كاشكا ته‌له‌فزیۆنه‌یل ئیسه‌ وژدانیان ڕه‌نگامه‌ بوود و به‌رنامه‌یان سیه‌و چه‌رمگ

شفق نيوز

 

كار دامه‌زرانن ته‌له‌فزیۆن له‌ سه‌ره‌تاى ساڵ 1954 وه‌رجه‌ ئه‌وه‌ك بووده‌ فه‌رمى كومپانیاى"باى" لقیگ له‌ به‌غدا داشت و نمایشگایگ بازرگانى واز كرد و گشت كه‌ره‌سه‌یگ له‌ بریتانیاوه‌ هاورده‌ كردیاد، ئمجا ته‌له‌فزیۆنیگیش له‌ناو ئه‌و نمایشگا دانان و مه‌ردمیش ئه‌را ته‌ماشاكردنى سه‌ردانى كردیان و هه‌ركه‌سیگیش بخوازیاد خوه‌ى له‌ ناو شاشه‌ى ته‌له‌فزیۆن بوینیاتاد بایه‌سه‌ یه‌ك عانه‌ له‌لى سه‌ندیان، ئمجا له‌و وه‌خته‌ یه‌ك عانه‌ چوار فلس بوى.

ئه‌وه‌ بوى له‌ساڵ 1955 فه‌رمان دریا ك ئه‌و ته‌له‌فزیۆنه‌ جیواز بكریه‌ید ئه‌را ناو ده‌زگاى ئیزگه‌و په‌یوه‌ندى كریا كومپانیایگ ئه‌را دامه‌زراننى، ئه‌و كومپانیایشه‌ هه‌یشت شاره‌زا له‌و بواره‌ كلكردو ده‌سكردنه‌ كاركردن و قوناغ یه‌كه‌م جوور ئه‌زموون"تجریبى" بوى و ماوه‌ى په‌خشه‌گه‌یشى ته‌نیا "25"كم بوى.

ئه‌و ته‌له‌فزیۆنه‌ له‌ سه‌ره‌تاى وازبوینى دڵخوه‌شى فریه‌یگ بوى ئه‌را مه‌ردم و خوه‌ش فریه‌یگیش پیشكه‌ش كرده‌ دوینه‌ره‌یل له‌و سه‌رده‌مه‌، وه‌لى له‌لایه‌ن ستۆدیۆ جوور ئیسه‌ گرینگى وه‌پى نه‌دریاو له‌وه‌خت كاركردن راسه‌وخۆ ده‌نگ هه‌ر چشتیگ له‌ده‌یشت بویاتاد كیشیاده‌ى ناو .

وه‌ل ئه‌وه‌یشا هه‌ر وه‌ختیگ واران و بڵاچه‌و گرمهڕیش بویاتاد مه‌ردم وه‌ ئاشكرا ژنه‌فتیانه‌ى له‌ ته‌له‌فزیۆن، چوینكه‌ ده‌نگه‌گه‌ى تیكه‌ڵ په‌خش ته‌له‌فزیۆنه‌گه‌ بوى.

وه‌لى له‌یرا مه‌سه‌له‌ى گرینگیگ هه‌س، ك ئه‌ویش ئه‌وه‌سه‌ ته‌له‌فزیۆنه‌گه‌ى به‌غدا له‌و رووژگاره‌یله‌ جوور ته‌له‌فزیۆنه‌یل ئیسه‌ دروو نه‌زانست و گشت چشتیگ وه‌ ساده‌یى ئه‌را مه‌ردم بڵاو كردیاد، وه‌لى ئیسه‌ دوینید كه‌ناڵه‌یل ته‌له‌فزیۆن گشت جه‌هان ئه‌ڕاد نزیكه‌و كه‌ن و ڕاسیه‌یل فریه‌یگ چه‌واشه‌وه‌ ئه‌كه‌ن. هه‌ر وه‌و خاتریشه‌ ئویشیم: كاشكا كه‌ناڵه‌یل ته‌له‌فزیۆن وژدانیان ڕه‌نگامه‌ بوود و به‌رنامه‌یلیان سیه‌و چه‌رمگ تا كه‌م چه‌واشه‌ى راسیه‌یل بكه‌ن.

راغب عوبه‌یدى

ج . أ