وزاره‌ت یا شێخایه‌تى؟

شفق نيوز

و پیشه‌سازى و كشتوكاڵى و سه‌ربازى و تاڕاده‌یگیش كوومه‌ڵایه‌تى، وه‌لى فره‌یگ له‌ ده‌وڵه‌ته‌یل و كوومه‌ڵگایه‌یل هیمان ته‌كانیگ وه‌خوه‌یان نه‌یانه‌و هه‌ر له‌بان ره‌فتار و نه‌ریت كویه‌ن چنه‌ ڕییه‌و، وه‌تایبه‌ت سیستم شێخایه‌تى له‌ناو هووز و میرنشینیه‌یل ك په‌یوه‌س بویه‌سه‌ ره‌فتار مه‌ردم و ریكخریاگه‌یل فریه‌یگ و ته‌نانه‌ت دامه‌زریاگه‌یل ده‌وڵه‌تیش گرته‌سه‌و، یه‌یش بیجگه‌ سیستمه‌یل حوكم له‌زوورم ناوچه‌یل جه‌هان وه‌تایبه‌ت جه‌هان سێیم و ده‌وڵه‌ته‌یل دویاكه‌فتگ .

زوورم ئه‌و ده‌وڵه‌ته‌یله‌ سیستم و چوارچیوه‌ى هووزایه‌تى جیواز كردنه‌ ئه‌را سیستم حوكم و زوورم ده‌زگایه‌یل ده‌وڵه‌ت گرته‌وه‌ هه‌ر وزاره‌ته‌یل تا ڕه‌سیده‌ ده‌زگایه‌یل بویچگ  ك گشت ئه‌یانه‌ جوور سیستمیگ هووزایه‌تیه‌و نوڕید وه‌زیر یا وه‌ڕیه‌به‌ر گشتى شێخایه‌تى ره‌فتار كه‌ن، ك ئاده‌میزاد له‌یوا هس ئه‌كا ها له‌ناو سێرك یا فیستیڤاڵیگ هووزایه‌تى له‌ ركابه‌رى و شانازیكردن وه‌ میواندارى و شیوازه‌یل تر هووزایه‌تى، یه‌یش له‌وه‌ختیگ ك پاسه‌وانه‌یلیان له‌قه‌ومه‌یل نزیك خوه‌یانن و له‌یوا هویره‌و كه‌ن ك ئه‌وان فه‌رمانڕه‌واى راسكانى وڵاتن و هه‌ر پاسه‌وانه‌یله‌ مقه‌یه‌تى كه‌ن له‌چالاكیه‌یل شێخ وه‌رپرس چ وه‌زیر چ وه‌ڕیه‌به‌ر گشتى، یا ئه‌و جه‌نراڵه‌یله‌ ك وه‌پیان ئویشن"باڵات" یا له‌نگه‌و له‌شوون رمیان رژیم له‌وڵاته‌گه‌ ده‌ركه‌فتن و ساڵه‌یل وازهاوردنیان له‌ خزمه‌ت وه‌"ده‌ركردن یا خانه‌نشینى یا سزا" نویسیا ئه‌ڕایان له‌وه‌ر خاتر به‌رزه‌وكردن پله‌وپایه‌، ئنجا دوینید ملازمیگ یا نه‌قیبیگ  بویه‌ جه‌نراڵ و بان شانى پڕ بوى له‌ئه‌ساره‌ى ئه‌فسه‌رى و خه‌ت قزمز و نیشانه‌!

ئنجا له‌سایه‌ى ئه‌و جه‌نراڵیشه‌ مه‌ردمان فره‌یگ له‌قه‌وم و خیشه‌یلى پشتى گرتن و دامه‌زریان له‌ده‌زگاو شوونه‌یل ده‌وڵه‌تى و بویه‌ دیواخانیگ شێخایه‌تى. وه‌ل ئه‌وه‌یشا له‌ فره‌یگ له‌وزاره‌ته‌یل ناو یا شیواز ئه‌و شێخایه‌تى ئاڵشت بوى ئه‌را حزب یا فراكسیۆن، ئه‌وه‌یش له‌وه‌ر ئه‌وه‌ك مه‌ردم له‌یوا هس بكه‌ن ئه‌و شوونه‌یله‌ باره‌گاى حزب یا فراكسیۆنه‌یله‌، دى ئه‌و مه‌ردمیشه‌ له‌و وزاره‌ته‌ له‌یوا زانن ك وزاره‌ته‌گه‌ ته‌نیا موڵك خوه‌یانه‌و تاپوى ئه‌ڕا ئه‌وان كریاگه‌!

ساڵه‌یل دكتاتۆریه‌ت وڵات برده‌ دویاوه‌ ئه‌را سه‌ره‌تاى په‌یوه‌ندیه‌یل كوومه‌ڵایه‌تى و سیستم ده‌ره‌به‌گى وهووزایه‌تى و هه‌ر له‌وه‌ر ئه‌وه‌یش ده‌زگایه‌یل تایبه‌ت وه‌ هووزه‌یل دامه‌زریاو شێخه‌یلیش ده‌ور له‌تى نیشاندان و له‌لیانیش بوى وه‌پیان وتیان"شێخه‌یل نه‌وه‌د" ك وه‌ماناى ئه‌وانه‌ك له‌ساڵه‌یل نه‌وه‌د خوه‌یان كردیانه‌ شێخ، دى حكوومه‌ت ته‌ماشاى ئه‌و شێخه‌یله‌ له‌زاناو مامۆستاى زانكۆ و هونه‌رمه‌ند و ئه‌دیب و نویسه‌ر و رووژنامه‌نویسیش خاستر كردیاد!

ئیسه‌یش وه‌خت ئه‌وه‌ هاتگه‌ له‌ى بار و شیواز دویاكه‌فتگه‌ له‌ژیان جیواز بویمن ئه‌رت سیستمیگ تازه‌ى كوومه‌ڵایه‌تى پڕ له‌په‌روه‌رده‌و زانست و دویره‌وخستن ده‌وڵه‌ت له‌دین و سیستم هووزایه‌تى و داناین یاسایه‌یلیگ ئه‌را له‌ناوبردن مه‌سه‌له‌ى ره‌گه‌زى و دینى و مه‌زه‌وى و كه‌مه‌وكردن شێخایه‌تى له‌ده‌گایه‌یل ده‌وڵه‌ت تا هاووڵاتى له‌یوا هس بكه‌ن ك وه‌راسى سه‌ر وه‌ده‌وڵه‌تیگ خاس و نیشتمانیگ خوه‌شه‌ویسه‌.

 

كفاح مه‌حمود كه‌ریم

 

ج