گیر وگرفت زووان كوردى له‌ ناوڕاس و باشوور عیراق

شفق نيوز

ناوڕاس و باشوور عیراق ژیه‌ن وه‌تایبه‌تى كورده‌یل فه‌یلى هیمان خه‌م زووانه‌گه‌یان هه‌ڵگرتنه‌، ئه‌و زووانه‌ ك هه‌میشه‌ كریاسه‌ ده‌نگیگ خنكیاى ك وه‌دزیه‌و وه‌پى قسه‌كردیان له‌ ترس ئه‌وه‌گ بڕه‌سیده‌ گووش ڕژیم دیكتاتۆرى وه‌رین، ك هه‌میشه‌ ئى زووانه‌ كردیانه‌ یه‌كیگ له‌ به‌ڵگه‌نامه‌یل تومه‌ت و بوخت ئه‌وه‌ ك یانه‌ عیراقى نین... ئیمڕوویش خه‌مه‌یلیگتر ئه‌را شیوه‌زووان كوردى فه‌یلى په‌یا بویه‌، بڕیگ له‌و كورده‌یل فه‌یلیه‌ ك چه‌ومان كه‌فته‌ پیان وه‌ى جووره‌ باسى كردن ك له‌ قسه‌یلیان دیار ده‌ید.

هاووڵاتى ئبراهیم عه‌لى حوسێن ئویشى :"ئه‌و ده‌وروه‌ر عه‌ره‌بیه‌ ك له‌تى ژیه‌یمن هیشت مناڵه‌یلمان زووان داڵگى خوه‌یان له‌ هویره‌و بووه‌ن و وه‌ زووان عه‌ره‌بى قسه‌ بكه‌ن ".

هاووڵاتى كه‌ریمه‌ عه‌لى عه‌بدولحوسێن ك چوار كوڕ و دویه‌ت دیرى وه‌ ده‌نگیگ پڕ له‌ خه‌مه‌و باس ئى مه‌سه‌له‌ كرد و وت :" ئیمه‌ ئه‌وسا وه‌ شیوه‌زووان كورده‌یل خانه‌قین قسه‌كردیایمن له‌ ترس جاسووسه‌یل ڕژیم وه‌رین تا وه‌ ته‌به‌عیه‌ت ئیران تومه‌تبارمان نه‌كه‌ن ك ئاكامه‌گه‌ى گرتن و ته‌سفیركردن بوى، مناڵه‌یلمان ئمڕوو هویچ له‌ باوه‌ت شیوه‌زووان كوردى فه‌یلى نیه‌زانن، و یه‌یشه‌ مایه‌ى خه‌مبارى و دڵته‌نگیمه‌".

له‌لاى خوه‌یه‌و هاووڵاتى جمهوریه‌ جه‌عفه‌ر مه‌هدى گله‌یى له‌ كاروه‌ده‌سه‌یل كرد و وت :" كاروه‌ده‌سه‌یل ئمڕوو ده‌ربه‌ن ئیمه‌ نین و له‌ هه‌وه‌جه‌یل ئنسانى ئیمه‌ نیه‌پرسن ك بایه‌سه‌ لاى كه‌م كه‌ره‌سته‌ى ژیان سه‌روه‌ریگ ئه‌رامان دابین بكه‌ن، وه‌لى نه‌كردن، ئه‌ى دى چوین لا له‌ زووان و هه‌وه‌جه‌یل مه‌عنه‌ویمان كه‌ن؟!".

نویسه‌ر و میدیاكار ئه‌حمه‌د ئه‌لئه‌حمه‌د ئه‌وه‌ ئاشكراكرد ك :"شیوه‌زووان كوردى فه‌یلى شیوه‌زووان دێرین یا عه‌ریقیگه‌ ، وه‌لى ڕژیم وه‌رین وه‌ سیاسه‌ته‌یلى هه‌وڵدا ئه‌را تاوانن گشت ڕووشنهویریه‌یل له‌ ناو ڕووشنهویرى عرووبى(ناسیۆنالیزم عه‌ره‌بى) و كورد فه‌یلى یه‌كم بازنه‌ى زنجیره‌ى گومه‌وكردن و تاوانن نه‌ته‌وه‌ و ئیتنیكه‌ عیراقیه‌گان بوى له‌ ناو یه‌ك نه‌ته‌وه‌".

ئه‌لئه‌حمه‌د زیاتریش وت :" ئیمڕوو له‌ شوون ڕمیان ڕژیم دیكتاتۆرى چه‌وه‌ڕى ئه‌وه‌ كردیمن هه‌رچى زوڵم و زووره‌ لاوریه‌ید وه‌لى هیمان مه‌ردممان وه‌ زووان داڵگى خوه‌یان قسه‌ نیه‌كه‌ن له‌وه‌ر چه‌ن هووكاریگ سیاسى و كوومه‌ڵایه‌تى و ڕووشنهویرى".

ئه‌لئه‌حمه‌د ئه‌وه‌یشه‌ ڕووشنه‌وكرد ك :" هاووڵاتى كورد فه‌یلى هیمان هس وه‌وه‌ كه‌ید ك به‌عزى لایه‌ن شه‌ڕ وه‌پى فرووشن و هیمان متمانه‌ وه‌ ئى سه‌رده‌م نووه‌ نه‌یرن چوینكه‌ نه‌وین دام و ده‌زگایه‌یل ڕووشنهویرییگ ك جاڕ ئه‌را شیوه‌زووان كورد فه‌یلى بیه‌ن و پشتگیرى له‌لى بكه‌ن، بویه‌سه‌ هووكار گرینگیگ له‌ هووكاره‌گان لاوازه‌و بوین شیوه‌زووان كوردى فه‌یلى، ته‌نیا ده‌زگاى شه‌فه‌ق نه‌ود ك نه‌خش و ده‌ور گه‌ورایگ دیرى له‌ به‌رزه‌وكردن شانیه‌ت شیوه‌زووان كوردى فه‌یلى و په‌رش و بڵاوكردنى".

ئه‌لئه‌حمه‌د ئاره‌زوومه‌ند ئه‌وه‌ بوى ك :" هه‌رچى دام و ده‌زگاى فه‌یلیه‌ چه‌و بووڕنه‌ ده‌زگاى شه‌فه‌ق له‌ بڵاو كردن شیوه‌زووان كوردى فه‌یلى و به‌رزه‌وكردن ئاست ڕووشنهویرى و خوین نوویگ بكه‌نه‌ گیانى، و ده‌زگاى شه‌فه‌ق له‌ى باوه‌ته‌ تا ئیسه‌ سه‌ركه‌فتیه‌".

نویسه‌ر جه‌مال حه‌سه‌ن له‌لاى خوه‌یه‌و وه‌ى جووره‌ مه‌سه‌له‌گه‌ دوینى ك وت :" دویره‌وكه‌فتن فره‌كه‌س له‌ ڕووڵه‌یل ئى چینه‌ له‌ قسه‌كردن وه‌ شیوه‌زووان كوردى فه‌یلى له‌ به‌غدا و ناوه‌ند شاره‌یل زیاتر دیار ده‌ید، وه‌لى له‌ ناوچه‌یل دویر و كنار شاره‌یل هیمان كورده‌یل فه‌یلى شیوه‌زووان خوه‌یان پاراستنه‌".

له‌ باوه‌ت هووكار دویره‌وكه‌فتن كورده‌یل فه‌یلى له‌ شیوه‌زووانه‌گه‌ى خوه‌یان جه‌مال حه‌سه‌ن وت:"هووكارى فره‌س جوور نه‌وین خوه‌نستن وه‌ زووان كوردى له‌ ناوڕاس و باشوور وڵات، و نه‌وین دام و ده‌زگایه‌یل و ناوه‌نده‌یلیگ وه‌ شیوه‌زووان كوردى فه‌یلى قسه‌ بكه‌ن، و نه‌وین كه‌ناڵیگ ئاسمانى (سه‌ته‌لایتیگ) وه‌ى شیوه‌زووانه‌ وه‌ل مه‌ردم قسه‌ بكه‌ید".

جه‌مال حه‌سه‌ن له‌ كووتایى قسه‌گانى وت :" بژارده‌ یا نوخبه‌یل فه‌یلى ئه‌رك سه‌رشانیان جیوه‌جى نه‌كردنه‌ له‌ جاڕكیشان و پشتگیرى كردن له‌ زووان كوردى و شیوه‌زووان فه‌یلى چوینكه‌ یانه‌ سه‌رقاڵ یا مه‌شغووڵن وه‌ كاروبار لاوه‌كى یا جانبى و شه‌خسى خوه‌یان".

له‌لاى خوه‌یه‌و دكتۆر سه‌عه‌د به‌شیر به‌ڕێوه‌به‌ر گشتى ماڵ كتاب و به‌ڵگه‌نامه‌گان وه‌ى جووره‌ باس ئى مه‌سه‌له‌كرد و وت:"ساڵه‌یل سه‌ركوتكردن و زوڵم و زوور ئێتنیكى و تایفى دژ وه‌ كورده‌یل فه‌یلى هیشته‌یان له‌ زووان داڵگى خوه‌یان دویره‌و بكه‌فن ، ئه‌و بیجگه‌ نه‌وین خوه‌نستن وه‌ زووان كوردى له‌ ناوچه‌گانیان و كه‌مى ناوه‌نده‌یل ڕووشنهویرى بایه‌خده‌ر وه‌ شیوه‌زووان كوردى فه‌یلى و ئه‌گه‌ر بویه‌سه‌یان ئه‌وه‌ نه‌خش و ده‌وریان كه‌م بویه‌ و هویچ كاریگه‌رییگ نه‌یاشتنه‌".

سه‌عه‌د به‌شیر ئه‌وه‌یشه‌ ئاشكراكرد ك :" زووان مینێده‌ گیاندار و هه‌وه‌جه‌ وه‌ چاودێرى و پویلداركردن و پیشخستن و هووكاره‌كردن دیرى، له‌وه‌ر ئه‌وه‌ هووكاره‌یل سیاسى و ڕووشنهویرى و هونه‌رى وماددى وه‌ یه‌كه‌و بوینه‌سه‌ مایه‌ى وه‌ره‌ودویا چوین شیوه‌زووان كوردى فه‌یلى".

سه‌عه‌د به‌شیر ئه‌وه‌یشه‌ پرسى :" ئایا مه‌دره‌سه‌لیگ هه‌س زووان كوردى یا وه‌ شیوه‌زووان فه‌یلى هووكاره‌ بكه‌ید، شماره‌یان چه‌نیگه‌؟".

له‌ كووتایى قسه‌گانى سه‌عد به‌شیر وت :"یانه‌ گشتى وه‌و ئاكامه‌ ڕه‌سننه‌مان ك: هویچ گوێڕانكارى گه‌ورایگ نیه‌ له‌ ژیان كورد فه‌یلى له‌ لایه‌نه‌یل سیاسى و ڕووشنهویرى و كوومه‌ڵایه‌تى و ئابوورى و تاوانه‌گه‌یشى ها بان هه‌ردوگ حكوومه‌ت ناوه‌ند و حكوومه‌ت هه‌رێم كوردستان وه‌ یه‌كه‌وه‌".