شاعریگ له‌هویره‌و بریاگ

شفق نيوز

  له‌یوا دیاره‌ ئیمه‌ى كورد كه‌سایه‌تیه‌یل له‌هویربریاگ فریه‌یگ دیریم ك هیمان په‌ى وه‌پیان نه‌وریاگه‌و ناوگوم كریانه‌، چوینكه‌ جارجاریگ بار ناوچه‌و رووژنامه‌و نویه‌سه‌ره‌یلیش وه‌تایبه‌ت نه‌خش بنه‌ڕه‌تى دیرن له‌ ئاشناكردن و وه‌سه‌ركردن خاوه‌ن به‌هره‌و شاعر و هونه‌رمه‌نده‌یل له‌گشت بواریگه‌و.

شار عامودا شاعر و هونه‌رمه‌نده‌یل فریه‌یگ له‌لى هه‌ڵكه‌فتگه‌، وه‌لى دیاره‌ بڕیگ له‌لیان له‌هویره‌و بریاگه‌و ناویان كوشیاسه‌و له‌گووش مه‌ردم كورد. شاعر له‌هویره‌و بریاگ كورد" سه‌برى خلۆ سیتى" یه‌كیگه‌ له‌و شاعره‌یل كورده‌ ك وه‌خت مردنى هه‌ر وه‌ فه‌رامووشكریاگ مه‌ندوید.

ئى شاعره‌ له‌ساڵ 1932 هاته‌سه‌ دونیاو له‌ساڵ 2004 ماڵئاوایى یه‌كجارى له‌ژیان كردگه‌. له‌وه‌ر سه‌ختى بار ژیان و گوزه‌ران و سه‌ختى بار سیاسى و كوومه‌ڵایه‌تى ئى شاعره‌ ئه‌وه‌نه‌ گرینگى وه‌ ئه‌زموون شعرى نه‌یاگه‌، ئنجا هه‌ر له‌وه‌ر ئه‌وه‌یش به‌رهه‌میل شعرى خوه‌ى دویر خستگه‌ له‌ بڵاوكردن له‌ گووڤار و رووژنامه‌یل و كتاوه‌یل كوردى و عه‌ره‌بى.

وه‌لى وه‌ل ئه‌ه‌یشا سه‌برى هه‌میشه‌ گه‌ردیاده‌ ناونى مه‌ردم و له‌شوونه‌یل جیاجیاى شار عامودا فریه‌یگ له‌ دووس و هاوڕیه‌یل ئاشنا وه‌ شعره‌یلى كردیاد، چوینكه‌ رووژگار فریه‌یگ كورد له‌وڵاته‌یل داگیركه‌ر چشته‌یل فریه‌یگ له‌لى قه‌یه‌غه‌ بوى و ته‌نانه‌ت ئه‌ده‌ب و فه‌رهه‌نگ و كلتووریش له‌لى قه‌یه‌غه‌ بویه‌.

سه‌برى بڕه‌ شعر فره‌یگ دیرید و له‌وانه‌یش شعریش وه‌ناو" به‌سه‌ شیرینه‌گه‌م" ك هه‌ڵه‌وگه‌ردیاگه‌ ئه‌را بان زووان عه‌ره‌بى، ئنجا هه‌ركه‌سیگ ئى شعره‌و باقى شعره‌یلى بخوه‌نیده‌و ئه‌راى ده‌ركه‌فید ك چه‌نیگ شعره‌یل شاعر گه‌وراى كورد جگه‌رخوێن كاریگه‌رى له‌لى داشتگه‌و له‌ چه‌ن شعریگیشى ره‌نگ و روخسار شعره‌یل جگه‌رخوێن وه‌پى به‌خشاگه‌.

سه‌برى سیتى براده‌رى فریه‌یگیش وه‌ل جگه‌رخوێن داشتگه‌و ته‌نانه‌ت له‌ شعریگیشى باس ئه‌و شاعر ناودار كورده‌ ئه‌كا، وه‌لى جى داخه‌ ئى شاعره‌ كووچ یه‌كجارى كرد وه‌بى ئه‌وه‌ك شعره‌یلى چاپ بكاو كه‌سیش نه‌وى ده‌سمیه‌تى بیه‌ید له‌ڕوى ئنسانیه‌و ئه‌را بڵاوكردنه‌وه‌ى شعره‌یلى، ك ئى حاڵه‌تیشه‌ هاته‌سه‌ بان فریه‌یگ له‌ شاعر و نویسه‌ره‌یلمان. یه‌یش نموونه‌یگ له‌و شعره‌یله‌ ك دایناگه‌ وه‌ناونیشان "به‌سه‌ شیرینه‌گه‌م" ك له‌تى ئویشید:

به‌سه‌ شیرینه‌گه‌م

خوه‌شه‌ویسه‌گه‌م

ئه‌ى باڵابه‌رز جوور سنه‌وبه‌ر

دڵم گشتى سزانید

من یه‌كه‌م كه‌سیگ بویم

روى له‌باخچه‌د كردم

وه‌ته‌نیا له‌ له‌وه‌رده‌م زوقم سیه‌ هیشتیده‌م

دى نازانم گوناى من چه‌ بوى؟

دڵم بویه‌ لانه‌ى خوه‌شه‌ویسى

ئه‌ر خوازید بكوشیده‌م!

وه‌و گوڵه‌ ئه‌ناره‌ بكوشه‌م

وه‌لى ئه‌وه‌ بزان وه‌ختى ئویشیده‌ پیم:

چه‌ خوازید ئه‌ى ئاشق دیوانه‌؟

حسێن ئه‌حمه‌د

ج . أ