ته‌نيا سه‌ركه‌فتگ

شفق نيوز

خوڵاسه‌ی قسه‌ شوونه‌وار و ئاماژه‌يل ئامار و كاره‌ساته‌يل پڕ ژان رووژانه‌، گشت ئه‌يانه‌ نيشانه‌ی زوڵم و سته‌م و كوشتن و سه‌ربڕين و كاولكاری و ويرانه‌س ك عراق ساڵه‌يل دوير ودريژيگ هاورده‌ دوياوه‌و هه‌ر گاميگيش وه‌ره‌و راسه‌وكردن ريڕه‌و بنياتناين متمانه‌و گيان له‌يه‌كوه‌خشين و يه‌كگرتگ هه‌وه‌جه‌ وه‌ وه‌خت دريژ و توانای فريه‌يگ ماددی و مه‌عنه‌وی ديريد.

ئيمه‌ سه‌رمان سوڕمينيد له‌ی شماره‌و ئاماره‌يل رخه‌وبه‌ره‌و حكوومه‌تيش شانازی ئه‌كا وه‌و زه‌ره‌د و سيناريۆيه‌يل درامی زنجيره‌ به‌دبه‌ختی و كاره‌ساته‌يله‌و هه‌ر ئه‌ويش هووكار سه‌ره‌كی و دروسكه‌ر ئی مه‌ينه‌تيه‌يله‌سه‌ ك هيمانيش خوه‌ی وه‌ دريغيكه‌ر نازانيدو دگان وه‌و راسيه‌ نانه‌يدو په‌شيمانی وه‌پيه‌و ديار نيه‌ له‌بان ئه‌و كار و كرده‌وه‌يليه‌، به‌ڵكوو خه‌ريك دابه‌شكردن تومه‌ته‌ له‌بان هه‌ر لايه‌نه‌يليگ له‌لی رازی نيه‌و لايه‌نگر ئی ئاژاوه‌ی مه‌ترسيدار و پڕ كاره‌ساته‌ نيين ريشگ په‌يوه‌ندی ناونی عراقيه‌يل بڕيد له‌ڕوی خاك وملله‌ت.

راسه‌ ئاماره‌يليگ هه‌ن ك هه‌رچه‌نيگيش كه‌من له‌باوه‌ت شماره‌ی شه‌هيده‌يل و زه‌خمداره‌يل و بيسه‌روشوونه‌يل و كووچ وه‌پيكرياگه‌يل و ئه‌و ناوچه‌و خاكه‌يله‌ ك كه‌فته‌ ده‌س ترۆر، وه‌لی وه‌ل ئه‌وه‌يشا ده‌نگ وڕه‌نگ ديار وئاشكرايگيش هه‌س له‌لايه‌ن ئه‌و بيتاوانه‌يله‌ ك واينه‌و قورتار بوينه‌ له‌ دووزه‌خ داعش و شماره‌ی فريه‌يگيش له‌ بيوه‌ژن و يه‌تيم و مليۆنه‌ها بيكاره‌يليش هه‌ن، ك يه‌يش مشتيگه‌ له‌ خه‌رواريگ.

ئمجا ئه‌و چشته‌ ك گومه‌و مايه‌ی نائوميديه‌ له‌باوه‌ت بار عراق، ئه‌ويش چه‌نێتی و ڕاده‌ی ئه‌و زه‌ره‌ده‌يل ئنسانی و ماددی و مه‌عنه‌ويه‌سه‌ ك ره‌سيه‌ گشت پيكهاته‌يل ئی ملله‌ته‌ له‌ ئاكام ئه‌و سياسه‌ت و بڕيار و كرده‌وه‌يل نايه‌كسانه‌ ك حكوومه‌ت ناوه‌ندی ئه‌نجاميداو كه‌ڵه‌كه‌ی كرد له‌بان ئی وڵاته‌، چوينكه‌ ته‌نيا لايه‌نيگ ك هوير ئه‌كاو وه‌ئاشكرا شانازی وه‌ سه‌ركه‌فتن ئه‌كا، ئه‌ويش حكوومه‌ته‌ نه‌ك لايه‌نيگ تر خوه‌شه‌ويس ئی وڵاته‌، هه‌ر له‌وه‌ر ئه‌وه‌يش حكوومه‌ت عوزرخوازی وه‌ خواستيگ نازانيد له‌سای وجوود گه‌نجينه‌ی فريه‌يگ له‌ خوسه‌و كينه‌ت و كيشه‌يل چاره‌سه‌ر نه‌كرياگ و ملله‌ت به‌شبه‌شه‌بوی له‌ ئاكام سياسه‌ته‌يلی.

عه‌لی حسێن فه‌يلی

ج . أ