باوگ کينیایی و داڵگ به‌ريتانی و كورده‌يل فه‌يلی بايه‌د شاروه‌ده‌ريان بكريه‌ێد

شفق نيوز

 

دويايين سه‌رۆك ئه‌مريكا‌، هه‌وه‌ر وه‌وجووره‌گ زانين باراك ئۆباماس‌ ك چل وچوارمين سه‌رۆك ئی وڵاته‌سه‌. ئۆباما له‌ ساڵ ٢٠٠٩  سه‌رۆكايه‌تی ئه‌مريكا گرته‌ ده‌س.

سه‌رۆكه‌يل وڵاته‌يل يه‌كگرتێ ئه‌مريكا وه‌  فێشتر ده‌نگ مه‌ردم ئه‌مريكا پا نه‌نه‌ ناو كۆشك چه‌رمگ و وه‌ ده‌نگ ئه‌ی مه‌ردميشه‌ له‌ی باره‌گای حكوومه‌ته‌ ده‌ر چن.

ئه‌وانه‌ كارمه‌ندن، نه‌ حوكمڕانه‌يل له‌ ئه‌مريكا وه‌ هساو بان و وه‌ی مه‌مه‌ره‌ ئه‌ی وێنه‌يل ڕه‌نگايڕه‌نگه‌ له‌ ليان دوينيمن.

ئمجا له‌ وڵاته‌يل خوه‌رهه‌ڵات ناوڕاس وه‌ تايبه‌ت وڵاته‌يل عه‌ره‌بی هه‌ڵه‌وگه‌رديه‌يم، له‌ جه‌هانێگ ك حكومڕانه‌يلێ، حكوومه‌ت هه‌ر ئه‌و جووره‌ به‌نه‌ ڕێه‌و ك له‌ سه‌رده‌م ئه‌مه‌ويه‌يل و عه‌باسيه‌يل ئيداره‌ بوی و ئه‌را چينه‌يل و مناڵه‌يل دويای خوه‌يان وه‌ ميرات هيشتنه‌ی جی.

ئۆباما له‌ ئه‌مريكا وه‌ مه‌مه‌ر بنه‌وارداشتنێگ له‌ كنيايی بوينێ ده‌ر نه‌كريا، به‌ڵكم تويه‌نس بوووده سه‌رۆك ئه‌ی وڵاته‌. ئه‌مريكييه‌يل، ڕه‌چه‌ڵه‌ك و پووس سيه‌ێ ئه‌و له‌وه‌ر چه‌و نه‌گرتن و ته‌نيا له‌ مووده‌ی يه‌گ له‌ ساڵ ١٩٦١ زايينی له‌ هاوايی ئه‌مريكا هاتويده‌ دی، ئه‌را سه‌رۆكايه‌تی وڵاته‌گه‌يان ده‌نگ دانه‌ پێ.

ئه‌و له‌ باوگێگ كينيايی و داڵگێگ به‌ريتانی هاته‌ دی. هێمان چوار ساڵێ بوی ك باوگ و داڵگی له‌ يه‌ك چه‌كيان و دويای له‌ يه‌ك بڕيان، باوگێ چيه‌و ئه‌را كينيا. ئۆباما له‌ لای داڵگێ له‌ ئه‌مريكا مه‌ن و ره‌سيه‌ سه‌روك كۆماری ئه‌ی وڵاته‌.

له‌ هه‌ڵوژاردن سه‌روك كۆماری ئه‌مريكا، هويچ كه‌س له‌ نه‌سه‌وه‌ و ڕه‌چه‌ڵه‌ك باوگ و داڵگ ئۆباما نه‌پرسی وه‌ی مه‌مه‌ره‌گ گشتيان زانستن ك باو‌گێ كينيايی و داڵگێ به‌ريتانيه‌ و ته‌نانه‌ت يه‌يشه‌ زانستن ڕيشگێ ئه‌را ئسلام ئه‌ڵه‌وگه‌رديه‌ێد!.

وه‌لی له‌ عيراق، وڵاتێگ ته‌نانه‌ت به‌زه‌یی وه‌ مناڵه‌يل خوه‌ی نايه‌ێد. وڵاتێگ ك له‌ ناوی كورده‌يل فه‌يلی له‌ سه‌ر ئه‌وه‌گ باوگ و داڵگيان عيراقين، وه‌لی‌ وه‌ مه‌مه‌ر و مه‌هانه‌ی يه‌گ ئيرانين له‌ وڵات خوه‌يان كه‌نه‌يانه‌و ده‌يشت!.

حوكمڕانه‌يل عيراق ئه‌ی چينه‌ وه‌ زوور و وه‌ شێوه‌ێگ ك هه‌ر باس نيه‌كريه‌ێد له‌ وڵات كردنه‌ ده‌يشت. جايه‌ڵه‌يل خريانه‌ زندان يا له‌وره‌ كوشتنه‌يان يا سراوانوينيان كردن.

وه‌لی ئه‌مريكييه‌يل وه‌ ئۆباما ئيجازه‌ دان تا پله‌كانه‌يل پێشكه‌فتن يه‌ك له‌شوون‌ يه‌ك بووڕێد. له‌ وه‌رايوه‌ر ئه‌ی كردار ئه‌مريكييه‌يله‌، عيراق ڕووڵه‌يل خوه‌ی(كورده‌يل فه‌يلی) له‌ وڵات كرده‌و ده‌يشت.

خوازم ئۆباما بزانێد ك كورده‌يل فه‌يلی ته‌نانه‌ت وه‌ل ئاڵشت بوين رژيم له‌ عيراق وه‌ هويچكام له‌ مافه‌يل خوه‌يان نه‌ڕه‌سينه‌ و بڕێگ له‌ سياسه‌تمه‌داره‌يليش ئه‌را وه‌ ده‌س هاوردن ده‌نگ و ڕه‌سين وه‌ كورسی ده‌سه‌ڵات وه‌ كاريان ئه‌يه‌رن.

له‌ ئاخره‌و خوازم له‌ ئۆباما يه‌ بپرسم: كه‌ی له‌ عيراق ئه‌وه‌ دوينيمن سه‌رۆك يا سه‌رۆك كۆمار ئه‌ی وڵاته‌ كوردێگ فه‌يلی يا مه‌سيحی يا له‌ كه‌مينه‌يل ئه‌ی وڵاته‌ بوود.

 

سالم ئسماعيل نويرگه‌