ملله‌تیگ دادگه‌ر و دادگایگ پاك وبیگه‌رد

شفق نيوز

وه‌زیر ناوخوه‌ى سه‌دام حسێن، ئه‌یه‌ نیشانه‌ى پاكى وبیگه‌ردى ئى دادگاسه‌ له‌بان ئه‌و ریڕه‌وه‌ ك ئویشێد" ئه‌وه‌ك له‌هه‌ق ره‌نجیه‌ێد ناخوازم وه‌ ناهه‌قى رازیى بكه‌م".

 

وه‌زیر ناوخوه‌ى له‌ وڵاتیگ چوارده‌ور گیریاگ له‌ده‌یشت و له‌ناو، ك ئى وڵاتیشه‌ هه‌ر له‌جه‌نگ ساڵه‌یل هه‌یشتاى سه‌ده‌ى وه‌رین تاوان فره‌یگ له‌تى ئه‌نجام دریاو دویاى ئه‌وه‌یش بار سه‌خت ئابڵووقه‌ روى له‌لى كرد، دى چوین تویه‌نێد له‌بان په‌ت یاسا ڕێ بكا وه‌بێ غه‌ڵه‌ت و لاداین ده‌ستوورى و له‌ژێر سایه‌ى (قائد زه‌رووره‌) و له‌وه‌رده‌م كامیرایه‌یل ته‌له‌فزیۆن.

 

وه‌لى دادگاى عراقى نووڕسته‌ ئاكامه‌یل پرس وپرسكارى دادگایى و باوه‌ڕ خوه‌ى وه‌ل رێڕه‌و ده‌ستوورا به‌راورد كرد وه‌گشت ئارامییگه‌و، وه‌لى جاده‌ى عراقى هه‌میشه‌ چه‌وه‌ڕێ هه‌واڵ كردیان و وتیان: كه‌ى له‌سێداره‌ دریه‌ن؟ ئه‌را تائیسه‌ مه‌ندنه‌؟ دى بكوشنه‌یان.

 

ئمجا هه‌رچه‌نى دادگا سووز خوه‌ى نیشاندا ئه‌را ملله‌ت له‌و وه‌خته‌یله‌ ك چه‌وڕێ هه‌واڵ خوه‌شى بوین، وه‌لى مه‌یل دادگا ئه‌را دادگه‌رى یا عه‌داڵه‌ت له‌وه‌ زیاتر بوى و فه‌رمان له‌سێداره‌داین ئه‌حمه‌د نه‌یاو بیتاوانى كردو گشت مه‌ردمیش چه‌وه‌ڕێ له‌سێداره‌داینى كردن، وه‌لى دادگاى دادگه‌ر وپاك له‌وه‌خت هه‌ق ته‌ماشاى سووزدارى ناكا، چوینكه‌ هه‌ق ها له‌بان گشت چشتیگه‌و.

 

دادگا تویه‌نستیاد هس مه‌ردم له‌وه‌رچه‌و بگرێد له‌بان هساو ئه‌حمه‌د زیاب ئه‌حمه‌د و یه‌یش جوور هه‌زاران كه‌سه‌یل تر سته‌مدیده‌ له‌ وڵاتیگ ك بڕیار و یاسا له‌تى جیاوازى له‌ناونى خاس و خراو نه‌كردو هه‌ق و ناهه‌ق له‌یه‌كه‌و نه‌كرد.

 

وه‌لى دادگا كاریگه‌رى هه‌قانه‌یگ داشت و له‌وه‌ر ره‌زامه‌نى مه‌ردم ناهه‌ق نه‌وى و مكوڕ بوى له‌بان سه‌روه‌خوه‌یى و پاكى خوه‌ى و گووش نه‌یا حوكم ناڕه‌وا.

 

دادگاى عراقى وه‌ ئازاد كردن وه‌زیر ناوخوه‌ى رژیم وه‌رین ئسبات ئه‌وه‌ كرد ك سه‌ر ئه‌را كاریگه‌رى هویچ لایه‌نیگ ناچه‌منێدو تاوانبار كریاگیگ  وه‌ پۆست وه‌زیر له‌ حوكم سه‌دام دوشمن فره‌یگ له‌ ره‌فیقه‌یل خوه‌ى دیرێدو زیاتر له‌وانه‌ك دوشمنایه‌تى كه‌ن وه‌بوونه‌ى ئه‌وه‌ك ئنتما ئه‌را سه‌دام داشتگه‌، ئمجا ئى دو هێزیشه‌ هه‌وڵ وه‌ره‌و له‌سێداره‌داینى دیان، وه‌لى دادگا قسه‌ى خوه‌ى كرد و ته‌ماشاى سووز ناوه‌رپرسانه‌ نه‌كرد جوور ئه‌وه‌ك حه‌زره‌ت مه‌سیح سڵام خودا له‌لى ئویشێد: چ فایده‌یگ دیرێد ئه‌گه‌ر دارایى دونیا داشتێدو گیان خوه‌د له‌ده‌س داید.

 

ته‌نانه‌ت منیش ئاره‌زوو داشتم گشت دارو ده‌سه‌ى رژیم وه‌رین له‌ سێداره‌ بدریه‌ن هه‌ر له‌ سته‌مكاره‌ گه‌وراگه‌یان تا دویا چایچى له‌ ماڵ كومارى سه‌دام دیكتاتۆر، وه‌لى ئه‌قڵ  جوور ئه‌وه‌ك فرۆید ئویشێد(من به‌رزترم) جوور پیاویگ دادوه‌ر بایه‌د هه‌ق بناسم و مه‌رز خواسته‌یل یاسا له‌وه‌رچه‌و بگرم و بیتاوان تاوانبار نه‌كه‌م و تاوانباریش بیتاوان نه‌كه‌م له‌چوارچیوه‌ى مه‌رز دونیا.

 

ئیمه‌ وه‌ختى نووڕیمنه‌ ئه‌حمه‌د زیاب ئه‌حمه‌د، بایه‌سه‌ جه‌نگ ئیران بخه‌یمنه‌ یاد ك چوین به‌دبه‌ختى هاورده‌ بان ملله‌ت و جووره‌ها تاوان له‌لى كه‌فته‌و، ئمجا ئایا ده‌ور وه‌زیر ناوخوه‌ى له‌سه‌رده‌م جه‌نگه‌یل و ئابڵووقه‌داین وڵاته‌گه‌ چه‌نیگ سه‌خت بوى له‌ سایه‌ى ده‌ستوریگ رێكخریاگ و ده‌سڵاتیگ جیوه‌جیكار و ده‌ور ئیسه‌ى دادگا چوینه‌ له‌ بڕیار و حوكم دادگه‌رانه‌ى ك هویچ مه‌رجیگ له‌ ده‌یشت هه‌ق په‌سه‌ن ناكا. هه‌ر له‌وه‌ر ئه‌وه‌یش دادگا پاك و بیگه‌رده‌.

 

مونیر حه‌داد

ج. ا