ڕاپۆرت: قاعده‌ خوه‌ى ئاماده‌ ئه‌كا ئه‌را "ده‌وڵه‌ت ئسلام"و كووتاییهاوردن وه‌"ده‌سڵات شیعه‌"

شفق نيوز

گشت ناوچه‌گه‌و دیرن، ئاشكراى ئه‌وه‌ كه‌ن و ئویشن: له‌وه‌خت رمیان رژیم سورى ئه‌گه‌ر هیزه‌یل ئۆپۆزسیۆن سورى چه‌ك كیمیاوى بكه‌فیده‌ ده‌سیان، ئه‌وه‌ بیگومان موجاهدینیش توناى ده‌سكه‌فتنى دیرن ئه‌را وه‌كارهاوردنى له‌عراق.

 

باوه‌ڕ ئیچنه‌س ك فره‌یگ له‌ چه‌كداره‌یل ریكخریاگ قاعده‌ هاتنه‌سه‌ ناو رز ئه‌و هیزه‌یل چه‌كداره‌ ك لایه‌نگر حزب به‌عسن له‌سوریا.

 

زویتریش ئه‌یمه‌ن زه‌واهیرى سه‌ركرده‌ى قاعده‌، داوا له‌ چه‌كداره‌یلى كرد بچن وه‌ره‌و شام ئه‌را جه‌نگكردن وه‌ل ئه‌سه‌د، ك وه‌ل ئه‌وه‌یشا رینمایى خودنیشانداینه‌یل گه‌ورایگ  كرد دژ رژیم ده‌سڵاتدار سوریا له‌ شانشین سعودیه‌ له‌وه‌ر رماننى و وت: ئى شووڕشه‌یله‌ بایه‌سه‌ ئسلامى بوود.

 

سوریایش ئه‌را یه‌كه‌مجار دگان وه‌ داشتن  چه‌ك كیمیاوى و بایلۆجى نه‌ید ك وه‌قسه‌ى خوه‌ى شایه‌ت باریده‌ى كار له‌دژ هه‌ر ده‌سوه‌رداینیگ خارجى له‌وڵاته‌گه‌.

 

دیاره‌ یه‌یش یه‌كه‌مجاره‌ سوریا دگان وه‌ داشتن ئه‌و چه‌ك كیمیاویه‌ نه‌یدو دیمه‌شق له‌و ده‌وڵه‌ته‌یل نیه‌ ك ئمزا له‌بان ریككه‌فتن قه‌یه‌غه‌ى چه‌ك كیمیاوى كردن له‌ساڵ 1992.

 

وه‌ل ئه‌وه‌یشا فره‌یگ له‌ وه‌رپرسه‌یل عراقى باس له‌وه‌ كه‌ن ك رمیان ئه‌سه‌د ناوچه‌گه‌ وه‌ره‌و كیشمه‌كیشه‌یل چینایه‌تى دریژ وه‌ختبه‌ر كیشید.

 

عراق مه‌ترسى به‌رزه‌وبوین تونڕه‌وه‌یل ئسلامى دیرید ئه‌را ده‌سڵات له‌وه‌ختیگ ك رژیم علمانى تۆتالیتارى له‌ حوكم دویره‌و خریا ك ئه‌را ماوه‌ى چل ساڵ حوكم كرد.

 

سوریا هه‌میشه‌ تاوانبار قه‌ته‌ر و سعودیه‌و توركیا ئه‌كا وه‌ سه‌خته‌وكردن كیشمه‌یكش چینایه‌تى له‌تى و ئیسه‌یش قاعده‌ باڵیگ ره‌سمى دیرید و ناو خوه‌ى ناگه‌" به‌ره‌ى سه‌ركه‌فتن".

 

دویاى ئه‌وه‌یش ك سوریا ئاشكراى داشتن چه‌ك كیمیاوى كرد، باوه‌ته‌یل  جیهادى فره‌یگ بڵاوه‌و بوى وه‌ بوونه‌ى چوینیه‌تى وه‌كارهاوردن ئه‌و چه‌كه‌یله‌ دژ دوشمنه‌یل و یه‌كیگ له‌وانه‌یش وه‌ ناو"حارس دلێمى" باوه‌تیگ له‌ مونته‌دایگ وه‌ناو" من موسڵمانم" بڵاوه‌و كردگه‌و له‌تى ئویشید من پشتگیر رینمایه‌یل قاعده‌م.

 

له‌هه‌مان وه‌خت وتگه‌: زوورم سه‌ربازه‌یل سوپاى سورى له‌وانه‌ك جیاوه‌ بوین و سوپاى ئازاد دامه‌زرانن یا چینه‌ ناو چه‌كرداره‌یل تر خاوه‌ن ئه‌زموون له‌جه‌نگ جاده‌، ئه‌وانه‌ له‌هویچ جه‌نگیگ به‌شدارى نه‌كردنه‌و دویا جه‌نگ راسكانى سوپاى سورى له‌ ساڵه‌یل هه‌فتاى سه‌ده‌ى وه‌رین بوى.

 

ئاخرین جه‌نگیش ك سه‌ركرده‌یل ئیسه‌یش له‌تى به‌شدار بوین، جه‌نگ ئازادكردن كوه‌یت بوى وه‌رجه‌ بیس ساڵ.

 

حارسى ك له‌ساڵ 2005ه‌و تائیسه‌ سه‌ر وه‌و مونه‌تداسه‌ زیاتر له‌ 1700 باوه‌ت دیرید له‌تى ئویشید: زانیارى فره‌یگ هه‌س له‌بان ئه‌وه‌ك زوورم جیهادكاره‌یل عراقى له‌ سه‌ركرده‌یل جه‌نگ سه‌ربازى دژ به‌شار و مه‌جوسه‌یلن له‌ سوریا.

 

حارسى هه‌میش ئویشید: دویر نیه‌ جیهادكاره‌یل چه‌ك كیمیاوى بارنه‌ كار وه‌ تایبه‌ت ده‌وڵه‌ت عراق ئسلامى.

 

وه‌لى پرسیار ها له‌ورا ك ئایا كه‌ى ئه‌و چه‌ك كیمیاویه‌ له‌ عراق تیه‌ریه‌یده‌ كار؟ چوین؟ له‌ كوورا؟ ئه‌یانه‌یش پرسیاره‌یلیگن بایه‌سه‌ جواویانه‌و به‌یم.

 

بیجگه‌ ئه‌وه‌یش سه‌ركرده‌ى باڵ ناوچه‌یى ریكخریاگ قاعده‌ له‌عراق داوا له‌ گشت جایه‌ڵ جوانه‌یل موسڵمان كرد بچن وه‌ره‌و عراق ئه‌را جه‌نگكردن وه‌ل شیعه‌و حكوومه‌ته‌گه‌ى ك سونى و كورد له‌تى به‌شداره‌.

 

وه‌ل ئه‌وه‌یشا هه‌ڕه‌شه‌ى په‌لامارداین زیاتر كرد دژ ئه‌مریكاو وت: ئى په‌لاماره‌یله‌ ك قاعده‌ى نه‌خشه‌یان ناگه‌ قایمتره‌ له‌ په‌لاماره‌یل زویتر.

 

له‌ى دویاخریشه‌ ئه‌مریكا بڕ 10 ملیۆن دۆلار ته‌رخان كرد ئه‌را هه‌ركه‌سیگ زانیارى له‌باوه‌ت شوون وجوود سه‌ركرده‌ى ریكخریاگ قاعده‌ له‌عراق بزانیدو ناویشى خسته‌ لیست ترۆر.

 

ئاشكرایشه‌ ك ریكخریاگ قاعده‌ له‌عراق سه‌ده‌ها په‌لامار دژ باره‌گایه‌یل حكوومه‌ت و موسڵمانه‌یل شیعه‌و پیاوه‌یل ئاسایش و گشت لایه‌نگره‌یل حكوومه‌ت داگه‌ له‌ڕى سه‌یاره‌یل مینڕیژكریاگ وگرتن و كوشتن وه‌گشت شیوازیگ .

 

له‌ى باوه‌تیشه‌و، له‌یه‌كه‌وده‌ره‌یل سیاسى ئویشن: ریكخریاگ قاعده‌ ئه‌گه‌ر چه‌ك كیمیاوى بكه‌فیده‌ ده‌سى دویر نیه‌ باریده‌ى كار له‌هه‌ر وه‌ختیگ .

 

نویسریاگیگ تر له‌ ماڵپه‌ڕیگ روسى ئویشید: ئه‌و چه‌ك كیمیاویه‌ ئه‌گه‌ر ئسرائیل وه‌پى داغان بكریه‌ید ئاساییه‌و روسیاو چینیش هاوپه‌یمان دیمه‌شقن.

 

ئسرائیلیش زویترباس له‌وه‌ كرد، ك نه‌ك ته‌نیا نگه‌رانه‌ له‌ جیوازبوین چه‌ك كیمیاوی سوری ئه‌را حزبوڵڵا، به‌ڵكوو نگه‌رانه‌ له‌ ریخكریاگه‌یل چه‌ك پیشكه‌فتگ دژه‌ ته‌یاره‌یلیش.

 

كابرایگ تر له‌باسیگى ك"شه‌فه‌ق نیوز"ئاگاى بوى له‌لى، له‌بان ماڵپه‌ڕیگ تونڕه‌و نویساگه‌و ئویشید: ده‌وڵه‌ته‌یل خوه‌رئاوا مه‌ترسى ئه‌وه‌ دیرن ئه‌و چه‌كه‌یله‌ بكه‌فیده‌ ده‌س جیهادكاره‌یل.

 

ئیجا ئویشید: ئه‌وان نه‌ویرستن ك ئاشكراى ته‌قاننه‌وه‌ى پاسه‌ گه‌شتوگوزاریه‌گه‌ى بوڵغاریا بكه‌ن و بویشن پیاوه‌یل قاعده‌ ته‌قاننه‌سه‌ى، یه‌یش له‌ترس ئه‌وه‌ك مه‌ردم ناڕه‌زایى نیشان نه‌ین و روى بكه‌نه‌ جاده‌یلاو له‌هه‌مان وه‌خت ترس خوه‌یان ئاشكرا ناكه‌ن له‌ ره‌سین كیمیاوى ئه‌را قاعده‌، چوینكه‌ ناخوازن ترس بخه‌نه‌ دڵ هاووڵاتیه‌یلیان.

 

له‌ نویساننیگ تر ك بڵاوه‌و كریاگه‌ له‌بان ماڵپه‌ڕیگ لایه‌نگر قاعده‌، ئویشید: به‌شار ئه‌سه‌د سه‌رۆك سورى ئه‌و چه‌كه‌یل كیمیاویه‌ ده‌یده‌ ده‌س خوه‌رئاوا جوور ئه‌وه‌ك موعه‌مه‌ر قه‌زافى سه‌ركرده‌ى وه‌رین لیبى كرده‌ى.

 

ئمجا ئویشید: ده‌وڵه‌ته‌یل خوه‌رئاوا رى ده‌نه‌ به‌شار ك گشت ئۆپۆزسیۆنه‌یل له‌ناو بووه‌ید وه‌ یه‌كجارى وه‌بى ئه‌وه‌ك خوه‌رئاوا ناڕه‌زاى بوود وه‌ له‌ناوبردن هه‌زاران كه‌س له‌ موسڵمانه‌یل جوور ئه‌وه‌ك ڕیدا له‌ناوبردن هه‌زاران موسڵمان له‌ بۆرما.

 

ئشاره‌ت وه‌ یه‌یش كردگه‌ ك كاردانه‌وه‌ى سورى بووده‌ ئاشكراكردن دامه‌زرانن یه‌كێتى هه‌رێمى له‌ناونى ته‌هران وبه‌غداو، دیمه‌شق و به‌یروت وه‌ناو هاوپه‌یمانى" نه‌ورووز".

 

یه‌كیگ تر ئشاره‌ت وه‌ ئه‌وه‌ كردگه‌ ك وه‌كاربردن چه‌ك كیمیاوى له‌عراق ده‌رفه‌ت دروس ئه‌كا ئه‌را دامه‌زرانن "ده‌وڵه‌ت ئسلام"و كووتاییهاوردن ده‌سڵات شیعه‌ له‌ حوكم.

 

له‌ى باوه‌تیشه‌و عه‌لى موسه‌وى راویژكار ره‌ساننكار سه‌رۆك حكوومه‌ت عراقى ئه‌را "شه‌فه‌ق نیوز"وت: ئى قسه‌ومكوڕى قاعده‌ ئاشكراى مكوڕبوین عراقه‌ له‌بان ئه‌وه‌ك قه‌یران له‌تى نیه‌مینیدو ئارامه‌و بوود.

 

وه‌ل ئه‌وه‌یشا وت: ئه‌و تومه‌تباره‌یله‌ هه‌میشه‌ حه‌ز كه‌ن مه‌سه‌له‌گه‌ سه‌خته‌و بكه‌ن و كیشه‌و گرفت دروس بكه‌ن.

 

ج. ا