ئه‌یه‌ واقع ژیانه‌..!

شفق نيوز

گشت ئامانج و ئاره‌زووه‌یلى و دى كووتایى تیه‌ێده‌ ئه‌ركه‌یلى و ئه‌را یه‌كجارى وچان ئه‌یاد و هویچ هه‌وه‌جه‌یگى نامینێد تا خه‌م ئه‌ڕاێ بخوه‌ێدو له‌وه‌ر خاترى خوه‌ى شه‌كه‌ت بكا!

بیگومان ئى ئه‌ڕاى چوینه‌ چه‌واشه‌ى راسیه‌و دویره‌ له‌ واقع، چوینكه‌ هه‌وه‌جه‌یل ژیان فره‌ن و ئومید و ئاره‌زووه‌یل ئاده‌میزاد ته‌واو نادۆن، هه‌ر له‌وه‌ر ئه‌وه‌یش دوینید هه‌ر وه‌ختێگ ئه‌ركیگ وه‌جى ئه‌یه‌رید و هه‌وه‌جه‌یگ  دسه‌وه‌ر ئه‌كه‌ید ئه‌وه‌ راسه‌وخۆ له‌شوون ئه‌وه‌ رویوه‌ڕوى كاره‌یلیگ تر ئه‌دۆید و چه‌وه‌ڕێ ئه‌كه‌ید تا خوه‌د ئه‌ڕاى ته‌رخان بكه‌ید، ك وه‌ى جووریشه‌ كووتایى وه‌ لیست كاره‌یلید نیاێ.

له‌یره‌ خوازیم ئه‌وه‌یش بویشیم ك له‌ ڕاسى سروشت ئاده‌میزاد سه‌ركه‌فتگ ئیچنه‌سه‌ ك هه‌میشه‌ خه‌بات بكاو به‌رهه‌م ره‌نج و شه‌كه‌تى خوه‌ى بوینێد، دى مه‌گه‌ر ئه‌وسا هس وه‌ خوه‌شى و ئاسووده‌یى بكا، وه‌لى حه‌زكردن وه‌ به‌تاڵى و خوه‌شى و سه‌فاى بى راده‌، ئه‌وه‌ ته‌نیا ئاره‌زوو ته‌مه‌ڵ و ناتوانه‌یله‌.

له‌وه‌ر ئه‌وه‌ بایه‌د گشتمان ئه‌و راسیه‌ بزانیم ك ئه‌ركه‌یلیمان وه‌رده‌وامه‌و ته‌واو نادۆن، وه‌لى بایه‌د هووكاره‌ى ئه‌وه‌ بویمن ك چوین وه‌ یه‌واش و ئارامیه‌و هه‌ڵسووكه‌فت وه‌ل فشاره‌یل ژیانا بكه‌یم و زوور له‌ خوه‌مان نه‌كه‌یم ئه‌را كووتاییهاوردن وه‌ گشت ئه‌ركه‌یل ئه‌را ئه‌وه‌ك ده‌روینمان ئازار نه‌یه‌یم و ساته‌یل خوه‌شى و شادیمان له‌ ده‌س نه‌یه‌یم و بتویه‌نیم وه‌ ئاسووده‌یى بژیه‌یم.

بێگومان هه‌ر یه‌ك له‌ ئیمه‌ چه‌نه‌ها ئه‌رك دیرێد و بایه‌د بتویه‌نێد جیوه‌جى ئه‌و ئه‌ركه‌یله‌ بكاو نادێ پشتگووشیان بخاد یا واز له‌لیان بیه‌رێ، وه‌لى وه‌ل ئه‌وه‌یشا بایه‌ وه‌ گووره‌ى به‌رنامه‌یگ بتویه‌نیم كاره‌یلمان قوناغ وه‌ قوناغ ئه‌نجام بیه‌یم ئه‌را ئه‌وه‌ك هه‌قه‌یل خوه‌مان و خێزان و مناڵه‌یلمانیش فه‌رامووش نه‌كه‌یم.

خوداى گه‌ورایش وه‌ گووره‌ى تواناى كه‌سه‌یل ئه‌رك ئه‌خاده‌ ملیان، ماناى ئه‌وه‌سه‌ ئه‌ڕاچه‌ بایه‌د ئیمه‌ له‌ تواناى خوه‌مان زیاتر كار بكه‌یم و خوه‌مان و كه‌س وكارمان له‌ خوه‌شى و ئاسووده‌یى بیبه‌ش بكه‌یم!؟

دویاخریش ئویشیم جوور ئه‌و كه‌سه‌ مه‌و ك نیمه‌ى یه‌كه‌م ژیانى برده‌ سه‌ر وه‌ ئومید تاموه‌رگرتن له‌ژیان له‌ نیمه‌ى دویه‌م عومرى، ئمجا نیمه‌ى دویه‌م ژیانیشى ته‌واو كرد وه‌ داخ و په‌شیمانبوینه‌وه‌ له‌ نیمه‌ى یه‌كه‌مى!

هیوا بڵباس
ج. ا