هويچ خوه‌ی وه‌چشتزان!!

شفق نيوز

 

گشت ئی هه‌ڵسووكه‌فت و ره‌فتاره‌يله‌ شايسته‌ی ئه‌وه‌سه‌ تاوتوی بكريه‌ن و بخريه‌نه‌ وه‌رباس و له‌يه‌كه‌وداين له‌ڕوی ده‌روينی ‌و ئه‌قڵيه‌ته‌و ئه‌را مه‌زه‌نه‌كردن خود ئه‌و كه‌سه‌يله‌ ك ئيچنه‌ ره‌فتاره‌يليگ ديرن و خوازيارن وه‌بی بنه‌ماو گوزه‌يشته‌ی ستايشكرياگيگ باڵه‌فڕه‌ وه‌ره‌و مه‌رز كه‌سايه‌تی و هسايه‌تی گه‌ورايی بكه‌ن و كورد وه‌ته‌نی "له‌ پڕيگ بوونه‌ كوڕيگ" و مه‌رام نه‌گونجياگ دڵه‌يليان وه‌ ئوخه‌يش ناته‌مسق و ناپه‌سنيگ بارنه‌ دی! يه‌يش له‌وه‌ختيگ گشت ئه‌و سفه‌ته‌يله‌ ك سه‌ره‌تا باسيان كرديم جی ره‌زامه‌نی مه‌ردم رووشنهوير و ماريفه‌تدار كوومه‌ڵگايش نيه‌ ئه‌را به‌رزه‌وكردن پله‌وپايه‌و شانيه‌ت ئاده‌ميزاد له‌ڕوی ئه‌خلاق و ئه‌ده‌ب.

حوكم سروشت مه‌ده‌نيانه‌ی گشت ئاده‌ميزاديگ له‌بان ئی گووشه‌ی زه‌ويه‌ ئه‌وه‌سه‌ ك بايه‌سه‌ وه‌ ئه‌نازه‌ی خوه‌ی توانای باريده‌ كار و ته‌نيا هه‌ر ئه‌وه‌نه‌ی كه‌سايه‌تيه‌گه‌ی گوزارش له‌ وجوود خوه‌ی بكا نه‌ك جوور كه‌سيگ"هويچ خوه‌ی وه‌چشتزان"هه‌ميشه‌ خوه‌ی ده‌ربخاو كه‌سايه‌تی نه‌خوازرياگی وه‌ سفت وسه‌قه‌ت بخاده‌ وه‌رچه‌و.

دياره‌ مه‌ردمانيگ هه‌ن هه‌ميشه‌ ئاشقه‌و خويده‌رخستنن له‌وه‌رچه‌و مه‌ردم، وه‌تايبه‌ت ئه‌وانه‌ك وه‌ زوور بويه‌ يا وه‌ رازی پله‌و پۆستيگ كه‌فته‌سه‌ ده‌سيان و ته‌نيا ئه‌زره‌تيان ئه‌وه‌سه‌ خوه‌يان نيشان بيه‌ن له‌وه‌رچه‌و قه‌وم خيش و شانازی وه‌خوه‌يانه‌و بكه‌ن و ته‌نانه‌ت وه‌ قسه‌ی پيشينه‌يليش ناتويه‌نن"قول مامريگيش واز بكه‌ن"وهويچ كاريگيش له‌ده‌سيان نايه‌يد ته‌نيا خوه‌يوادان و فشه‌يی نه‌ود، ك هه‌ر وه‌و خاتريشه‌ دوينيم له‌وه‌خت ڕی و ڕه‌سم يا هه‌ر بوونه‌يگ تر بڕيگ مه‌ردم ئه‌خه‌نه‌ شوون و ئه‌كه‌فنه‌ نوايان تا كه‌س وكاری بزانن ئه‌يه‌ پاپه‌دار و پاسه‌وانداره‌!! يه‌يش له‌ وه‌ختيگ كه‌سه‌يليگيش هه‌ن وه‌ڕاسی نه‌خش ديرن له‌ ده‌سڵات و ئه‌تويه‌نن كاره‌يل فريه‌يگ جيوه‌جی بكه‌ن، وه‌لی له‌ هه‌مان وه‌خت جوور كه‌سيگ ئاسايی خوه‌يان ده‌رخه‌ن له‌وه‌رچه‌و مه‌ردم و ره‌فتار و هه‌ڵسوكه‌فتيان له‌يوا شه‌رمه‌زار كه‌س وه‌رانوه‌ر ئه‌كا ريز و حورمه‌ت له‌ليان بگيريه‌يد و باسيان وه‌ خاسی بكريه‌يد.

له‌ڕاسی ئيچنه‌ كه‌سه‌يليگ غروور و خوه‌شه‌ويسی فره‌يگ ئه‌را خوه‌يان ديرن فيشتر له‌ خوه‌شه‌ويسی ئه‌را مه‌ردمان تر، ئمجا جار له‌يوا هه‌س ئه‌و وه‌رپرسيارێتيه‌ ك ئه‌رای ته‌رخان كرياگه‌ فيشتر له‌ قه‌واره‌ی خوه‌ی گه‌ورايه‌و كردگه‌و خوازياره‌ وه‌و ره‌فتار ده‌سكرده‌ خوه‌ی له‌وه‌رچه‌و مه‌ردم گه‌ورا بزانيد!! ئمجا ئويشيم ئه‌يانه‌ له‌ی دونيا مه‌راميان ته‌نيا خوه‌شه‌ويسی خوه‌ی ده‌رخستنه‌و له‌هه‌مان وه‌خت گشت هه‌وڵيگيش ده‌ن ئه‌را كيشانن مه‌يل مه‌ردم وه‌ره‌و لای خوه‌يان، وه‌لی ئه‌و هه‌وڵه‌ بيهووده‌ و بی به‌رهه‌مه‌، چوينكه‌ ئه‌يانه‌ ك خوه‌يان ئه‌كه‌نه‌ چشت، له‌وه‌رچه‌و خوه‌شباوه‌ڕه‌يل له‌ هويچ زياتر هويچ چشتيگ تر نين.

جه‌ماڵ ئه‌ركه‌وازی