دیدار"شیرین و فه‌رهاد"ئه‌را يه‌كه‌مجار

شفق نيوز

 ئیمه‌ى كورد و بگر بیگانه‌یل فره‌یگیش داستان"شرین و فه‌رهاد"ژنه‌فتیمنه‌و باس وه‌سه‌رهات ئشق پاك و بیگه‌رد ئه‌و دو ئاشق ناودار كویه‌نه‌ چیه‌سه‌ ناو لاپه‌ڕه‌یل تاریخ و شوونه‌وار ئه‌و ئشقیشه‌ دیار و ئاشكراسه‌و(قه‌سر و بیستوین)یش به‌ڵگه‌ و شایه‌تیده‌ر ئه‌و ئشق راسكانیه‌سه‌ ك بنه‌ڕه‌ت ئه‌و خوه‌شه‌ویسیه‌ له‌لیانه‌و سه‌رهه‌ڵداو بویه‌ باس و كه‌فته‌ بان زووان مه‌ردم و له‌یوا ده‌نگه‌ودا نویسه‌ر و شاعره‌یلیش وه‌ قه‌ڵه‌مه‌يليان وه‌رده‌وام تیه‌ر‌ یاد ئيچنه‌ داستانيگ بكه‌ن ك دوياخر وه‌ ژان و حه‌سره‌ت كاڵ كووتايی وه‌پی هات .

زه‌كریا كوڕ محه‌مه‌د كوڕ مه‌حموود قه‌زوینى له‌كتاوه‌گه‌ى"شوونه‌وار وڵاته‌یل و هه‌واڵ به‌نه‌یل" باس ئى وه‌سه‌رهاته‌ كردگه‌و ئویشید : له‌ناونى به‌غداو هه‌مه‌دان له‌كنار ئاویگ خوسره‌و په‌رویز "كسرا" قه‌سریگ ئه‌را شیرین دروسكردگه.

فارسه‌یلیش ئویشن په‌رویز سێ چشت داشتگه‌ نه‌ پاشایگ وه‌رجه‌ خوه‌ى و نه‌یش پاشايگ له‌شوون خوه‌ى له‌لیان نه‌یاشتنه‌، ك ئه‌ویش یه‌كمیان"بلهبد" گورانیچڕه‌گه‌ى و دویمیان "شه‌ودیز" ئه‌سپه‌گه‌ى و سێیه‌میانیش "شیرین" ده‌زویرانى بویه‌ .

قه‌زوینى ئویشید: له‌كتاوه‌یل عه‌جه‌م باس ئه‌وه‌ كریاگه‌ ك شیرین دویه‌ت یه‌كیگ له‌ پاشایه‌یل ئه‌رمه‌ن بویه‌و جوانیه‌گه‌ى بى وینه‌ بويه‌، هه‌ر له‌وه‌ر ئه‌وه‌یش په‌رویز "590 – 628ز" ژنیگ كلكردگه‌ ئه‌ڕا لاى و خه‌ڵه‌تانه‌سه‌ى و ناسه‌ى پشتكه‌ى شه‌ودیز وهاوردسه‌ى ئه‌ڕاى، ئنجا وه‌ختى ره‌سیه‌سه‌ جى، په‌رویز له‌ ماڵ نه‌ویه‌ و ئه‌و ژنه‌یلى وه‌ختى چه‌ویان كه‌فته‌سه‌ شیرین ئه‌وه‌نه‌ جوان بویه‌، دى زانستنه‌ هه‌ڵوژنیده‌ى له‌بان ئه‌یان و گرینگى وه‌پى ده‌ید، هه‌ر وه‌و هاتريشه‌ حه‌سویدى وه‌پى بردنه‌و شوونیگ نیشانى دانه‌و وتنه‌سه‌پى پاشا فه‌رمان وه‌پیمان داگه‌ له‌یرا قه‌سریگ ئه‌ڕاد دروس بكه‌یم ك "قه‌سر شیرین" ئیسه‌س، چوینكه‌ په‌رویز چه‌ن ژنیگ تر داشتگه‌.

ئنجا با بزانیم شیرین چوین یه‌كمجار چه‌وى كه‌فته‌ فه‌رهاد و ئشق و خوه‌شه‌ویسى له‌ناونیان په‌یا بوى !!

ئویشن شیرین فره‌ حه‌ز كردگه‌ له‌خواردن "شیر" و قه‌سره‌گه‌یشى دویر بویه‌ له‌"په‌چیه‌"ى ئاژه‌یله‌و ك شوون ئسراحه‌ت و دوشانن په‌سه‌یل بویه‌، ك وه‌جووریگ ژنه‌یل په‌رویز وتنه‌ ئه‌و شیره‌ تا بڕه‌سیده‌ لاى شیرین سه‌رده‌و بوود و بایه‌سه‌ چاره‌سه‌ریگ ئه‌راى بوینیمنه‌و، هه‌ر له‌وه‌ر ئه‌وه‌یش نه‌خشه‌یگ ئه‌ڕاى دانانه‌و تا لاى قه‌سره‌گه‌ى جوویگ له‌ كوچگ ئه‌ڕاى دروس بكه‌ن تا یه‌كسه‌ر ئه‌و شیره‌ بدوشیه‌ید و هه‌ر له‌ په‌چیه‌گه‌ وه‌گه‌رمى وه‌ناو جووه‌گه‌یا ئه‌ڕاى بچوود، ك تائیسه‌یش شوونه‌واری هه‌ر مه‌ندگه‌.

ئه‌را دروسكردن جووه‌گه‌يش هه‌وه‌جه‌ وه‌ كه‌سیگ شاره‌زا داشتنه‌، مه‌ردمیش وتنه‌ كابرایگ هه‌س ناوى فه‌رهاده‌ مه‌گه‌ر ئه‌و بتویه‌نید وه‌جوانى دروسى بكا، چوینكه‌ شوون قه‌سره‌گه‌ به‌رزتر بویه‌ له‌ په‌چیه‌گه‌و هه‌ر وه‌و خاتريشه‌ داواى یه‌كیگ كردنه‌ له‌و باوه‌ته‌و هونه‌ر سه‌رڕشته‌ داشتوود.

قه‌زوینى له‌كتاوه‌گه‌ى ئویشید: دریژى ئه‌و جووه‌ (2) فه‌رسه‌خ و (20) قه‌ده‌م له‌به‌رزى بویه‌و بایه‌س بوى جفت بویاتاد وه‌ل زه‌ویاو له‌لاى په‌چیه‌گه‌و كه‌میگ لیژ بویاتاد تا وه‌ئاسانى شیره‌گه‌ وه‌ناویا باتياد و نه‌وسیاتاد و له‌هه‌ردوگ سه‌ر جووه‌گه‌یش حه‌وز دروس كریاس.

دى ئه‌و قه‌سريشه‌ چوارده‌ورى باخ بویه‌ پڕ بویه‌ له‌گشت جووره‌ مه‌ل و باڵنده‌ و گیانله‌وه‌ریگ، ك هه‌زاران كه‌س تا ماوه‌ى هه‌فت ساڵ له‌ناوى كار كردنه‌، ئنجا له‌يرا ده‌ركه‌فيد ك ئشق و دیدار ناونى "شیرین و فه‌رهاد" ئه‌ڕا یه‌كمجار له‌وه‌ختى فه‌رهاد هات جووه‌گه‌ ئه‌را قه‌سره‌گه‌ى شیرین دروس كرد ده‌سكرده‌پى و هه‌ر له‌وه‌ر خاتر ئشق شیرینيش بوی ك فه‌رهاد تیشگ به‌دبه‌ختى جوانه‌مه‌رگی كرد و ئه‌و ئشق پاكه‌ برده‌ ژیر خاك .

جه‌ماڵ ئه‌ركه‌وازى