌ ك په‌یوه‌ندى ڕاسه‌وخۆیگ وه‌ داواكاریه‌یل مه‌ردمه‌و دیرن.

موحسن سه‌عدون له‌ په‌یوه‌ندییگى وه‌ل شه‌فه‌ق له‌ى باوه‌ته‌ زیاتریش وت:"ئى ئه‌نجوومه‌نه‌ پرۆژه‌ قانوونه‌یل فره‌یگ له‌ ئه‌نجوومه‌ن وه‌رین جوور میراتى ئه‌راى مه‌نیه‌سه‌وه‌، ئه‌وه‌ بیجگه‌ ئه‌و قانوونه‌یله‌ ك له‌ ده‌ستوور ئاماژه‌ وه‌ دارشتنیان دریاس".

ئه‌وه‌یشه‌ وت ك :"ئه‌نجوومه‌ن نیه‌تویه‌نى وه‌ نیشتنه‌یل خێرایگ هه‌ى هه‌لا بكه‌ید له‌ ده‌نگداین له‌بان قانوونه‌یل، به‌ڵكوو بایه‌ته‌ ئى پرۆژه‌ قانوونه‌یله‌ وه‌ چه‌ن قوناغیگه‌و ڕه‌د بوون تا ڕه‌سنه‌ قوناغ ده‌نگداین".

سه‌عدون گوزارش له‌ ڕاى خوه‌ى كرد ك ئه‌نجوومه‌ن نوێنه‌ره‌یل له‌ى خول حازریه‌ جددیه‌ له‌ جیوه‌جیكردن قانوونه‌یل گرنگ فره‌یگ  ك كوومه‌ك كه‌ن له‌ چاره‌سه‌ركردن فره‌ له‌و كێشه‌یل ڕووژانه‌ ك تویش هاوڵاتیه‌یل عیراقى هاتیه‌.

پسپۆره‌یل بوار قانوون ئه‌وه‌ دوینن ك :" په‌رله‌مان وه‌رین نه‌تویه‌نست نه‌خش و ده‌ور ته‌شریعى خوه‌ى وه‌شیوه‌یگ دروس كاراوه‌ بكه‌ید". و له‌بان ئه‌وه‌یشه‌ جه‌ختكردن ك :"مه‌نین بڕ فره‌یگ قانوون وه‌بى ئه‌وه‌گ ئقرار بكریه‌ن، حاڵه‌تیگ له‌ ناكووكى په‌یاكرد و باڵ كیشا بان ڕه‌وت ئۆپه‌راسیۆن ته‌شریعى و ئۆپه‌راسیۆن سیاسى وه‌گشتى". و :"ره‌د نه‌كردن ئه‌و قانوونه‌یله‌ ك له‌ ده‌ستوور هاتنه‌ هیشت ده‌وڵه‌ت وه‌رده‌وامى بیه‌یده‌ كاركردن وه‌و قانوونه‌یله‌ ك ((ئه‌نجوومه‌ن سه‌ركردایه‌تى شووڕش)) هه‌ڵوه‌شیاى به‌عس نویسانیه‌سه‌یان و یه‌یشه‌ خوه‌ى له‌ خوه‌یه‌ چه‌واشه‌كارى ده‌ستووره‌، چوینكه‌ ده‌ستوور وه‌ ڕاسپاكى داواكرد ك وه‌هویچ قانوونیگ كار نه‌كریه‌ید دژ وه‌ بڕگه‌یلى بوون یا دژ وه‌ سسته‌م نوو وڵات بوون".

له‌لاى خوه‌یه‌و شیه‌وكه‌ر سیاسى واسق هاشمى له‌ په‌یوه‌ندییگى وه‌ل شه‌فه‌ق له‌ى باوه‌ته‌ وت:"كێشه‌ و ناكووكى فره‌ى ناوبه‌ین فراكسیۆنه‌یل سیاسى  زاڵه‌و بویه‌سه‌ بان كار ئه‌نجوومه‌ن نوێنه‌ره‌یل و په‌كى خستیه‌ له‌ نویسانن قانوون گرنگیگ جوور قانوون نه‌فت و غاز و قانوون پارته‌یل".

له‌ دریژه‌ى قسه‌یلیشى وت:"ئه‌وه‌ ئى ئه‌نجوومه‌ن حازریه‌ ئه‌نجامى دا له‌ نویسانن قانوون خوڵ وه‌چه‌و كردن مه‌ردمه‌، و زوورمیانیش كه‌ڵك نه‌یرى حاڵ و گوزران له‌ عیراق، و بایه‌ته‌ ئه‌نجوومه‌ن نوێنه‌ره‌یل ئه‌و قانوونه‌یل گرنگه‌ به‌رقه‌رار بكه‌ید ك ده‌سمیه‌ت ده‌ن ئه‌را لاداین له‌ غه‌ڵه‌ته‌یل گوزه‌یشت".

هاشمى ئومیدوار ئه‌وه‌یشه‌ بوى ك ئه‌و فشاره‌یله‌ ك په‌رله‌مان تویشى تیه‌ید پاڵنه‌ریگ بوون ئه‌را ئه‌وه‌گ كار بكه‌ید له‌ نویسانن قانوونه‌یلیگ په‌یوه‌ندى وه‌ ژیان هاوڵاتیه‌یله‌و دیرن و وت:"ئه‌و فشاره‌یله‌ ك ئمڕوو جاده‌ى عیراقى خستیه‌سه‌یانه‌ بان ئه‌نجوومه‌ن نوێنه‌ره‌یل هیلیده‌ى بچوود وه‌ره‌و ته‌واوكردن زوورمى ئه‌و قانوونه‌یله‌ ك په‌یوه‌ندى وه‌ ژیان هاوڵاتیه‌یله‌و دیرن".

 

كفاح هادى