قه‌ره‌قوش له‌ مێژوو-به‌ش یه‌كم

شفق نيوز

وه‌ختیگ ده‌سه‌ڵات وه‌ده‌سیانه‌و بوود و وه‌زور و ناعه‌داڵه‌تی وه‌ل مه‌ردما ره‌فتار بكه‌ن ؛ به‌ڵی ئی كه‌سه‌گ ك له‌ مێژوو نازناوی قه‌ره‌قوش بویه‌ ؛ ناوی ئه‌بو سه‌عید قه‌ره‌قوش كوڕ عه‌بدوا٠٠٠ ئه‌سه‌د ناسریاگ وه‌به‌هائدین و له‌ مه‌ردم ئاسیای بویچگ توركیه‌ی ئمڕوو بویه‌ و هه‌رچه‌ن ناوی نریاگه‌سه‌ هه‌ڵوڕه‌ش وه‌لی خوه‌ی چه‌رمگ پوس بویه‌ و چیه‌سه‌ دمه‌شق لای ئه‌سه‌د دین شیركو مه‌مو سه‌ڵاحدین ئه‌یوبی و جوورجه‌نگاوه‌ریگ چیه‌سه‌ ناو له‌شكره‌گه‌ی ؛ سه‌رچاوه‌یل ئویشن قه‌ره‌قوش له‌ ساڵ ٥٥٨ كوچی وه‌راوه‌ر وه‌ ١١٦٢ز چیه‌سه‌ ناو له‌شكر ئه‌سه‌دی له‌ شام و دایم له‌ مه‌یدان جه‌نگ له‌ نوا بویه‌و ئایم دلێر و نه‌ترسیگ بویه‌ .

له‌شوین مردن ئه‌سه‌ددین شیركو له‌ ساڵ ٥٦٤ كوچی وه‌راوه‌ر‌ وه‌ ١١٦٨ ز له‌ قاهره‌ چیه‌سه‌ ناو ئوردی یا له‌شكه‌ر سه‌ڵاحیه‌ ك سه‌ر وه‌ سوڵتان سه‌ڵاحدین خوه‌ی بویه‌و له‌و له‌شكه‌ره‌ خزمه‌ت كردگه‌ . یه‌كیگ له‌و كه‌سه‌یله‌ بویه‌ ك جی باوه‌ڕ و متمانه‌ی سوڵتان سه‌ڵاحدین بویه‌ و له‌شوین ئه‌وه‌گ سوڵتان ؛ مسر خه‌یگه‌ ژیر ده‌سه‌ڵات خوه‌ی قه‌ره‌قوش كه‌یگه‌ وه‌رپرس كوشك خێزان بنه‌ماڵه‌ی خه‌لیفه‌ی فاتمی له‌ قاهره‌ و فه‌ره‌جاریش وه‌ختی سوڵتان سه‌ڵاحدین له‌ مسر نه‌ویاتاگ و ئه‌را جه‌نگ سه‌لیبیه‌یل بچیاده‌ خارج مسر ناوبریاگ نیاده‌ شوین خوه‌ی .

ئمجا ئه‌و وه‌خته‌ گه‌رمه‌ی جه‌نگ رووژهه‌ڵات ناوڕاس بویه‌ یه‌عنی جهاد ئسلامی له‌ شار قودس .

دلێری قه‌ره‌قوش :

به‌عزی سه‌رچاوه‌یل باس له‌ ئازایه‌تی و دلێری و جوامێری وهه‌میش باس خێرخوازی و خزمه‌تگوزاری قه‌ره‌قوش ئه‌كه‌ن ؛ هه‌رله‌و سه‌رده‌مه‌ قه‌ره‌قوش وه‌ل كه‌سایه‌تییگ ده‌سه‌ڵاتدارله‌ قاهره‌ ڕویه‌ڕوی بوود ك ناسریاگه‌ وه‌ دادوه‌ر ئه‌سعه‌د ئه‌بولمه‌كارم ؛ ئی شه‌خسیه‌ته‌ یه‌كم جار نه‌سرانی بویه‌و دویاخر بویه‌سه‌ موسه‌ڵمان ؛ كارئی شه‌خسیه‌ته‌ سه‌رپه‌ره‌سی كردن دیوانه‌یل مسر بویه‌ ( قازی ئه‌سعه‌د ) كاره‌یل خاس و خێرخوازانه‌ی فه‌ره‌یگ ئه‌نجام داگه‌ ونویساننه‌یل فه‌ره‌یگ له‌شوین خوه‌ی هیشتگه‌سه‌ جی له‌وانه‌یش ژیاننامه‌ی سوڵتان (سه‌ڵاحدین ) و هه‌میش دانه‌ر كتاو( كه‌لیله‌ودمنه‌ ) سه‌ و له‌شوین ئه‌وه‌یش چه‌ن باوه‌تیگ له‌بان قه‌ره‌قوش نویساگه‌.

كاره‌یل قه‌ره‌قوش له‌ مسر:هه‌روه‌و جوره‌گ ئشاره‌ وه‌پی كردیم فه‌ره‌ له‌ سه‌رچاوه‌ مێژوویه‌گان وه‌خاسی ناو ئی پیاوه‌ به‌ن و ژماره‌یگ له‌ چالاكیه‌گانی ك خزمه‌ت ئه‌و سه‌رده‌مه‌ وه‌پی كردگه‌ ودویای ئه‌وه‌یش به‌شیگی بویه‌سه‌ شوینه‌وار ئمڕوو مسر و گشت ئه‌وانه‌ بوینه‌سه‌ به‌شیگ له‌ شارستانیه‌ت جه‌هان ئسلام ؛ له‌و كارانه‌یش ك ئی كه‌سایه‌تیه‌ ئه‌نجامیان داگه‌ ئویشن نه‌خش گه‌ورایگ داشتگه‌ وه‌ل عیسی هه‌كاری ك یه‌كیگ له‌سه‌ركرده‌یل سه‌ڵاحدین ئه‌یوبی بویه‌ ئه‌ویش له‌ پشتگیری كردن سوڵتان سه‌ڵاحدین ئه‌را پوست وه‌زاره‌ت له‌مسر و بیجگه‌ ئه‌وه‌یش تا سوڵتان سه‌ڵاحدین ره‌سیه‌سه‌ گشت ئامانجه‌یل هاوڕێ و هاوخه‌باتی بویه‌ . له‌شوین مردن ( عازد) ئاخرین خه‌لیفه‌ی فاتمی له‌ ساڵ ١١٧١ له‌ شوین سوڵتان سه‌ڵاحدین بویه‌سه‌ یه‌كم كه‌سایه‌تی  مسری و راسیه‌گه‌ی ئه‌وه‌سه‌ ك ئی ساڵه‌ وه‌سه‌ره‌تای دامه‌زراندن ده‌سه‌ڵات ئه‌یوبیه‌گان له‌ مێژووی ئسلام بویه‌ و بنه‌ماڵه‌ی ئه‌یوبیه‌گان نزیكه‌ی ٨١ ساڵ فه‌رمانڕه‌وایه‌تی به‌شیگ فه‌ره‌ی جه‌هان ئسلام كردنه‌ .