كلتوور‮ ‬حەڵاڵ و حەرام لە ئه‌قڵ‮ ‬داعش

شفق نيوز

داعش وه‌ گله‌وخواردن و پشتبه‌سانن وه‌ رويداگ و ئه‌زموونه‌يل مێژوويی سه‌رده‌م ده‌سڵات خلافه‌ت، وه‌هه‌مان فكر و نوڕستن و هه‌مان ده‌سڵات و ئه‌قليه‌ت و ره‌فتاره‌و له‌ی سه‌رده‌مه‌ مامڵه‌ وه‌ل ژيان و ئاده‌ميزاد و كومه‌ڵگا و كلتوور و شارستانيه‌ت ئه‌كا.

ده‌سڵات خلافه‌ت و داعش باوه‌ڕ وه‌ ماف ملله‌ته‌يل و كه‌مينه‌يل نه‌يرن و باوه‌ڕيش وه‌ ژيان ئازادانه‌ نه‌يرن و باوه‌ڕ كلتوور و مێژوو ئه‌و ملله‌ت و كه‌مينه‌يله‌ نه‌يرن و هه‌ر له‌وه‌ر ئه‌وه‌يش ئه‌و كلتوور و شوونه‌واره‌يليانه‌ له‌ناو ئه‌وه‌ن.

ده‌وڵه‌ت خلافه‌ت سه‌دان كتاو و به‌رهه‌م ئبن روشد وه‌ وه‌رچه‌و خوه‌يه‌و سزاننه‌، يا ئه‌و به‌رهه‌مه‌‌ ك ئبن حاجب وه‌ل خواجه‌ نه‌سيری تووسی وه‌ ٢٥ ساڵ نويسانن ئه‌نجامی دان، داعش فڕه‌ی دا ناو ئاو دجله‌و هووكاره‌گه‌يشی ئه‌وه‌ بوی ك ئه‌و ده‌سڵات و ئه‌قڵيه‌ته‌ باوه‌ڕ وه‌ ماف وه‌رانوه‌ر و كلتوور وه‌رانوه‌ر نه‌يريد.

دی جياوازی له‌ناونی ئه‌و تاوانه‌يل دويه‌كه‌و ئه‌وه‌ك ئمڕوو داعش ئه‌نجامی ئه‌ياد، ئه‌وه‌سه‌ ك دويه‌كه‌ تاوانه‌يل له‌شوون خوه‌يان شاريانه‌وه‌و له‌هويره‌و بريان، وه‌لی ئمڕوو ناشاريه‌يده‌وه‌و جه‌هان له‌لی ئاگاداره‌ و لايه‌ن و ريكخرياگ ناوده‌وڵه‌تی له‌بانيان ئه‌يه‌نه‌ قسه‌.

ئه‌وه‌ك داعش له‌ی سه‌رده‌مه‌ ئه‌نجامی ئه‌ياد راسييگ چه‌سپياگ ئاشكرا ئه‌كا ك ئه‌ويش دريژه‌وبوين هه‌مان رويداگه‌يل و تاوانه‌يل مێژووييه‌و بايه‌سه‌ ناوه‌نده‌يل رووشنهويری و ئه‌كاديمی و زانستی و كه‌سه‌يل شاره‌زا له‌ بواره‌يل مێژوو وه‌گشت به‌شه‌يليه‌و توێژينه‌وه‌و له‌يه‌كه‌وداين له‌باره‌يه‌و بكه‌ن، وه‌تايبه‌ت ك سه‌رده‌مانيگه‌ خوه‌نه‌وار و رووشنهويری و ئه‌كاديمی و بگر ناوه‌نده‌يل رووشنهويری و ئه‌كاديميه‌يل كورديش وه‌ ئه‌وه‌ تاوانبار ئه‌كه‌ن ك ئه‌قڵ ئه‌رشيفی نه‌يريد و مقه‌يه‌تی له‌ به‌ڵگه‌و شوونه‌واره‌يلی ناكاو گووش وه‌پيان نايه‌يد.

نه‌وڕه‌س ره‌شيد

ج . أ