متمانه‌ و دووسى = ئارامى

شفق نيوز

وخرووشه‌گانى پشت وه‌ دو ڕسته‌ یا جومله‌ به‌سید: من دووسد دیرم .. من متمانه‌ وه‌پید دیرم.. وه‌لى كامیان هوكار  ئه‌واكه‌ى تره‌، دووسداشتن تا متمانه‌؟و كامیان زویتر جوور شعووریگ په‌یا بوود؟ ئایا تو خوه‌ش كه‌سیگ تواید چوینكه‌ متمانه‌ وه‌پى دیرید؟ تا دووسى دیرید و له‌وه‌ر ئه‌و دووسیه‌ متمانه‌ وه‌پى دیرید؟ وه‌لى تو ئه‌گه‌ر دووس كه‌سى داشتوید یا متمانه‌ وه‌پى داشتوید یا وه‌ چه‌واشه‌، له‌ هه‌ردوگ حاڵه‌ته‌گه‌ تو مینه‌ى ئارامى وسه‌قامگیرى كه‌ید له‌ گشت بواره‌یل ژیان چ ماددى بوود چ مه‌عنه‌وى.

له‌ گشت حاڵه‌تیگ ئه‌وه‌ ئه‌رامان دیار ده‌ید ك تو ئه‌گه‌ر ڕاسگوو بوید له‌ دووسداشتن كه‌سیگ، بایه‌ته‌ متمانه‌ وه‌پى داشتوید، و بایه‌ته‌ ئى شعووره‌ قسه‌ى سه‌ر زووان نه‌ود و وه‌شیوه‌یگ كرده‌وه‌یى یا عه‌مه‌لى پراكتیزه‌ى بكه‌ید.

له‌ى باوه‌ته‌ جوانترین وه‌سه‌رهات ك له‌ ئه‌قڵ كوومه‌ڵاتیه‌و په‌یا بویه‌ ئویشید:

ژن و پیاویگ بوى فره‌ دووس یه‌كترى داشتن و ڕه‌فیقایه‌تى قایمیگ له‌ ناوبه‌ینیان بوى، هه‌ر یه‌ك له‌لیان نه‌تویه‌نستیاد ئه‌را سه‌عاتیگیش له‌واكه‌ى تر دویره‌و بكه‌فید، وه‌لى ئى دو كه‌سه‌ هه‌ریه‌ك  له‌لیان خوو و ره‌وشت تایبه‌ت خوه‌ى داشت، ك فره‌ له‌ یه‌كترى جیاواز بوین، چوینكه‌ پیاوه‌گه‌ فره‌ ئارام بوى و قه‌ت تویڕه‌ و سوخت نه‌ویاد و وه‌ چه‌واشه‌ى ئه‌و، ژنه‌گه‌ فره‌ تویڕه‌ و تون هه‌وسه‌ڵه‌ بوى له‌ گشت مه‌وقه‌یگ.

رووژیگ له‌ ڕووژان سه‌فه‌ر ده‌ریاییگ كه‌فته‌ وه‌ریان، و له‌ ناو ده‌ریایگ بى بن چه‌ن ڕووژیگ بردنه‌ سه‌ر و له‌ناكاوا گه‌رده‌لویلان فره‌ قایمیگ هات و وه‌خت بوى كه‌شتیه‌گه‌ ژیرئاو بكه‌ید و مه‌ردم سه‌رنشینیشى بخنكنید، چوینكه‌ واگه‌ى فره‌ تون بوى ئاوه‌گه‌یش شه‌پۆل یا مه‌وج گه‌ورا گه‌ورایگ دیاد، وه‌ شیوه‌یگ ك كه‌شتیه‌گه‌ پڕى بوى له‌ ئاو و مه‌ردمه‌گه‌ى بانیشى سه‌ر له‌لیان شیویا و ترس نیشته‌ گیانیان، و كه‌شتیوانه‌گه‌یش ئه‌وه‌ له‌ مه‌ردمه‌گه‌ نه‌شارده‌و ك شایه‌ت ئى كه‌شتیه‌ ژیرئاو بوود و بخنكیه‌ید، و ئه‌را نه‌جاتیان موعجزه‌یگ خودایى تواید، ژنه‌گه‌یش خوه‌ى وه‌پى نه‌گریا و ده‌س كرده‌ هات و هاوار و نه‌زانستیاد چه‌ بكه‌ید و وه‌ ده‌وده‌وان وه‌ره‌و لاى شویه‌گه‌ى چوى، به‌شكه‌م چاره‌یگ ئه‌راى په‌یا بكه‌ید، و له‌ مه‌رگ قورتارى بكه‌ید.. وه‌ختى ڕه‌سیه‌ لاى شویه‌گه‌ى سه‌رى له‌وه‌ سڕ مه‌ن ك ئى پیاوه‌ هیمان وه‌ ئارامى جاران خوه‌یه‌و مه‌نیه‌سه‌ى، و چمانى هویچ چشتیگ ڕوى نه‌یایه‌، و ئه‌را خوه‌ى له‌ سویكیگ دانیشتیه‌.. وه‌ختى وه‌ى شیوه‌ دیه‌ى، ژنه‌گه‌ زیاتر تویڕه‌ بوى و وه‌وه‌ تومه‌تبار شویه‌گه‌ى كرد ك بى باكه‌ و فره‌ سه‌رد و سسه‌!

پیاوه‌گه‌یش وه‌ ڕوى درژیگ و چه‌ویگ پڕ له‌ قینه‌و  نووڕسته‌ پى، و خنجه‌ره‌گه‌ى له‌ به‌خه‌ڵى ده‌ركرد و ناره‌ى تك دڵ ژنه‌گه‌ى و وه‌ گشت جددى و ڕاسكانییگه‌و وه‌ ده‌نگیگ تیژ  وته‌ پى: تو له‌ى خنجه‌ره‌ ترسیه‌ید تا نه‌؟

ژنه‌گه‌یش ته‌ماشایگى كرد و وته‌ پى: نه‌ نیه‌ترسیه‌م.

ئه‌ویش وته‌ پى: ئه‌را نیه‌ترسیه‌ید؟

ژنه‌گه‌یش جوواوى داو وت: چوینكه‌ مشتگ خنجه‌ره‌گه‌ ها وه‌ ده‌س یه‌كیگه‌و متمانه‌ وه‌پى دیرم و دووسیشى دیرم.

پیاوه‌گه‌ له‌ى ئانه‌ بزگه‌ خه‌نه‌یگ گرده‌ى و وته‌ پى: منیش جوور تو، ئى هه‌مكه‌ مه‌وج و واى تون و تیژه‌ هاوه‌ ده‌س یه‌كیگه‌و متمانه‌ وه‌پى دیرم و دووسى دیرم... ئه‌ى دى ئه‌را ڕخم بچوود و له‌ى گه‌رده‌لویلانه‌ بترسم و خوه‌میش زانم ك گشت چشتى ها وه‌ده‌س خوه‌ى!

 

ماجد سوره‌مێرى