فه‌يليه‌يل و وه‌خت كی قه‌رزار كييه‌؟

شفق نيوز

بڕيگ پرسيار هه‌ن با باريمنه‌ی بان هه‌ڵكه‌فت ئيمه‌ی كورده‌يل فه‌يلی له‌ عراق، ئه‌ويش ئه‌وه‌سه‌ ك زوورممان له‌يوا دوينن وه‌ دريژايی رووژ سه‌رقاڵن، ئايا ئاكامه‌گه‌ی چه‌س؟ وه‌ هه‌ر حاڵ له‌ چينه‌يل تر كومه‌ڵگا فيشتر كاريگه‌ری ديرێد، ئمجا ئه‌گه‌ر ئيمه‌ وه‌ڕاسی دروسكرياگ بويم له‌ی باوه‌ته‌و ئايا پێوه‌ر راسی ئه‌را ئه‌و چشته‌يله‌ دانايمه‌ ك سه‌رقاڵمان كردگه‌، باوه‌ڕم ئه‌وه‌سه‌ له‌يرا گومان فيشتر ئه‌دێ، ئه‌ويش وه‌ئه‌وه‌گ هه‌ڵكه‌فا رووژانه‌ وه‌ كاره‌يلی چه‌واشه‌ی ئه‌وه‌سه‌.

هه‌ر له‌وه‌ر ئه‌وه‌يش باوه‌ڕم ئه‌وه‌سه‌ ئه‌وانه‌گ كار فريه‌ ئه‌كه‌ن وه‌ دقه‌ت وه‌ هه‌مان شيواز دوباره‌ی كاره‌يليان ئه‌كه‌ن و ئاسانيش نيه‌ شيوازه‌يليان ئاڵشت بكه‌ن، ته‌نانه‌ت هه‌رچه‌نی خاستر و ئاسانتريش بدێ، مانای ئه‌وه‌سه‌ ئه‌وانه‌ له‌ بنه‌ڕه‌ته‌و مه‌يله‌و ئاڵشتكاری نيين.

له‌ی ده‌رفه‌ته‌ حكايه‌ت بويچگ داربڕيگ باس ئه‌كه‌م، ك وه‌هه‌رحاڵ خه‌ريك كاركردن بويه‌ باخ و ناونی داره‌يل، ئمجا ره‌فيقيگی پرسيار له‌لی ئه‌كاو ئويشێده‌پی: ئايا وه‌خت ديرێد ته‌وره‌گه‌د تيژ بكه‌ێد، داربڕه‌گه‌ وته‌پی وه‌داخه‌و له‌وه‌ر فريه‌يی كاره‌يلم وه‌خت ئه‌را تيژكردنی نه‌يرم.

له‌ڕاسی ئيمه‌ی فه‌يليه‌يل له‌ بواره‌يل و شوونه‌يل تاڕاده‌ فريه‌يگ ئه‌وه‌گ سه‌قاڵمان ئه‌كا ده‌سنيشتنكردن چشته‌ گرينگه‌گه‌ له‌هويره‌مان ئه‌وه‌ێد، يا ئه‌وه‌سه‌ داوای داهێنان فيشتر له‌خواست گرينگ ئه‌كا، ئی مه‌سه‌له‌يشه‌ تاڕاده‌ی دويريگ له‌بان فه‌يليه‌يل جيوه‌جی ئه‌دێ ك ئه‌ناسيمنه‌يان، چوينكه‌ ئه‌وان سه‌رقاڵن وه‌ ته‌وره‌يل كوليانه‌وه‌و ده‌رفه‌تيگ فيشتر نايه‌ن ك تيژی بكه‌ن له‌وه‌ر ئه‌وه‌گ كاره‌يليان ئاسانتر بكا.

ئمجا ئه‌گه‌ر بخوازيم ده‌سه‌يليمان به‌رزه‌و بكه‌يم و كاريگ دياری بكه‌يم ئه‌را واقعمان، بايه‌سه‌ ته‌وره‌گه‌مان تيژ بدێ، چوينكه‌ وه‌چه‌واشه‌يه‌و خاستر ئه‌وه‌سه‌ خوه‌مان خه‌ريك نه‌كه‌يم له‌ناو باخيگ پڕ له‌ داربڕ.

عه‌لی حسێن فه‌يلی