شار كووت

شفق نيوز

سه‌قه‌فى دامه‌زرانه‌ى له‌ساڵ(702زایینى)، ئى شاره‌ له‌ساڵ 1915 له‌وه‌خت جه‌نگ جه‌هانى یه‌كه‌م كه‌فتگه‌سه‌ وه‌ر داگیركارى هێزه‌یل داگیركه‌ر عوسمانى و كاولكارى فره‌یگ وه‌خوه‌یه‌و دیه‌.

له‌ساڵه‌یل چل سه‌ده‌ى وه‌رین كه‌فتگه‌سه‌ بان نه‌خشه‌و تا ساڵ 1960 ئى شاره‌ فره‌ دویاكه‌فتگ بویه‌ له‌ڕوى خزمه‌تگوزاریه‌و، وه‌ل ئه‌وه‌یشا چین فره‌یگ له‌ كورده‌یل نیشته‌جى ئى شاره‌ بوینه‌ ك 50% مه‌ردمه‌گه‌ى پێكهاوردنه‌و زوورمیان له‌ناوچه‌ى سه‌ید حسێن نیشته‌جى بوینه‌، سه‌ید حسێن له‌ناوڕاس ساڵه‌یل چل سه‌ده‌ى وه‌رین یه‌كه‌مین ماڵ و خانگ دروس كردگه‌ ك كوردیگ ره‌سه‌نه‌و ئه‌و ناوچه‌یشه‌ كویچه‌یل فره‌یگ داشتگه‌ جوور عگد ئه‌لئه‌كراد و نه‌وكه‌ر نازر و جه‌دیده‌...هتد.

شار كووت له‌ ساڵه‌یل په‌نجا، له‌ژیر ده‌سه‌ڵات ره‌حمه‌تى شێخ محه‌مه‌د ئه‌لئه‌میر و مه‌ردمه‌گه‌ى بویه‌و دووسایه‌تى فره‌یگیش وه‌ل كوردا داشتنه‌ وه‌تایبه‌ت وه‌ل باوگ نه‌ته‌وه‌ى كورد مه‌لا مسه‌فاى بارزانى نه‌مر.

ناوچه‌یل كورده‌وارى له‌ كووت له‌ سه‌ره‌تایه‌یل ساڵ 1940 دامه‌زریانه‌، وه‌ل ئه‌وه‌یشا كورد زوورمینه‌ بوینه‌ له‌و ساڵه‌یله‌، وه‌لى له‌ژیر په‌رده‌ى هووزایه‌تى نه‌وینه‌و هه‌ر له‌وه‌ر ئه‌وه‌یش ده‌سڵاته‌یل عراق خراوى ده‌رهه‌قیان كردنه‌و تا رووژ ئمڕوویش زوڵم له‌لیان كریاگه‌و ناچار بوینه‌ بڕیگ له‌لیان بچنه‌ ناو هووزه‌یل تر عه‌ره‌ب جوور (تائى و به‌نى لام) ك ئه‌ویش له‌ترس ده‌سه‌ڵات سه‌دام و مه‌سه‌له‌ى ده‌ركردنیان بویه‌.

جوور ئه‌وه‌ك باس كردیم كورد له‌ناوچه‌یل كووت شوونه‌یلیان دیارى بوى وه‌ك(عه‌گد ئه‌لئه‌كرادو جدیده‌و نه‌وكه‌ر نازر و شه‌رقیه‌) ك زوورمیان له‌ شوونه‌یل تر هاتوینه‌ ئه‌و ناوچه‌یله‌، وه‌ل ئه‌وه‌یشا له‌وه‌خت رژیم محه‌مه‌د ره‌زا شاى په‌هله‌وى فره‌یگ له‌ كورده‌یل دویره‌و خریان و له‌ترسا ئیران هیشتنه‌جى و هاتنه‌ كووت نیشته‌جى بوین و له‌وانه‌یش بنه‌ماڵه‌ى حسێن عه‌لى قولیخان و ئه‌سفه‌ندیار خان و عه‌لى قولى و بنه‌ماڵه‌یل تر.

ئیسه‌یش هووزه‌یلیگ جوور(هاوورى و به‌ولى و كه‌لكه‌لى و خزڵ و جیروان و باپیران و دوستى و زه‌رگووش و ره‌شنو و قوتبى و ئه‌ركه‌وازى و شوهان و ماسبى و نه‌وكه‌ر نازر و مه‌ڵگشاى)هیمان هه‌ر له‌ كووت وجوود دیرن، ك ئیسه‌یش تویه‌نیم بویشیم  35% مه‌ردم كووت كورده‌و فره‌یش له‌لیان سه‌ر وه‌ حزبه‌یل كوردستانیین جوور پارت دیموكرات كوردستان و یه‌كێتى نیشتمانى كوردستان.

شار كووت مه‌ردمه‌گه‌ى ئاشتیخوازن هه‌ر له‌ زویه‌و، هویچ جیاوازییگ ناكه‌ن له‌ناونى یه‌كترى و په‌یوه‌ندى بته‌ویگ هه‌س له‌ناونى هووز و چینه‌یل و زوورمیان هوپر له‌ ئنسانیه‌ت كردنه‌و چین گه‌ورایگیش له‌ رووشنهویره‌یل له‌تى وجوود داشتنه‌و له‌ڕوى ئنسانیه‌و گشت پیكهاته‌یل مامڵه‌ وه‌ل یه‌كترى كردنه‌و ژیانیش هاوبه‌ش بردنه‌سه‌ سه‌رو كوردیش له‌تى هه‌ر له‌ زویه‌و نیشته‌جى بویه‌.

مالك به‌درى