كورده‌یل فه‌یلى له‌ وه‌راوه‌ر گه‌رده‌لويل و فه‌رامووشكردن

شفق نيوز

380 كه‌س له‌تى بوى و زوورمیان له‌ئیران و ئفغانستانه‌و هاتوین وه‌ره‌و ئوسترالیا ئه‌را داواكردن په‌نابه‌رى و له‌و هه‌مگه‌ كه‌سه‌ ته‌نیا 76 له‌لیان قورتار بوى له‌ناونى ئه‌و مه‌ردمه‌.

هه‌واڵ ئه‌و رویداگ ترسناكه‌ ك بویه‌ له‌ناوبردن ئى شماره‌ى فره‌ له‌مه‌ردم بیده‌نگ بوى و هووكاره‌یل ره‌سانن جویر خواستیگ هه‌ق خوه‌ى وه‌پى نه‌یان جویر مه‌سه‌له‌ى كووچكردن له‌ئاوه‌یل ئه‌فریقى ك میدیایه‌یل وه‌ شیوه‌ى وه‌رفراوانیگ باسى كردیان و هه‌میشه‌ باسه‌گه‌یش خستیانه‌ نواى گشت باسیگ ك هه‌رچه‌نى ئه‌و كووچكردنه‌یله‌ ده‌گمه‌ن بوى كه‌سیگ له‌تى بمرێد.

ئیمه‌ له‌یرا قسه‌ له‌بان ئه‌و پرووژه‌یل بازرگانیكردنه‌ ناكه‌یم ك ڕوى ده‌ێدو ئه‌و كه‌شتیه‌یله‌ ك پڕى كه‌ن له‌ مه‌ردم له‌وه‌ر ده‌سكه‌فتن پویل، به‌ڵكوو ئشاره‌ت وه‌ فه‌رامووشكردن هووكاره‌یل ره‌سانن یا ئعلام كه‌یم ئه‌را ئه‌و رویداگه‌یله‌ ك هه‌رچه‌نى وه‌گووره‌ى هه‌واڵه‌یل ئشاره‌ت وه‌ ئه‌وه‌ كریا له‌ناونى ئه‌و نه‌فه‌ره‌یله‌ شماره‌یگ له‌ عراقیه‌یل بویه‌و له‌ناونى ئه‌و قوربانیه‌یلیشه‌ 60 له‌لیان كورد فه‌یلى بویه‌.

ئى جووره‌ رویداگ گرنگیگ  بایه‌سه‌ مه‌یل راى گشتى بكیشێد له‌هه‌ر ده‌وڵه‌تیگ ك حورمه‌ت خوه‌ى و هاووڵاتیه‌یلى بگرێد، ك وه‌لاى كه‌مه‌و بایه‌س ئشاره‌ت وه‌پى بكریاتاد، وه‌تایبه‌ت ئیمه‌ ده‌وڵه‌ته‌یل دیموكراسى دوینیم ك چوین دونیا نه‌نه‌ یه‌ك له‌وه‌ختى یه‌كیگ له‌هاووڵاتیه‌یلیان تویش رویداگیگ باێد له‌وڵاتیگ تر ك یه‌كسه‌ر قونسوڵخانه‌یان له‌و ده‌وڵه‌ته‌ په‌یوه‌ندى ئه‌كاده‌ حكوومه‌ت ئه‌و ده‌وڵه‌ته‌ ك ئه‌و رویداگه‌ له‌تى بویه‌ ئه‌را چه‌ودیریكردن باوه‌ته‌گه‌. ئنجا ماناى چه‌س ئه‌و مه‌ویسیه‌ فه‌رامووش بكریه‌ێد ك هاته‌ تویش شماره‌ى فره‌یگ له‌عراقیه‌یل كورد فه‌یلى ك هویچ ده‌نگیگ له‌ى باوه‌ته‌و به‌رزه‌و نه‌وى نه‌ له‌حكوومه‌ت مه‌ركه‌زى به‌غداو نه‌یش له‌حكوومه‌ت هه‌رێم كوردستان له‌ور خاتر سه‌ره‌خوه‌شى له‌خیزان قوربانیه‌یل یا په‌یوه‌ندیكردن وه‌ لایه‌نه‌یل ئه‌نده‌نوسى یا ئوسترالى ئه‌را چه‌ودیرى مه‌سه‌له‌گه‌و له‌وه‌ر خاتر كه‌سوكار قوربانیه‌یل. وه‌ل ئه‌وه‌یشا هووكاره‌یل ره‌سانن عراقى و كوردى هه‌ق ته‌واویگ وه‌و باوه‌ته‌ نه‌یان و ته‌نانه‌ت وه‌كیل وه‌زیر كووچ و كووچ وه‌پیكریاگه‌یل عراقیش ئویشێد وزاره‌ته‌گه‌ ئاگادار نیه‌ وه‌ خنكیان ده‌یه‌ها عراقیه‌یل له‌ كورده‌یل فه‌یلى له‌ناو ئاوه‌یل ئه‌ندنوسى.

ئه‌وه‌ك هاته‌ تویش په‌نابه‌ره‌یل عراقى له‌ كورده‌یل فه‌یلى، ماناى گه‌ورایى ئه‌و مه‌ویسى و به‌دبه‌ختیه‌ ده‌ێد ك هاته‌ تویشیان و ئیسه‌یش له‌وڵاته‌یل تر ناڵنن وه‌ده‌سیه‌و. هه‌ر له‌وه‌ر ئه‌وه‌یش وه‌رپرسه‌یل عراقى و كورد دریغى داشتنه‌ له‌و بیده‌نگیه‌ له‌بان ئى جووره‌ باوه‌ت گه‌ورایگ وه‌ك مردن ده‌یه‌ها له‌ هاووڵاتیه‌یلیان، ك وه‌لاى كه‌مه‌و بایه‌سه‌ له‌ڕوى ئنسانیه‌و مامڵه‌ وه‌ل باوه‌ته‌گه‌یا بكردیان و له‌وه‌ر خاتر كه‌س وكاره‌یلیان په‌یوه‌ندى بكردیانه‌ لایه‌نه‌یل حكوومى ئوسترالى و ئه‌نده‌نوسى!

ئه‌وه‌ك په‌یوه‌سه‌ وه‌چاره‌نویس كورده‌یل فه‌یلى ئه‌ڵڵاجه‌وى ها له‌ورا لایه‌نه‌یل فره‌یگ ك خوه‌یان وه‌ مقه‌یه‌تیكه‌ر كیشه‌ى كورده‌یل فه‌یلى زانن و قسه‌ كه‌ن له‌بان مه‌زڵومیه‌تیان، بیده‌نگ بوین و قسه‌ له‌ى باوه‌ته‌و نه‌كردن جویر ئه‌وه‌ك بویشێد ئه‌و كورده‌یله‌ گرنگى نه‌یرن له‌لایان!

وه‌رپرسیاریه‌تى چه‌ودیریكردن هاووڵاتیه‌یل عراقى له‌ ده‌وڵته‌یل تر كه‌فێده‌ بان حكوومه‌ت به‌غداو هه‌رێم كوردستان، وه‌ل ئه‌وه‌یشا بایه‌سه‌ هووكاره‌یل ره‌سانن زیاتر وه‌رپرسیاریه‌تى ئى جووره‌ مه‌سه‌له‌یگ بگرێده‌ مل له‌وه‌ر خاتر هاووڵاتیه‌یل.