له‌ یاد كاره‌سات ئه‌نفال

شفق نيوز

 

جوور ئه‌وه‌ك به‌ڵگه‌يل ئاشكرای ئه‌كه‌ن، رژيم به‌عس ك ئمزای به‌يان يانزه‌ی ئازار و ريككه‌فتن كرد وه‌ل كورد له‌ساڵ هه‌فتا، ته‌نيا ئه‌را خه‌ڵه‌تانن كورد بوی، چوينكه‌ ئه‌وانه‌ جوور حزبيگ فاشيست نه‌ته‌وه‌يی هويچ وه‌ختيگ باوه‌ڕ وه‌ چاره‌سه‌ر راسكانی كيشه‌ی كورد نه‌ياشتن و هه‌ر له‌ ناوڕاس ساڵ ١٩٧٥ وه‌ گووره‌ی پلانيگ دانرياگ رژيم به‌غدا كه‌فته‌ ئاماده‌كردن پرووژه‌يگ ئه‌را كپه‌وكردن كورد و جيوازكردن و چووڵكردن كوردستان و جيوازكردن كورد ئه‌را بڕيگ له‌ وڵاته‌يل عه‌ره‌بی و بياوانه‌يل خوارگ عراق.

وه‌لی خه‌ريكبوين حكوومه‌ت عراق وه‌ جه‌نگ ئيران و عراق، ئه‌و موڵه‌ته‌ ئه‌را هه‌ڵنه‌كه‌فت ك ته‌مام هيزه‌يلی ئه‌را جه‌نگ كوردو شووڕشه‌گه‌ی ته‌رخان بكا، هه‌ر له‌وه‌ر ئه‌وه‌يش هه‌ر له‌ سه‌ره‌تای كووتايی جه‌نگ جه‌هانی ئيران و عراق ده‌سكردنه‌ جيوه‌جيكردن پرووسه‌ی ئه‌نفاله‌يل ك له‌ رووژ ١٤/ ٤/ ١٩٨٨ وه‌ فه‌رمی ده‌س وه‌پيكرد، وه‌لی له‌ڕاسی وه‌رجه‌ ئی ريككه‌فتيشه‌ له‌٣ ٣١/ ٧/ ١٩٨٣ په‌لاماريگ دڕندانه‌ هاورده‌ بان بارزانيه‌يل و ٨٠٠٠ له‌ليان ئه‌نفال كرد.

رژيم به‌عس نه‌ف له‌ وسيانه‌وه‌ی جه‌نگ عراق و ئيران وه‌رگرت و ئه‌وه‌ بوی گشت سوپاگه‌ی كلكرده‌ كوردستان ئه‌را جيوه‌جيكردن پرووسه‌ به‌دناوه‌گه‌ی ك جوور ئه‌وه‌ك به‌ڵگه‌يل ئويشن نزيكه‌ی ١٨٢٠٠٠ كورد له‌تی شه‌هيدو بيسه‌روشوون كريا.

له‌ڕاسی ئی جه‌مكوشيه‌ له‌ مێژوو ئنسانيه‌ت ده‌گمه‌ن نيه‌، ديارترين نموونه‌يش هه‌وڵ نازيه‌يل ئه‌ڵمانيا وه‌ سه‌ركردايه‌تی هتله‌ر بوی دژ يه‌هووديه‌يل، ك وه‌ گووره‌ی سه‌رچه‌وه‌يل باوه‌ڕ وه‌پيكرياگ نزيكه‌ی ٦ مليۆن يه‌هوودی له‌تی جه‌مكوش كريا، وه‌لی ملله‌ت ئه‌ڵمانيا هه‌ر وه‌ كه‌ه‌تايی جه‌نگ و له‌ناوچگن هتله‌ر و نازيه‌يل ئه‌وه‌ بوه‌ی ك حكوومه‌ته‌يل يه‌ك له‌شوون يه‌ك شه‌رمه‌زاری خوه‌يان له‌و كرده‌وه‌ی خراوه‌ نه‌شاردنه‌وه‌و داوای وه‌خشين له‌ ملله‌ت يه‌هوودی كردن و ئاماده‌گی خوه‌يان ئه‌را قه‌ره‌بووكردن قوربانيه‌يل نيشاندان و ئه‌و قه‌ره‌بووكردنيشه‌ وه‌ كرده‌وه‌ تا ئمڕوو هه‌ر وه‌رده‌وامه‌.

وه‌لی ئه‌وه‌ك جی سه‌رسوڕمه‌نينه‌ ئه‌را ئيمه‌ی كورد، ك دويای ١١ ساڵ له‌شوون رميان به‌عس هيمان حكوومه‌ت عراقی نه‌ داوای وه‌خشين له‌ ملله‌ت كورد كردگه‌و نه‌ هويچ ئاماده‌گييگ نيشانداگه‌ ئه‌را قه‌ره‌بووكردنه‌وه‌ی قوربانيه‌يل.

ئه‌گه‌ر ئاده‌ميزاد چه‌و له‌و هه‌وڵ په‌رله‌مان به‌غدا بپووشيد ك ئه‌نفال وه‌ جينۆسايد تاريف كرد، ئه‌يه‌ وه‌ ته‌نيا ساڕيژ ئه‌و زه‌خم قورس و ئه‌و خه‌م بی كووتاييه‌ ناكا، هه‌ر له‌وه‌ر ئه‌وه‌يش له‌ی رووژه‌ خه‌مينه‌ داوا له‌ حكوومه‌ت عراق و په‌رله‌مان ئه‌كه‌يم ك وه‌ زويترين وه‌خت داوای وه‌خشين له‌ ملله‌ت كورد بكه‌ن و قه‌ره‌بوو گونجياگيگ ئه‌را خيزان ئه‌نفالكرياگه‌يل ته‌رخان بكه‌ن، ك ئه‌ويش كه‌مترين قه‌ره‌بوو ئه‌و تاوان دژه‌ ئنسانيه‌ته‌سه‌.

سه‌لام عه‌بدوڵڵا

ج . أ