ئه‌رك رووژانه‌ى ژنه‌یل و مه‌شقیگ ده‌روینى

شفق نيوز

 

وه‌ل ئه‌وه‌یشا له‌ ژیان ئمڕوومان خواست ئه‌وه‌سه‌ ك ژنه‌یلیش شان وه‌شان هاوسه‌ره‌یلیان ده‌س وه‌كار بوون له‌ ده‌یشت ژیان خیزانیش، ئه‌ویش له‌وه‌ر خاتر خاستركردن بار ئابوورى خوه‌یان.

 

بیگومان یه‌یش بووده‌ دروسكردن فشار فره‌یگ ئه‌را بار ده‌روینى ژنه‌یل له‌وه‌ر ئه‌وه‌ك هه‌میشه‌ هه‌وڵ ده‌ید ك بتویه‌نید نه‌خش خوه‌ى جوور" هاوسه‌ریگ خاس، داڵگیگ خاس، كارمه‌ندیگ خاس" نیشان بیه‌ید، وه‌تایبه‌ت زوورم ئه‌و ژنه‌یله‌ ك له‌ئۆرپا ژیه‌ن له‌وه‌ر جیاوازى شیواز و ماوه‌ى كاركردن له‌ وڵاته‌یل.

 

زوورم ئه‌و ژنه‌یله‌ ك كارمه‌ندن له‌ ئۆرپا رووژانه‌ 6 تا 8 سه‌عات كار كه‌ن، ئنجا دویاى ته‌واوبوین ماوه‌ى كاركردنیان له‌ ده‌یشت راسه‌وخۆ ده‌س كه‌نه‌ ئه‌نجامداین كاره‌یل ناوماڵ، ك یه‌یش هه‌وه‌جه‌ وه‌ تواناى فره‌یگ  دیرید و بایه‌سه‌ به‌رنامه‌ ئه‌ڕاى دابنریه‌ید، هه‌ر له‌وه‌ر ئه‌وه‌یش هه‌وجه‌ وه‌ هاوكارى هاوسه‌ره‌یلیان دیرن ئه‌را وه‌{یه‌وبردن كاره‌یلى له‌ناو خیزان و له‌بان كاره‌گه‌ى.

 

ئیمه‌ى ئاده‌میزاد جوور یه‌ك نیمن و جیاوازیم له‌ شیواز وه‌سه‌ربردن ژیان و ئاره‌زووه‌یل و ئه‌راى چوینمان و وه‌كارهاوردن توانایه‌یلمان، هه‌ر وه‌و خاتریشه‌ گرینگ ئه‌وه‌سه‌ ك ژنه‌یل بتویه‌نن وه‌ هووشیاریه‌و مامڵه‌ وه‌ل جه‌سه‌و ده‌روینیان بكه‌ن و ئارامییگ ئه‌را ده‌روینیان ده‌سه‌وه‌ر بكه‌ن ك بووده‌ى مایه‌ى پڕه‌وكردن ئه‌و وزه‌یله‌ ك رووژانه‌ تیه‌رنه‌ى كار   تا ده‌سمیه‌تیان بیه‌ید و ئاسانكارى ئه‌ڕایان بكا ئه‌را ئه‌وه‌ بڕ بكه‌نه‌ ئه‌ركه‌یل رووژانه‌یان.

 

له‌یرا پرسیاریگ په‌یا بوود، ك ئایا ژنه‌یل چوین بتویه‌نن ئه‌و ئارامى ده‌روینیه‌ دروس بكه‌ن؟ هه‌ر وه‌ختیگ تن ئاماده‌گى داشتید ك وه‌ راسى گرینگى بیه‌یده‌ خوه‌د و نه‌خش خوه‌د له‌ كوومه‌ڵگاو خیزانه‌گه‌د وه‌ گرینگ بزانید، ئه‌وه‌ بیگومان خاستر و ئاسانتر رینمایى وه‌رگرید و گورجتر گام نه‌ید ك نه‌خش خوه‌د جوانتر و به‌رزتر ده‌سنیشان بكه‌ید.

 

وه‌ جیوه‌جیكردن ئه‌و ئه‌ركه‌یلیشه‌ ژن تویه‌نید خاستر مامڵه‌ وه‌ل خوه‌یا بكاو بووده‌ سه‌رچه‌وه‌ى هاوردن وزه‌ى تازه‌ ئه‌را خوه‌ى. وه‌ل ئه‌وه‌یشا بایه‌سه‌ ژن مه‌شق له‌بان ئه‌و كاره‌یله‌ بكا ك ده‌سمیه‌ت ده‌ن ئه‌را تواناى فیشتر و هه‌ر له‌وه‌ر ئه‌وه‌یش بایه‌سه‌ رووژانه‌ بكاده‌ى رۆتینیگ ئه‌را دانیشتن وه‌ل خود خوه‌ى، ك یه‌یش ماناى ئه‌وه‌سه‌ گرینگى وه‌ خوه‌ى ده‌ید و روى وه‌ڕوى ئه‌و فشاره‌یله‌ بووده‌و ك رووژانه‌ تیه‌نه‌ تویشى وه‌بى ئه‌وه‌ك بیلید هویچ شوونه‌واریگ خراو له‌بان ده‌روینى بیلیده‌ جى.

 

چۆپى مه‌جید

ج . أ