هه‌ولێر چله‌گان سه‌ده‌ى وه‌رین و هه‌ولێر سه‌ده‌ى نوو

شفق نيوز

ئه‌وقه‌ره‌ هه‌ژارى و كه‌مده‌سى له‌ ژیان دیمنه‌ وه‌یخاتره‌ ئه‌و گشته‌ پێشكه‌فتنه‌گ له‌ 2011 دوینیم فه‌ره‌ وه‌پیمان خاسه‌ و وه‌پێ دڵخوه‌شیم له‌وه‌ر ئه‌وه‌گ ئیسه‌ هه‌زاران چشت هه‌س ك له‌ چله‌گان و په‌نجاگان ئه‌وانه‌گ لف من بوین نه‌زانستیان چه‌س و نه‌یش هویر له‌لێ كردوین.

وه‌لى ئه‌و جیله‌گ له‌ شوون دروسبوین هه‌رێم كوردستان هاتنه‌سه‌ دونیا و په‌روه‌رده‌ بوینه‌ جوور باوگ و باپیره‌یلیان تیه‌ڵى و ناخوه‌شى له‌ ژیان نه‌كیشانه‌ و وه‌یخاتره‌ ئه‌و پێشكه‌فتنه‌یل ئیسه‌ وه‌لایانه‌و هویچ نیه‌ و وه‌ل پێشكه‌فتنه‌یل وڵاته‌یل ئه‌ورۆپا به‌راوردى كه‌ن.

پیره‌مه‌رده‌گانیش به‌راوردى وه‌ل ساڵه‌یل چله‌گان كه‌ن ك باوگ و باپیره‌یلیان هه‌ر باس گرانى گه‌ورا و گرانیه‌ بویچگه‌گه‌ كردیان و ئه‌وان زیاتر هویر ئاینده‌ یا دویاڕووژ كردیان و هه‌ر وه‌یخاتره‌ هه‌ر ماڵیگ زه‌خیره‌ى خوراكى ساڵیگ ئه‌ڵگردیان و وتیان: ئه‌رزانى و گرانى هاماڵ خود ئایمه‌گه‌. ئیمه‌ چه‌نیگ باس ره‌نج و مه‌ینه‌تى جاران بكه‌یم هه‌ر دویاى نیه‌تیه‌ێ.

جیاوازى و نموونه‌گان فه‌ره‌ فه‌ره‌ن ئه‌گه‌ر بخوازیم باس گشتی بكه‌یم هه‌ر ته‌واو نیه‌ون, ئیمه‌ باس ئه‌و جیاوازیه‌یله‌ كه‌یم ك هانه‌ وه‌رچه‌و و بیلا مه‌ردم خوه‌یان به‌راوردى بكه‌ن.

بیلا له‌ مناڵ كوورپه‌وه‌ ده‌س وه‌پى بكه‌یم:

_جاران ژن له‌ ماڵ خوه‌ى مناڵى په‌یا بویاد و كه‌یوانوویگ ئاوایى یا مه‌حه‌له‌گه‌ مامان بوى و مناڵه‌گه‌ى هاوردیاده‌ دنیا و نه‌ به‌یان ولاده‌ بوى و نه‌ دوكتۆر و نه‌خوه‌شخانه‌.

-ئیسه‌ ژن هه‌ر له‌ وه‌خت دوگیانه‌یى تا وه‌ختیگ مناڵى بوود هاله‌ ژێر چه‌ودیرى دوكتۆر و له‌ نه‌خوه‌شخانه‌ وه‌نه‌شته‌رگه‌رى یا مناڵى په‌یا بوود و تا له‌ داڵگ بوود به‌یان ولاده‌یش ئه‌راى نویسریه‌ێ.

_جاران جنگ مناڵ كوورپه‌ شه‌وییگ و چه‌ن تیكه‌ په‌ڕوو بوى و پێچیانه‌وه‌ى و وه‌زوور بویاده‌ دوو ده‌س.

_ ئیسه‌ مناڵ هه‌ر له‌ داڵگ بوود چه‌ن ده‌س جنگ ئه‌ڕاى سه‌نریه‌ێ و گشت چشتیگ ئه‌راى ئاماده‌س وه‌لى ژنه‌گه‌ تا ماوه‌ى مانگیگیش هه‌ر ناز ئه‌كا بان ماڵ شویه‌گه‌ى.

_ جاران نه‌ پۆدره‌ بوى و نه‌ حه‌فازه‌ و نه‌ شیر هشك و نه‌ مه‌مه‌ى شیشه‌ له‌ جیاتى پۆدره‌ سیاتگ بن قه‌زان وه‌كار هاوردیان و له‌ جیاتى حه‌فازه‌یش چشتیگ وه‌ناو بلوول و چه‌ن تیكه‌ په‌ڕوو وه‌كار هاوردیان. بلوول داریگ جوور قامیش ناو خالى بویه‌ ك شه‌وانه‌ ده‌وره‌گه‌ى وه‌په‌ڕوو گه‌ورایگ پیچیانه‌و وحه‌یاى مناڵه‌گه‌ كردیانه‌ ناو بلووله‌گه‌وه‌ ئه‌را ئه‌وه‌گ وه‌ختى میز كردیاد وه‌ناو بلووله‌گه‌ چیاده‌ خوار و ناو هه‌لورگه‌گه‌ ته‌ڕ نه‌ویاد, ئمجا بلوول كوڕانه‌ و دویاته‌نه‌یش بوى.  بڕێگ مناڵ جموجویل فه‌ره‌ كردیان و بلووله‌گه‌ له‌ شوون خوه‌ى ده‌رچیاد و میزه‌گه‌ ناو جیه‌گه‌ ته‌ڕ كردیاد و مناڵه‌گه‌ خه‌ویه‌و نه‌وردیاد و ده‌س كردیاده‌ گیرستن و داڵگه‌گه‌ى له‌ خه‌وا كردیاد و ئمجا وه‌و مناڵه‌ وتیان بلوول خراوكه‌ر و دویاخر ئى ده‌سه‌واژه‌ له‌ ناو مه‌ردم ره‌واج په‌یا كرد و هه‌ر كوڕ یا دویه‌تیگ چه‌توین و رویدار بویاتاد یا هه‌ر ژنیگ مه‌كرباز بویاتاد وه‌پى وتیان بلوول خراو كه‌ر.

_ ئیسه‌ مناڵ كوورپه‌ پۆدره‌ى بوو خوه‌ش و په‌ڕوو (حه‌فازه‌)یى جووروه‌جوور و شیر هشك و مه‌مه‌ى شیشه‌ و ناز و نعمه‌ته‌یل فه‌ره‌یگ دیرێ.

_جاران مناڵ وه‌ختى له‌ داڵگ بویاد تا چله‌ى نه‌چیاتاد سناو یا مه‌له‌ى نه‌یان و وتیان چله‌گیر بوود  و له‌ شوون چله‌ شووردیانه‌ى و دویاخریش مانگى دوو یا سێ جار سناوى دیان و خاولى ئه‌را هشكه‌و كردن نه‌یاشت و وه‌په‌ڕویگ هشكیه‌و كردیان.

_ ئیسه‌ مناڵ وه‌لاى كه‌مه‌وه‌ ڕووژێ دوو جار شووریه‌ێ و خاولى تایبه‌ت وه‌خوه‌ى دیریێ.

_جاران مناڵ له‌ ناو هه‌لورك خه‌فانیان و له‌ جیاتى دوشه‌ك پویش پاشمه‌نه‌ى دره‌و كردن گه‌نم و جویه‌ یا سوڕناتك نیانه‌ ناو هه‌لوركه‌گه‌, سوڕناتك جووره‌ بنجگیگه‌ ك له‌ تاوسانه‌یل سه‌وز بوود و ئه‌ڕا فه‌ره‌ چشت وه‌كارى بردیان له‌وانه‌یش له‌ ناو هه‌لورگ مناڵ وه‌خاتر نه‌رمیه‌گه‌ى.

_ئیسه‌ خاسترین دوشه‌ك و خاسترین چه‌رچه‌ف و په‌رده‌ ئه‌را مناڵ فه‌راهه‌م كریه‌ێ.

_ جاران گشت نه‌خوه‌شى مناڵه‌یل داڵگه‌یل و كه‌یوانووه‌یل چاره‌سه‌ریان كردیان.

_ئیسه‌ دوكتۆر و نه‌خوه‌شخانه‌یل فه‌ره‌یگ هه‌ن ئه‌را چاره‌سه‌ر كردن نه‌خوه‌شى مناڵه‌یل.

_جاران كوڕ وه‌ختێ بویاده‌ هه‌فت ساڵان هه‌ر شه‌وى دریژیگ له‌ خام چه‌رمگ كردیانه‌ وه‌رى و ئه‌گه‌ر شه‌واڵ كوڵیش ئه‌راى بكردیانه‌ ژیرى وتیان گه‌ورا بویه‌ و شه‌واڵ كردگه‌سه‌پا هه‌ڵبه‌ته‌ دویه‌ت هه‌ر له‌ مناڵیه‌و شه‌واڵ كردیانه‌ پاى.

_ ئیسه‌ مناڵ تا ته‌مه‌نى ره‌سێده‌ هه‌فت ساڵان چه‌ندین مودێل جنگ ئه‌راى سه‌نریه‌ێ.

_جاران به‌ش فه‌ره‌ى مناڵه‌یل پایان په‌تى بوى و ئه‌گه‌ریش كه‌وش بكردیانه‌ پا كه‌وش لاستیك بوى.

_ ئیسه‌ مناڵ هه‌ له‌ مناڵیه‌و كه‌وش جووراوجوور ئه‌ڕاى سینن ونیه‌زانێ پاى په‌تى یانى چه‌.

_جاران مه‌دره‌سه‌ فه‌ره‌ كه‌م بوى و مناڵه‌یل وه‌سوارى چوارپا چیانه‌ ئه‌را مه‌دره‌سه‌.

_ئیسه‌ مناڵه‌یل وه‌ئۆتۆمۆبیل ته‌بریددار نه‌ود ئه‌ڕا خوه‌ندنگا نیه‌چن.

_ جاران مناڵ بڕه‌سیاتاده‌ پۆل شه‌ش خوه‌نستن و نویسانن وه‌خاسى زانستیاد.

_ئیسه‌ مناڵ ڕه‌سێده‌ په‌یمانگا و زانكۆیش نیه‌زانێ وه‌خه‌تیگ ڕه‌ین نامه‌یگ یا عه‌رزه‌ حاڵیگ ئه‌ڕا خوه‌ى بنویسێد.

_ جاران مناڵ له‌وه‌ر چراخ (فانوس) خوه‌نستیاد و فه‌ره‌ خاس بوى.

_ئیسه‌ هه‌ر چوار لاى گڵۆبه‌ و ماموستایش وه‌پویل ئه‌ڕاى تیه‌رنه‌ ماڵ و هه‌ر دوو ساڵ پۆلیگ ته‌واو ئه‌كا ئه‌ویش وه‌ نقه‌نق.

_جاران مه‌لاى ئاوایه‌گان دژ خوه‌نستن مناڵه‌یل له‌ مه‌دره‌سه‌ بوین و وتیان مه‌دره‌سه‌ ده‌رس شه‌یتانى ئه‌یاده‌ مناڵه‌یل و حه‌رامه‌ و مناڵه‌یل هوكاره‌ى ره‌فتاره‌یل خراو بوون.

_ئیسه‌ مناڵ مه‌لاگان چنه‌ مه‌دره‌سه‌ و ده‌رس ره‌حمان خوه‌نن.

_جاران له‌ ئاوایه‌گان كه‌م كه‌س لاف و دوشه‌ك داشت و مه‌ردم نه‌و و جاجم و وه‌ڕ داشتن.

_ئیسه‌ شار و ئاواى جوور یه‌كن و نه‌و و جاجم و وه‌ڕ نه‌مه‌نگه‌ و مه‌ردم گشتى لاف و دوشه‌ك دیرن.

_جاران جفت وه‌ گووشدریژ و قاتر و گا كردیان.

_ئیسه‌ جفت وه‌تراكتۆر كریه‌ێ.

_ جاران دره‌و وه‌ داس كردیان و وه‌رزیر دره‌و كردیاد.

_ئیسه‌ ده‌ڕاسه‌ دره‌و ئه‌كا و ڕووژانه‌ كار 100 وه‌رزیر ئه‌كا.

_جاران جفتیار وه‌سوارى چوارپا چیاده‌ ئه‌ڕا سه‌ر زه‌ویه‌گانى.

_ئیسه‌ وه‌سوارى پیكاب تویوتاى 2010 چوود ئه‌ڕا سه‌ر زه‌ویه‌گه‌ى.

_ جاران وه‌رزیر نان و دوو وه‌ل ئاو كونه‌ خواردیاد.

_ ئیسه‌ وه‌رزیر پڵاو گووشت ئه‌خواد و قاڵب وه‌فر هاله‌وه‌ر ده‌سى.

_جاران چاڵگ بوى ئه‌ڕا ده‌غڵ و دان كوتان.

_ ئیسه‌ ئامێر كاره‌بایى تایبه‌تیگ ئه‌را ئه‌و كاره‌ وه‌كار گیریه‌ێ.

ئمجا بیلا بایمه‌ سه‌ر شار هه‌ولێر و بزانیم چه‌نى جیاوازى دیرێ وه‌ل ده‌یه‌ى چل سه‌ده‌ى گوزه‌یشته‌.

_ جاران هه‌ولێر رویوه‌ر یا مه‌ساحه‌گه‌ى ئه‌وقه‌ره‌ بویچگ بوى ئایم تویه‌نستیاد وه‌پا ئیسه‌ر و ئه‌وسه‌رى بكردیاد و نه‌ ته‌كسى و نه‌ عه‌ره‌بانه‌ له‌تى بوى.

_ئیسه‌ ئه‌را نان سه‌نین وه‌ ئۆتۆمۆبیل چن و بیجگه‌ ئه‌وه‌یش هه‌ولێر هه‌م ته‌كسى و هه‌میش پاس دیرێ و فه‌ره‌ى مه‌ردمیش سه‌یاره‌ى خوه‌یان دیرن.

_جاران نه‌ شه‌قام و نه‌ كویچه‌یل هه‌ولێر قیرتاو نه‌وین.

_ئیسه‌ وه‌ده‌یان بازنه‌ و شه‌قام گه‌ورا و ئاڕازیاگ وه‌دار و گوڵ و گوڵزار و كاره‌با و پیه‌ڵ و ژیرگوزه‌ر (نه‌فه‌ق) و ترافیك لایت هه‌س و گشت شه‌قام و كویچه‌یل قیرتاو كریانه‌ و شوسته‌ و ئاوڕه‌و ئه‌ڕایان دروس كریاس, ئه‌ى چوین ئه‌وه‌ فه‌رق نیه‌ وه‌ل گوزه‌یشته‌یا؟

_ جاران نه‌زانستیایم سه‌فه‌ر و سه‌یران چه‌س و نه‌ ناو ئه‌و هه‌مگه‌ خوراك و خوارده‌مه‌نیه‌ زانستیایم جوور تككه‌ و تككه‌ى مامر و سته‌یك و پیتزا و ئى هه‌مگه‌ گووشته‌ له‌ بازاڕه‌یل نه‌وى.

_ئیسه‌ ڕووژه‌یل جومعه‌ و ڕووژه‌یل پشوو ده‌یشت و ده‌ر پڕ بوود له‌ سه‌یاره‌ و گه‌شتیار و ڕێه‌گان له‌وه‌ر فره‌یى سه‌یاره‌ گیریه‌ن و قه‌ره‌باڵخه‌و بوون، ئه‌و هه‌مگه‌ خوراكه‌ وه‌ل خوه‌یان به‌ن و نیمه‌شه‌و تیه‌نه‌و ئه‌را ماڵ، یه‌ جیاوازى نیه‌ وه‌ل چله‌گان و په‌نجاگان؟

_جاران نه‌ كامیرا دویمن و نه‌یش زانستیایم چوینه‌ و هه‌ر وه‌یخاتره‌ باوگ و باپیره‌یلیمان مردن و ره‌سمیگ له‌ لیان نه‌یریم, ئیسه‌ گه‌ورا و بویچگ هه‌ر یه‌كه‌و كامیرایگ و موبایلیگ هاپى و وینه‌یل ره‌نگاوره‌نگ گرن.

_ جاران دو كوشك له‌ ده‌وروه‌ر شار هه‌ولێر بوین هن دو پیاو ناودار شاره‌گه‌ بوین؛ ئه‌و دو پیاوه‌ خوه‌شه‌ویست مه‌ردم شار هه‌ولێر بوین و پیاوه‌یل زانا و ناوداریگ بوین و ئیسه‌یش ناودار و ناسریاگن یه‌كیگیان ره‌حمه‌تى مه‌لا فه‌ندى و ئه‌وه‌كه‌یش عه‌ته‌ول ئاغا بوى.

_ناو كوشكه‌گه‌گانیان كه‌فتویده‌ ناو فۆكلۆر كوردى و له‌ گورانیه‌یل وه‌خت دره‌و كردن فه‌ره‌ جار ناو ئه‌و كوشكه‌ ئه‌وریا و كوشكه‌گانى فه‌ره‌ گه‌ورا نه‌وین. ئه‌و وه‌خته‌ چه‌مه‌نتو نه‌وى و بان قه‌سره‌گان وه‌شه‌لمَان گیریاوید.

_ ئیسه‌ سه‌دان مه‌لا فه‌ندى تازه‌ى بێ ناوبانگ و تازه‌ ئاشنا بوى وه‌ وشه‌ى دۆنم هه‌س و یه‌ى هه‌مگه‌ زه‌وى ته‌ل به‌ن و سیاج كردنه‌ و كوشكه‌یل و ڤلایه‌یل گه‌ورایگ له‌تیان سازینه‌؛ وه‌تایبه‌ت له‌ بان ته‌په‌ و گرده‌گان و ئه‌و زه‌ویه‌یله‌ ك له‌ چه‌پ و راس شه‌قامه‌ سه‌ره‌كیه‌گان مانه‌ ئه‌وانه‌یش گشتى به‌شه‌و كریانه‌ و ده‌وریان دریاگه‌ تا گه‌شتیاره‌ هه‌ژاره‌گان له‌ناوى نه‌نیشن.

ملله‌ته‌گه‌مان ئى جوور پێشكه‌فتنیگ وه‌ڕاس نیه‌زانێ و مه‌ناى ده‌سه‌ڵاتداره‌یل ئه‌كا و به‌شیگ له‌و مه‌لا فه‌ندیه‌یل تازه‌یشه‌ خاس زانن خوه‌شه‌ویست ملله‌ت نین.

جاران له‌ ناو شار هه‌ولێر مه‌یدانیگ بوى وه‌ناو مه‌یدان خه‌ره‌یل, ئه‌و مه‌یدانه‌ له‌ ژێر بازاڕ نیشتمان بوى و له‌و مه‌یدانه‌ ئه‌سپ و قاتر و خه‌ر و گشت جووره‌یل چوارپا سه‌نیان و فرووشتیان, ئمجا هه‌ر چوارپا فرووشیگ چه‌ن شاگردیگ داشتن ئه‌را سوارى چوارپاگان و تاقیه‌وكردنیان ئه‌را ئه‌وه‌گ بزانن چوارپاگه‌ سواریى خاسه‌ و خاس غار ده‌ێد یا نه‌, ئه‌وسا مه‌ردم سوار وڵاخ بویاد وه‌لى ئمڕوو سه‌یاره‌ى مۆنیكا.

- ئیسه‌یش ده‌یان پیشانگاى گه‌ورا گه‌وراى پڕ له‌ سه‌یاره‌ له‌ هه‌ولێر هه‌س و بازار و كویچه‌ گه‌ورا و بویچگه‌گانیش پڕن له‌ سه‌یاره‌ و كه‌سیش رازى نیه‌ و مه‌ردم له‌ جاران چه‌و ورسگترن.

_جاران كاروه‌ده‌سه‌یل و گه‌ورایه‌یل و ده‌سه‌ڵاتداره‌یل وه‌سوارى وڵاخ هامشوو كردیان و چه‌ن سواریگیش له‌ پشت سه‌ریان رێ كردیان.

- ئیسه‌ كاروه‌ده‌سه‌یل سوار سه‌یاره‌ى زرێپووش بوون و وه‌ختیگ چن ئه‌را جییگ چه‌ن سه‌یاره‌یگ تازه‌یش كه‌فێده‌ شوونیان, خاس یه‌ جیاوازى و پێشكه‌فتن نیه‌.

- جاران مناڵ بویمن ئه‌گه‌ر ته‌یاره‌یگ وه‌ئاسمانه‌و بوینیاتایم, ئه‌وقه‌ره‌ نووڕستیایمه‌ پى تا ملمان ته‌زى و شه‌كه‌ت بویاد و ئه‌ڵاجه‌ویمان هاتیاد ك ئى ئاسنه‌ چوین باڵه‌و گرێ.

-ئیسه‌ ته‌یاره‌خانه‌ى ناوده‌وڵه‌تى دیریم.

-جاران مناڵ بویمن وه‌خه‌ڕگ عه‌ره‌بانه‌ و ئه‌سپاو بازى ئه‌را خوه‌مان دروس كردیایم.

-ئیسه‌ گشت مناڵه‌یل ئه‌سپاو بازیه‌یل فراوان و جوور وه‌جووریگ دیرن و وه‌كۆنترۆڵ كار كه‌ن.

- جاران باوگ و باپیره‌یلمان له‌ مناڵیه‌و خوه‌یان هوكاره‌ كردیان ك له‌ وه‌خت نان خواردن نه‌بایه‌د بڕێگ شوونه‌یل نانه‌گه‌ كوتكوت بكردان و بخه‌نه‌ى بان سفره‌گه‌ له‌وه‌ر ئه‌وه‌گ ئى كاره‌ وه‌گونا زانستیان و نان وه‌هه‌فت په‌ڕه‌ى قورئان له‌ قه‌ڵه‌م دیان, ئه‌وسا مه‌ردم حورمه‌ت و رێز له‌ نان گردیاد و فه‌ره‌ جاریش مه‌ردم وه‌نان قه‌سه‌م خواردیان, ئمجا نان ئه‌و وه‌خته‌یش یا نان جویه‌ بوى یا گه‌نم و جویه‌ ئامیته‌ كردیان و كردیانه‌ى ئارد ئه‌را نان.

-ئیسه‌ ماڵ نیه‌ رووژانه‌ قه‌یرێ نان هشك و ناوك سه‌مون فه‌ره‌ نه‌یه‌ێد و قه‌یرێ خوراك زیاى فه‌ره‌ نه‌یه‌ێد, ئیسه‌ كه‌س هویر له‌ حورمه‌تگردن زاد نیه‌گرێ و یه‌یش نه‌وعیگ له‌ كفر و غروره‌.

- جاران وه‌پا یا وه‌سوراى وڵاخ په‌یام كل كردیان ئه‌را ئیلا و ئه‌ولا.

-ئیسه‌ كه‌س نیه‌ مۆبایلیگ له‌ گیرفانى نه‌ود و هه‌ر وه‌ختیگ دڵى بخوازێ وه‌ل ئه‌وپه‌ڕ دونیا قسه‌ ئه‌كا.

جاران مناڵ بویم له‌ گه‌ڕه‌ك ته‌یراوه‌ براده‌ریگ داشتم قه‌وانیگ داشت, قه‌وانه‌گه‌ زه‌مبه‌ڵه‌كه‌گه‌ى شكیاوید, ئمجا براده‌ره‌گه‌م قه‌وانه‌گه‌ وه‌په‌نجه‌ خڕ دیاد و ده‌نگه‌گه‌ى هاتیاده‌ بان و ئیمه‌یش گووش گردیایم له‌ ده‌نگه‌گه‌ى.

-ئیسه‌ هه‌ر ماڵیگ بگر گشت ئامێره‌یل ده‌نگ و ره‌نگ چ له‌ ماڵ و چ له‌ سه‌یاره‌ دیرن و هه‌ر ماوه‌ى جاریگ چشت تازه‌یگ له‌و ئامێره‌یله‌ تیه‌ێده‌ بازاڕ.

-جاران له‌ هه‌ولێر به‌رزترین باڵه‌خانه‌ دو قات بوى و مناره‌ى چولى به‌رزترین مناره‌ بوى له‌ هه‌ولێر و ماڵه‌گانیش وه‌خشت خام یاخه‌ڕگ دروس كریاوین.

-ئیسه‌ باڵه‌خانه‌ هه‌س 25 قاته‌ و پێشكه‌فتگترین ئامێر هاله‌تیان و سه‌رجه‌م بیناگان وه‌چه‌مه‌نتو و شیش دروس كریه‌ن.

-جاران گشت بازاڕه‌یل هه‌ولێر ئه‌وقه‌ره‌ى ماجدى مۆڵ چشت و غه‌راز له‌تى نه‌وى, باس مۆڵه‌یل تر و چشته‌یل ناویان نیه‌كه‌م، ئیسه‌ له‌ خودا وه‌زیاێ بوود، پویل فه‌ره‌یگ هاده‌س مه‌ردم و مه‌ردم هاله‌ خوه‌شى و ئه‌گه‌ر ئیسه‌ ئه‌و پویله‌یله‌ وه‌خاسى وه‌كارى بارن, كوردستان زیاتر وه‌ره‌و نوا ئه‌چێ و خوه‌شتره‌و ئه‌دێ.

 

حه‌مید ڕه‌شاش