كومه‌ڵگای مه‌ده‌نی چوين دروس ئه‌دێ؟

شفق نيوز

وه‌ڕاسی ئه‌يانه‌ هووكار سه‌ره‌كيين له‌ وه‌ديهاوردن ئه‌و ئامانجه‌يله‌و بوينه‌سه‌ لايه‌نگر جمشته‌يل تازه‌ی كوومه‌ڵايه‌تی و هه‌ر له‌ بنه‌مايشه‌و ئه‌را ئه‌وه‌ سه‌رهه‌ڵدانه‌ تا ئه‌و شوونه‌يل به‌تاڵه‌ پڕه‌و بكه‌ن ك له‌ ده‌وڵه‌ت وجوود ديريد جوور: كيشه‌ی ژنه‌يل، جايه‌ڵ جوانه‌يل، خوه‌ندكاره‌يل، ژينگه‌پاريزه‌يل...هتد.

لای گشت كه‌سيگ ئاشكراس ك هه‌ر كومه‌ڵگايگ ريكخرياگه‌يل كومه‌ڵگای مه‌ده‌نی له‌تی كارا بدێ، ئه‌وه‌ ئه‌دێده‌ ناوه‌نديگ ديموكراسی و سه‌رچه‌وه‌ی وه‌يه‌كه‌وژيان و ئه‌دێده‌ مه‌يدانيگ مه‌شقكاری و په‌روه‌رده‌يی ديموكراسی، ك وه‌راسی كه‌ش وهه‌وای له‌يوايگ دروس ئه‌كا ك تاك له‌تی بتويه‌نيد له‌ گوزاره‌يگ كوڵ ريكخرياگه‌يل ناحكوومی بويشن: ئه‌يه‌ به‌رهه‌م شووڕشه‌يل تازه‌ی كومه‌ڵگای ئنسانيين، چوينكه‌ وه‌ڕاسی ده‌رفه‌ت خوه‌یوه‌ڕيه‌وبردن فيشتر ئه‌يه‌رنه‌ وجوود و بوينه‌سه‌ هووكار كاركردن هاوبه‌ش وه‌شيوه‌يگ خوه‌يبه‌خشكارانه‌ ك له‌و ڕييه‌و هه‌وڵ ئه‌يه‌ن بڕه‌سنه‌ ئامانجه‌يل هاوبه‌ش.

ئه‌تويه‌نيم بويشيم ئی جووره‌ ريكخرياگه‌يله‌ له‌ وڵاته‌يل پيشكه‌فتگ فريه‌ كاراو چالاك كار ئه‌كه‌ن، ئه‌ويش وه‌ چه‌واشه‌ی وڵاته‌يل دوياكه‌فتگ ك ئايديای كومه‌ڵگای مه‌ده‌نی هويچ پايه‌يگ له‌تيان نه‌يريد. دی له‌يرا ئه‌رامان ده‌رئه‌كه‌فيد ك له‌وڵاتيگه‌و ئه‌را وڵاتيگ تر جياوازی هه‌س. ئمجا پرسيار له‌يرا ئه‌وه‌سه‌ ك ئايا ئی ريكخرياگه‌يل له‌ كوردستان تا چه‌نيگ تويه‌نستنه‌ وه‌ هه‌مان په‌يمانه‌يل جه‌هانی كار بكه‌ن و رای گشتی ئاراسته‌ بكه‌ن له‌ بونيادناين كومه‌ڵگايگ ديموكراسی؟

ئه‌را جواو ئی پرسياره‌ بايه‌سه‌ مه‌زه‌نه‌ی كاره‌يليان بكريه‌يد، شايه‌ت له‌ كوردستان سه‌دان ريكخرياگ كومه‌ڵگای مه‌ده‌نی مووڵه‌ت فه‌رمی و مانگانه‌يش بودجه‌ له‌ حكوومه‌ت وه‌ربگرن، ئمجا بريگ له‌و ريكخرياگه‌يله‌ كاره‌يليان دياره‌و بڕيگيش له‌ليان وه‌ چه‌واشه‌وه‌ بودجه‌ وه‌ئه‌گرن و كار خاسيگيش ناكه‌ن. وه‌ڕاسی ئی ريكخرياگه‌يله‌ ئه‌تويه‌نن نه‌خش گرينگ بوينن له‌ چاره‌سه‌ر گرفته‌يل كومه‌ڵايه‌تی و ناوخوه‌يی، وه‌ل ئه‌وه‌يشا ئه‌تويه‌نن له‌ڕی ئاگاداركردن و هوشياركردن و پيشكه‌شكردن زانياری جوراوجووره‌و كاريگه‌ری داشتوون و هاوكاريكردنه‌ له‌ وه‌ريه‌وبردن كيشه‌يل كومه‌لايه‌تی، يه‌يش بيجگه‌ نه‌هيشتن ديارده‌ی گه‌ناته‌كاری و پيشكه‌شكردن خزمه‌تگوزاری كومه‌ڵايه‌تی جوور مقه‌يه‌تيكردن مناڵه‌يل بی سه‌رپه‌رش.

شه‌كر مه‌جيد

ج . أ