های هه‌ی له‌ی دونيای ده‌ور ده‌وره!!‌

شفق نيوز

ئی ره‌فتار ناپوخت و ناوه‌جی ئمڕوو سه‌رده‌م به‌رژه‌وه‌نديه‌يله‌ بڕيگ هووكار سياسی و ژياری و ئابووری و رووشنهويری ديريد ك له‌ی باوه‌ته‌ جی باسكردن نيه‌، وه‌لی خاڵ سه‌ره‌كی و ناوه‌ڕووك ئی باسه‌ ئه‌وه‌سه‌ ك ئايا ئه‌راچه‌ له‌ی رووژگاره‌ گشت چشتيگ بويه‌سه‌ به‌رژه‌وه‌ندی و ئه‌رك و كرده‌وه‌ی ئنسانی وه‌ گرژيه‌و مامڵه‌ وه‌ليا ئه‌كريه‌يد؟.

حكوومه‌ت عراقی تا دويه‌كه‌ بيجگه‌ دژايه‌تيكردن و ناونيتگ له‌ كورد و برين موچه‌ی هه‌زاران كارمه‌ندو تومه‌تباركردن هه‌ريم كوردستان وه‌ دزين نه‌فت و كيشمه‌كيش بودجه‌و چشته‌يل تر، ئيسه‌ كه‌ناڵه‌ نيمچه‌ فه‌رميه‌گه‌ی له‌ هه‌واڵ هه‌ڵه‌په‌ڵه‌(عاجل)ه‌گه‌ی خوه‌يه‌و خه‌ريكه‌ دعايه‌ی سه‌ركه‌فتن ئه‌را هيزه‌يل پێشمه‌رگه‌ی كوردستان ئه‌كا له‌ به‌ره‌يل جه‌نگ دژ داعش و هاوپه‌يمانه‌يلی و پشت وه‌ پێشمه‌رگه‌و هيز ئاسمانی ئه‌مريكی به‌ساگه‌ ئه‌را هاوردنه‌وه‌ی ئه‌و ناوچه‌يله‌ ك سوپای عراقی له‌تاو داعش چووڵيان كرد.

های هه‌ی له‌ی دونيای ده‌ور ده‌وره‌، ك ئيمه‌ی كورد چه‌نيگ به‌دبه‌خت و بيچاره‌و مافخورياگ و دڵسووز و به‌زه‌ييداريم، چه‌نيگ سه‌بردار و داڵوه‌خشيده‌ريم، چه‌نيگ ساده‌و بی كينه‌تيم، چه‌نيگ هاوخه‌م و هاوده‌رديم وه‌ل پيكهاته‌يل، بيگومان گشت ئی سفه‌ته‌يله‌ بوينه‌سه‌ خوينی چاره‌نويس و تويشهاتنمان وه‌ده‌س په‌ڵپ و كيشمه‌كيش ناڕه‌وای نه‌ياره‌يلمان و هويچ وه‌ختيگ ئه‌وان دڵيان وه‌و جووره‌ ئه‌را ئيمه‌ ژان نه‌كردگه‌و ناكا.

وه‌ل ئه‌وه‌يشا ئيمه‌ی كورد هه‌ر بايه‌سه‌ نزاو لاڵه‌ی ئه‌وه‌ بكه‌يم هويچ وه‌ختيگ هه‌وه‌جه‌ی ئيمه‌ وه‌ ئه‌وان نه‌خه‌يدو چه‌پووكيان له‌بان سه‌ر ملله‌ت كورد نه‌ود ئه‌را چه‌وسيان و مه‌ويسكردنمان، يه‌يش مانای ئه‌وه‌ نيه‌ ئيمه‌ ئاره‌زوو چه‌وسيان عه‌ره‌ب و نه‌ته‌وه‌يل تر بكه‌يم له‌بان هه‌ق، به‌ڵكوو يه‌ راسييگه‌و سه‌ران حكوومه‌ت عراقی چ ئه‌وساو چ ئيسه‌ له‌دژ ملله‌ت و به‌رژه‌وه‌ندی كوردستان لێدوان ناوژدانی دانه‌و خه‌ير وه‌پيمان نه‌تواسنه‌، وه‌لی هه‌ر وه‌ختيگ ته‌نگيان بويه‌و خوه‌يان له‌ باريكه‌ رييگ دينه‌سه‌و په‌نا بردنه‌سه‌ وه‌ر ده‌سميه‌ت كورد، ك وه‌و خاتره‌ ئويشيم هه‌ر بژيه‌ی كورد و كوردستان و سه‌ربه‌رزی ئه‌را پێشه‌مه‌رگه‌ ئازاو چه‌و نه‌ترسه‌گه‌ی.

جه‌ماڵ ئه‌ركه‌وازی