كومار كوردستان له‌ مه‌هاباد ئيران

شفق نيوز

، وه‌رفراوان) . ئه‌وه‌ بوی له‌ ٢٤ كانوون دويم ١٩٤٦ وه‌ سه‌رووكايه‌تی {قازی محه‌مه‌د} سه‌رووك پارت ديموكرات كوردستان ئيران ، دامه‌زرانن كوومار مه‌هاباد ئاشكرا كرياو هه‌ر له‌سه‌ره‌تاوه‌ ده‌سكرده‌ بنياتناين دامه‌زرياگه‌يل وه‌ڕيه‌وبردن ناوخوه‌يی و مه‌يدان په‌روه‌رده‌ . ئمجا وه‌ل ئاشكراكردن كوومار كوردستان (مه‌لا مسته‌فای بارزانی)وياوه‌ره‌يلی يه‌كم گرووپيگ بوين په‌يوه‌ندی وه‌و كووماره‌وه‌ كردن و به‌رزترين پۆست وپله‌ی سه‌ربازی دريا خود بارزانی .

ئه‌وه‌ بوی حكوومه‌ت كوردستان له‌ يه‌كم هه‌وڵی ده‌سكرده‌ په‌خشه‌وكردن رووشنهويری كوردی و قازی محه‌مه‌د وه‌ يه‌كم سه‌رووك كوومار كوردستان هه‌ڵوژرياو رووژيگ له‌شوون ئه‌وه‌ وه‌ی جووره‌ قه‌سه‌م ياسايی يا قانوونی خواردو وت : (قه‌سه‌م وه‌ خوداو، وه‌ قورئان گه‌وراو، وه‌ نيشتمان و، وه‌ شه‌ره‌ف نه‌ته‌وه‌ی كوردو، وه‌ په‌رچه‌م پيرووز كوردستان ، بايه‌سه‌ هه‌وڵ بيه‌م تا دويا هه‌ناسه‌م و گيان و ماڵ و خوينم له‌وه‌ر خاتر مقه‌يه‌تيكردن سه‌روه‌خوه‌يی وبه‌رزی په‌رچه‌م كوردستان به‌خت بكه‌م ) .

قازی محه‌مه‌د رووژ( ١١ی شووبات ساڵ ١٩٤٦ ) وه‌ دروسكردن يه‌كم ئه‌نجوومه‌ن وه‌زيره‌يل له‌ وه‌ڕيه‌وبردن وڵات ك ١٣ وه‌زير گرته‌ خوه‌ی يه‌كم فه‌رمان باڵا (مرسوم) ئاشكرا كردو هه‌مان وه‌خت (بارزانی نه‌مر) وه‌ جه‌نراڵ و فه‌رمانده‌ی گشتی هيزه‌يل چه‌كدار دياری كريا . دياره‌ له‌شوون ١١ مانگ له‌ ده‌سڵات سه‌روه‌خوه‌يی كوومار مه‌هاباد و له‌پيلان يا موئامره‌يگ ناوده‌وڵه‌تی دژ وه‌ ملله‌ت كورد هيزه‌يل سه‌ربازی ده‌وڵه‌ت ئيران له‌ ٢١ / ١٢ / ١٩٤٦ ره‌سينه‌ شار مه‌هابادو (قازی محه‌مه‌د)و زوورم سه‌ركرده‌يل ده‌سگير كريان و له‌دادگاييكردنيگ ناعادڵانه‌ی سه‌ربازی سزای له‌سێداره‌داين له‌بان (قازی محه‌مه‌دو سه‌در قازی ئه‌ندام په‌رله‌مان ئيران نوێنه‌ر مه‌هاباد و محه‌مه‌د حسێن وه‌زير جه‌نگ ) له‌ رووژ ٣٠ / ٣ / ١٩٤٧دريا ، ك له‌مه‌يدان (چوارچرا)ی شار مه‌هاباد جی وه‌جی كرياو رووح پاكيان ره‌سيه‌ باره‌گای په‌روه‌ردگارهه‌ق . يه‌يش ئاشكراودياربوی ك له‌ناونی (ستالين و رۆزفلت و چه‌رچڵ و شای ئيران) ئی پيلانه‌ دانرياوئه‌وه‌ بوی يه‌كێتی سۆڤێت په‌شيمانه‌و بوی له‌ پشتگيريكردن كورد و كوومار مه‌هاباد و گشت ده‌سميه‌تيگ له‌لی بڕی و هه‌ر وه‌و سه‌به‌به‌ له‌كانوون يه‌كم ساڵ ١٩٤٦ وه‌ل يه‌كم روی وه‌ روی بوينه‌وه‌ی چه‌كداری وه‌ل هيزه‌يل سه‌ربازی ئيرانا ئه‌و كووماره‌ له‌ناو بريا . دی هه‌ر له‌و وه‌ختيشه‌ تا ئيسه‌ ئه‌و به‌ش كوردستانه‌ هه‌ر له‌ژير ده‌سڵات حكوومه‌ت ئيران مه‌نده‌وه‌و گشت هه‌قه‌يل ملله‌ت كورد له‌و به‌شه‌ جوير به‌شه‌يل تر كوردستان پاشيل كرياگه‌و هه‌ميشه‌ حكوومه‌ت ئيران نواگيری له‌ هه‌قه‌يل ره‌وای كورد كردگه‌و نه‌يشتگه‌ داواكاری و خواست كورده‌يل له‌وڵات خوه‌يان سه‌ر بگريگ و دوشمنايه‌تی وه‌رده‌وام وه‌ليانا كردگه‌ ، وه‌ی شيوه‌ خاك به‌شكرياگ كوردستان له‌ناونی ده‌وڵه‌ته‌يل داگيركه‌رهه‌ر مه‌نده‌وه‌و تا رووژ ئمڕوويش ملله‌ت كورد خه‌بات له‌بان هاوردنه‌وه‌ی خاك ونيشتمان خوه‌ی كه‌يگ .