بنه‌چه‌ك چارلى چاپلين زانيد چه‌س؟

شفق نيوز

چارلی چاپلين ك هونه‌رمه‌نديگ گه‌ورای جه‌هانی بوی له‌ بوار كۆميدی و ژن و پياگ و گه‌وراو بویچگ وه‌ نمایشه‌یلى هاورده‌ خه‌نستن له‌ ١٦ی ئه‌بريل ساڵ ١٨٨٩ له‌ له‌نده‌ن پايته‌خت شانشين يه‌كگرتگ هاته‌سه‌ دونيا و له‌ ٢٥ ديسه‌مبه‌ر ساڵ ١٩٧٧ له‌ وڵات سويسرا ماڵئاوايی يه‌كجاری له‌ دونيا كردگه‌.

وه‌گووره‌ى زانیارى چه‌ن نامه‌یگ چارلى چاپلن ك له‌ شوونيگ مقه‌یه‌تیكریاگ سویسرى دوینریانه‌سه‌و، ئه‌وه‌ ئاشكرا كردنه‌ ك ئی هونه‌رمه‌ند پايه‌به‌رزه‌ له‌ بنه‌چه‌كه‌و سه‌ر وه‌ هووزه‌يل قه‌ره‌قه‌ره‌س‌، هه‌ر له‌وه‌ر ئه‌وه‌يش رووژنامه‌ى "گاردیان" له‌نده‌نى ئه‌و نامه‌یله‌ وه‌ نرخدارترین و خاسترین نامه‌ی ته‌ڵايی تاريف كرد، چوینكه‌ تایبه‌ته‌ وه‌ یه‌كیگ له‌ دیارترین كه‌سایه‌تیه‌یل سه‌ده‌ى ٢٠ و تا ئيسه‌يش نمايش فيلمه‌يلی ئه‌زه‌رت تایبه‌تیگ دیرن له‌لاى مه‌ردم وه‌گشتى و مه‌ردم جه‌هان ئه‌يه‌ريده‌ خه‌نستن.

زوورم مه‌ردم باوه‌ڕيان ئه‌وه‌سه‌ ك گشت زانيارييگ له‌باوه‌ت كه‌سایه‌تى و ژیان چارلى چاپلينه‌و هه‌ر له‌وه‌خت له‌دایگبوینی‌ تا وه‌خت مردنى ئاشكرا بویه‌، وه‌لى بنه‌چه‌ك چارلى چاپلين ناودارترين هونه‌رمه‌ند جه‌هانی ئه‌وه‌سه‌ ك گۆگاى "مۆنترۆ" له‌ وڵات سویسرا زانيارييگ له‌بانی ئاشكرا كرد ك زویتر هویچ كه‌سیگ نه‌زانسته‌ی، ك ئه‌ویش بڕيگ نامه‌ى تایبه‌ت بوین وه‌و كه‌سایه‌تى و ئه‌كته‌ر ناوداره‌و له‌ناونى ئه‌و نامه‌یلیشه‌ نامه‌یگیان له‌ پیاویگه‌و ئه‌ڕاى نویسیاوید ك عومرى فيشتر له‌ 80 ساڵ بویه‌ وه‌ناو "جاك هیل"و ئه‌و نامه‌يشه‌ له‌ساڵه‌یل هه‌فتاى سه‌ده‌ى گوزه‌یشت ئه‌را چاپلين نویساويده‌ى و ئه‌وه‌ ده‌رخستگه‌ ك چارلى چاپڵين خه‌ڵك باشوور له‌نده‌ن نیه‌، به‌ڵكوو له‌ناوچه‌ى"بلاك باتچ"له‌ "سموس ویك" نزیك "پێرمنگهام" له‌ خیزانیگ كووچكه‌ر"قه‌ره‌قه‌ره‌"له‌دایگ بویه‌.

دى ئه‌و رووژنامه‌ى گاردیان له‌نده‌نيه‌ ك زانياری شارياگيگ له‌بان بنه‌چه‌ك ئی هونه‌رمه‌ند ناوداره‌ بڵاو كرد ئه‌را گشت مه‌ردم ئاشكرا بوی چاپلين سه‌ر وه‌و پيكهاته‌سه‌و هه‌ر وه‌و خاتريشه‌ باس له‌ ناوچه‌ی "پێرمنكهام"يش كردگه‌ وه‌ ئه‌وه‌ك ئی ناوچه‌ پڕ بویه‌ له‌ قه‌ره‌قه‌ره‌ى كووچكه‌ر رۆمانى و یه‌یش زیاتر ئسپات بنه‌چه‌ك چاپڵين كرد.

جه‌ماڵ ئه‌ركه‌وازی