خوه‌ريگ ك هويچ وه‌خت ئاوا نيه‌ود

شفق نيوز

سه‌دان ساڵه‌ له‌لايه‌ن داگيركه‌ره‌يلی زوڵم له‌ لی كريه‌ێد و هه‌قه‌يلی ژيرپا خريه‌ێد، ملله‌تيگ ك دوژمنه‌يلی فه‌توای حه‌رامكردن زووان و ناسنامه‌ ئه‌رای ده‌ركردنه‌، نه‌ته‌وه‌يگ ك هه‌ق نه‌يری بڕيار چاره‌نويس خوه‌ی بيه‌ێد، كێشه‌يگ وه‌ناو كێشه‌ی كورد و هه‌رێميگ نيمچه‌ سه‌روه‌خوه‌ی وه‌ناو كوردستان ك ته‌نيا ده‌روازه‌ی ئوميد و ته‌نيا دڵخوه‌شی كورده‌يل دونياس ك وه‌ داخه‌و ئه‌ويش وه‌رانوه‌ر هه‌زاران هه‌ڕه‌شه‌ی ناوخوه‌ی و ده‌ره‌كی بويه‌سه‌و.

 

ئه‌را وازكردن ئی ده‌روه‌چ ئوميده‌ وه‌ڕوی ملله‌ت كورد كه‌سه‌يل فره‌يگ له‌ گيان خوه‌يان مايه‌ نانه‌و دار و نه‌دار ماددی و مه‌عنه‌وی خوه‌يان فيدا كردنه‌، يه‌كيگ له‌و نه‌مره‌يله‌ باوگ رووحی ملله‌ت كورده‌ ك ئمڕوو ساڵڕووژ كووچ دوياييه‌؛ له‌ 1/3/1979 گه‌وراپياويگ رووح پاكی ئه‌را كه‌شكه‌شييه‌يل ئاسمان دا له‌ شه‌قه‌ی باڵ ك هه‌ر له‌ عومر سێ ساڵانه‌و ده‌سكرده‌ خه‌بات ئه‌را وه‌ديهاتن ئامانجه‌يل ره‌وای ملله‌ته‌ به‌شخورياگه‌گه‌ی، له‌ وه‌ختيگ ك ته‌نيا‌ سێ ساڵ عومری بی له‌ ساڵ 1906 له‌لايه‌ن دوژمنه‌يل كورد زندانی كريا، چمانێ هه‌ر له‌ سه‌ره‌تای وه‌ديهاتنی زانستيان بارزانی كيه‌! وه‌لی نه‌... وه‌ باوه‌ڕ من تا ئيسه‌ كه‌س نه‌تويه‌نستيه‌ وه‌وجووره‌گ بايه‌ته‌ بوود بزانێ بارزانی كيه‌! جوور جوانيگ له‌ سه‌ره‌تای جوانيمه‌و هويرم مينه‌ی ناسنامه‌ يا هويت كردياد و پرسياره‌يل فره‌يگ له‌تی نه‌خش به‌سا، ئه‌را په‌ياكردن جوواو ئه‌و پرسياره‌يله‌ هانا ئه‌را سه‌رچاوه‌يل فره‌يگ بردم، گشت سه‌رچاوه‌گان‌ ئاماژه‌ وه‌ ناو كه‌سيگ وه‌ ناو (بارزانی) كرديان، له‌شوون ئه‌وه‌ ك جوواو پرسياره‌گانم په‌يا كردم ته‌نيا پرسيار بی جوواويگ ك له‌لام مه‌ن ئه‌وه‌ بوی ك (مسته‌فا بارزانی) كيه‌؟

 

له‌ شوون چه‌ن ساڵيگ و له‌ دويای خوه‌نستن و هويره‌و كردن فره‌يگ له‌باره‌ی ئه‌و پرسياره‌ ته‌نيا جوواويگ ك ديمه‌سه‌وه‌ی ئه‌وه‌سه‌ ك بارزانی نه‌مر ئه‌و خوه‌ره‌ بی ك وه‌ رووشنايی خوه‌ی فكره‌يليگ ئازاد كرد ك ساڵه‌يل فره‌يگ له‌ ناو زندان تيه‌ريكی ديل كرياوين، بارزانی ئه‌و خوه‌ره‌ بی ك وه‌ گه‌رمای خوه‌ی ئه‌و يه‌خه‌يله‌ تاوانه‌و ك ئازادی ملله‌تيگ رچگانوين، بارزانی ئه‌و خوه‌ره‌ بی ك وه‌ پاكی خوه‌ی ناپاكييه‌يل داگيركاری و زوڵم و زوور نيشتمانه‌گه‌م سڕيه‌و، بارزانی ئه‌و خوه‌ر نه‌مره‌سه‌ ك هويچ وه‌خت ئاوا نيه‌ود...! ته‌نيا به‌ڵگه‌يش ئه‌را ئسبات قسه‌گانم لاپه‌ڕه‌يل زه‌ڕين مێژوو ملله‌ته‌گه‌مه‌.

 

ئاراس جواد