نيسان و شه‌فه‌ق و كورده‌يل فه‌يلی

شفق نيوز

دی له‌وه‌خت له‌ده‌سداين ئوميد ئيمه‌ وه‌ چه‌واشه‌وه‌ كار وه‌ ئه‌زه‌ره‌ت و جدديه‌ت فيشتره‌و كرديايم ئه‌را ئاينده‌و رووژگاريگ خاستر، له‌باوه‌ت قسه‌كردنيش له‌ مه‌سه‌له‌ی كيشه‌گه‌مان هه‌وه‌جه‌ رووژيگ يا واده‌يگ دياريكرياگ يا ڕی وڕه‌سم و ساڵياديگ نه‌يريم جوور ئه‌وه‌گ له‌ سه‌ره‌تای مانگ نيسان له‌گشت ساڵيگ ئه‌نجام ئه‌دريه‌يد، ك هه‌ميشه‌ له‌تی ئه‌گه‌رديمنه‌ شوون يه‌كڕزی و تيكه‌ڵكردن ته‌قه‌لا و هه‌ڵويسته‌يلمان وه‌ل ئه‌وانه‌گ ياد شه‌هيده‌يلمان ئه‌كه‌ن له‌گشت پيكهاته‌يل جياجيا وه‌ گشت رينمايی و ئه‌ڕای چوينه‌يليان.

ئيمه‌ رووژيگ له‌ رووژان هوير له‌وه‌ نه‌كرديمه‌ دونيا پشت له‌ليمان كردگه‌و هيشته‌سه‌مانه‌ دويای خوه‌ی، وه‌لی دوينيم كيشه‌و ده‌رده‌يلی فيشتره‌و ئه‌دێ، ك ئی مه‌سه‌له‌يشه‌ يه‌كيگه‌ له‌ پشتگووشخستن كيشه‌يگ نه‌مردگ و له‌هه‌مان وه‌خت زينگ جوور ئه‌وه‌گ باس ئه‌كريه‌يد.

ئيمه‌ له‌وه‌ختيگ روی له‌ چه‌سپانن قه‌وڵ و خوه‌شه‌ويسی و لايه‌نگری دايم، بڕيار دايم له‌و شوونه‌و ك له‌تی وجوود ديريم ده‌س بكه‌يمنه‌ كار و نه‌ف له‌و توانايه‌يل وه‌رجه‌سه‌كرياگه‌ بكه‌يم ك فه‌راهه‌مه‌ ئه‌رامان و كار له‌و بواره‌ بكه‌يم ك توانای ديريم، ئمجا ئه‌و دروشم سه‌ره‌كييشه‌ ك ئه‌را "شه‌فه‌ق"ده‌سنيشانی كرديم له‌ سه‌ره‌تای مانگ نيسان گشت ساڵيگ ئه‌وه‌ بوی ك وه‌ ئارام كار بكه‌يم ئه‌را ئاڵشتكردن هه‌ڵكه‌فتمان وه‌رجه‌ ئه‌وه‌گ مه‌ردمان تر ئه‌ڕای چوينيان له‌ وه‌رانوه‌رمان ئاڵشت بكه‌ن، ك هه‌ر وه‌و خاتريشه‌ ده‌زگای شه‌فه‌ق نه‌ف له‌ ئه‌زموون كه‌سه‌يل تر وه‌رگرت، وه‌لی وه‌رده‌وام بوی له‌بان ريڕه‌و تايبه‌ت خوه‌ی له‌ وڵاتيگ ده‌وڵه‌مه‌ن ك سته‌مديده‌يل فريه‌يگ گرته‌سه‌ باوه‌ش و له‌وانه‌يش فه‌يليه‌يل.

براو هاوكارم جه‌واد كازم وه‌ڕيه‌وبه‌ر راديۆ "شه‌فه‌ق" باوه‌تيگ له‌باره‌ی مه‌ينه‌تی ده‌زگاگه‌مان نويساو داوا له‌و كه‌سه‌يله‌ كرد ك خاترمان ئه‌خوازن و قه‌در و قيمه‌ت كاره‌گه‌مان و ده‌سكه‌فته‌يل و ريڕه‌و شه‌فه‌ق ئه‌زانن هه‌وڵ قورتاركردن راديۆگه‌ بيه‌ن، چوينكه‌ ئه‌گه‌ر له‌ده‌سی دايم دوياخر هه‌رچه‌نی هه‌وڵيش بيه‌يم مه‌حاڵه‌ ده‌نگمان بڕه‌سنيم و مه‌ردم به‌غدايش ناژنه‌فنه‌مان، ك وه‌و خاتريشه دوينيم خواست ئه‌وه‌سه‌ ك گشت رووژيگ مه‌ردم وه‌ ده‌نگ موسێقی وازبوين راديۆی شه‌فه‌ق بانه‌ خه‌وه‌ر و گشت رووژيگ ده‌نگی بڕه‌سيده‌ گشت ماڵيگ و گووش له‌ هه‌واڵه‌يلی بگرن و گشت چركه‌و ده‌قه‌يگ وه‌ليانا بدێ تا فيشتر په‌يوه‌س بوون وه‌پيه‌و، ئی مه‌سه‌له‌ راسه‌، چوينكه‌ فريه‌يگ له‌ليان ئويشن سه‌رساميم وه‌ كادر راديۆگه‌ وه‌بی ئه‌وه‌ك بويننه‌يان، گشت ئه‌يانه‌يش له‌ ئاكام ديد و نوڕستن و مامڵه‌ی ئنسانی و مقه‌يه‌تيكردن ماف و حورمه‌ت يه‌كتری سه‌رچه‌وه‌ گرت.

له‌وه‌ر ئه‌وه‌ منيش ئويشم: ئيمه‌ وه‌ ته‌نيا توانای جيوه‌جيكردن گشت داواكاريه‌يل پيكهاته‌ی كورده‌يل فه‌يلی نه‌يريم له‌ڕوی ره‌سانن و رووشنهويری، وه‌لی فه‌يله‌يل ئه‌وساو ئيسه‌يش هه‌وه‌جه‌ی فريه‌يگ وه‌ كاره‌يل ده‌زگاگه‌ داشتنه‌ له‌و خزمه‌تگوزاريه‌ ك پيشكه‌شی وه‌پيان كردگه‌.

سه‌ركه‌فتنمان يا شكه‌ستمان دويا ويستگه‌ نيه‌، گرينگ ئه‌وه‌سه‌ ئه‌تويه‌نيم وه‌رده‌وام بدێم له‌و ريڕه‌وه‌ ك گرتيمه‌ی وه‌ر و ئه‌و مه‌ردمانيشه‌ ك خاوه‌ن كيشه‌ن و لايه‌نگر و گووشگر راسكانيين ئه‌وانه‌ ئه‌تويه‌نن مه‌زه‌نه‌ی شه‌فه‌ق بكه‌ن له‌و كاره‌يله‌ ك قوناغ وه‌ قوناغ ئه‌نجامی داگه‌ نه‌ك ته‌ماشاكه‌ره‌يل، ك هه‌رچه‌نی هه‌وه‌جه‌ وه‌پی داشتن يا وه‌چه‌واشه‌وه‌، چوينكه‌ دويای نه‌مه‌ندن ئه‌و پرووژه‌ له‌ وجوود كه‌س ده‌نگيان ناژنه‌فيد، ك هه‌ر وه‌و خاتريشه‌ شه‌فه‌ق بويه‌ مێژوو.

وه‌ختيگيش ك قسه‌ له‌بان نيسان ئه‌كه‌يم و ئه‌و ژان و مه‌ويسيه‌ ئه‌خه‌يمنه‌ هوير، بايه‌سه‌ وه‌رجه‌ گه‌وراكردن و ساڵياد شه‌هيده‌يل و بيسه‌روشوونه‌يل وكووچ وه‌پيكرياگه‌يلمان هه‌وڵه‌يلمان يه‌ك بخه‌يم، ئمجا هه‌ر له‌ سه‌ره‌تای دامه‌زرانن ده‌زگای شه‌فه‌ق ئيمه‌ له‌ به‌غدا ڕيه‌يل پيچاوپيچيگ بڕيمنه‌و ريڕه‌ويگ ئه‌را نه‌وه‌يل دويای خوه‌مان نه‌خشه‌كيش كرديمنه‌ ئه‌را وه‌رده‌واميداين وه‌و ده‌سكه‌فته‌يله‌و هويچ وه‌ختيگيش ئه‌وه‌ له‌هويره‌و ناوه‌يم ك په‌يمانه‌ی سه‌ركه‌فتنمان له‌ شكانن ئه‌و وه‌ربه‌سه‌يله‌ ته‌مام ئه‌دێ ك وه‌ داهێنان ده‌زگای فه‌يليه‌يل جوور شه‌فه‌ق ئه‌نجام بدريه‌يد جوور ئاگر ژير خوڵه‌كوو.

عه‌لی حسێن فه‌يلی

ج . أ