هووز (ماڵیمان) فه‌یلى

شفق نيوز

ك ناسریا وه‌(شه‌فى به‌یرى). ئمجا بنه‌ڕه‌ت وشه‌ یا كه‌لیمه‌ى (ماڵیمان)نیش له‌ (ماڵ همان)ه‌وه‌ هاتگه‌ ، ك ناوه‌گه‌ چووگه‌وه‌ ئه‌ڕا همان باپیره‌ گه‌ورا. ئه‌ویش له‌وه‌ر ئه‌وه‌ك همان له‌وه‌ختى خوه‌ى وه‌ ژیانه‌وه‌ بویه‌ ناوچه‌یل ژیرده‌س خوه‌ى دابه‌ش كردگه‌ له‌بان هه‌رسێ كوڕه‌گه‌ى (یوسف و مرادوه‌یس و ئه‌لاوه‌یس) ، ئمجا ناوچه‌ى به‌دره‌و شیروان و كنار چه‌م سه‌یمه‌ره‌ كه‌فته‌ به‌ش ئه‌لاوه‌یس ك یه‌یش دو كوڕ داشت وه‌ناو (سڵانویس و قوباد).

له‌شوون ئه‌لاوه‌یس ، سڵانویس كوڕى شوونى گرت و قوباد برایشى كرده‌ یارمه‌تیده‌ر ئه‌را وه‌ڕیه‌وبردن كاروبار ناوچه‌گه‌ . سڵانویس كوڕیگ  داشت وه‌ناو (قه‌مه‌ر) و قوبادیش كوڕیگ  وه‌ناو (قیتاس) ، دى له‌یوا بوى ك قوباد وه‌رجه‌ سڵانویس براى مرد . قیتاس له‌شوون مامه‌ى حوكم گرته‌ده‌س و (قه‌مه‌ر) ئاموزایشى كردن جیگر خوه‌ى ، وه‌لى ته‌ماح له‌یوا كرد روح الله‌ى كوڕ قیتاس ئه‌و ته‌قلیده‌ بشكنیگ  و حوكمه‌گه‌ له‌ده‌س مامه‌ى ده‌ركرد و هه‌وڵ ئه‌وه‌دا خوه‌ى بچه‌سپنیگ  و له‌شوون مردن باوگى وه‌ بڕیاریگ  له‌ حكوومه‌ته‌وه‌ بویه‌ میر ، هه‌ر ئه‌ویش هووكار دروسبوین كیشمه‌كیش ناونى ئاموزایه‌یلى بوى وه‌لیانا.

شه‌نشاى كوڕ قه‌مه‌ر لایه‌نگره‌یل فره‌یگ  له‌ده‌ور خوه‌ى گرده‌و كرد و په‌لامار باره‌گاى روح الله‌ داو ناچارى كرد بهه‌یوایگ  ئه‌را شار حزه‌م ئاباد و له‌ورایش شه‌نشاى له‌دژى وسیا ، ئمجا وه‌ختى روح الله‌ له‌لایه‌ن ده‌وڵه‌ته‌وه‌ نریا وه‌حاكم شه‌نشاى وه‌ یاخى و تاوانبار داناو داواى كووتاییهاتن مه‌سه‌له‌ى شه‌نشاى كرد . ئه‌وه‌ بوى روح الله‌ داوا كریا بچووگ ئه‌را حزه‌م ئاباد و ئه‌مان وه‌پى دریا له‌وه‌ر ئه‌و مه‌سه‌له‌ ، دى شه‌نشاى له‌خوه‌یا خوه‌ى قانجاز كردگه‌ له‌ى مه‌سه‌له‌و هه‌ر خوه‌ى وه‌سه‌ركه‌فتگ  زانست ، وه‌لى ئه‌وه‌ بوى ك والى ده‌سگیرى كرد و خسته‌ى زندان.

روح الله‌ چیه‌وه‌ ئه‌را بان پۆست خوه‌ى ، وه‌لى شه‌نشاى دویاى چه‌ن ساڵیگ  له‌ زندانى تویه‌نست له‌زندان بهه‌یوایگ  و چیه‌وه‌ ئه‌را ماڵ خوه‌ى له‌ناوچه‌ى (كه‌نجه‌) ، ئمجا والى فه‌رمان دا روح الله‌ بگریگه‌ى و بكوشیگه‌ى ، له‌و ماوه‌یشه‌ حكوومه‌ت ناوچه‌ى شیروان داوڕى له‌ئداره‌ى روح الله‌ و داره‌ى ده‌س حاكمیگ  توركى ، له‌و وه‌ختیشه‌ (شه‌فى) براى شه‌نشاى هاتڕا لاى گه‌وراى هووز ڕه‌بیعه‌ له‌ناو عراق و عومرى له‌و وه‌خته‌ نزیكه‌ى 18 ساڵ بوى و له‌خزمه‌ت والى قسه‌ى راس و دروس كرد له‌جیاى قه‌ومه‌یلى تا بووگه‌ نوێنه‌ر ، وه‌لى مه‌سه‌له‌ى هه‌قه‌وكردن براگه‌ى هه‌ر مه‌ند و (شه‌فى) شوون روح الله‌ گرت وه‌بى كیشمه‌كیش وه‌لى وه‌شیوه‌یگ  ناڕاسه‌وخۆ ، له‌شوون ئه‌وه‌یش براژنه‌گه‌ى خوه‌ى خوازى ك ژن شه‌نشاى براى بوى و گشت سه‌رۆك تیره‌یل پیرووزبایى له‌لى كردن ئه‌را ئه‌و كاره‌و په‌یمان هاوكاریكردنى دان ، ته‌نیا میر هووز سوره‌مێرى نه‌وگ ك هاوكاریكردنى ره‌ته‌و كرد و باج ساڵانه‌یش وه‌پى نه‌یان.

هه‌وڵه‌یل شه‌فى هویچ نه‌كرد و زیاتر وه‌زعه‌گه‌ سه‌خته‌و بوى و بڕیار دریا له‌ناو بووریه‌یگ  ، وه‌لى هه‌ر مه‌نده‌وه‌ تا حوكم كه‌ریم خان و مردنیشى وه‌ خنكیان له‌ئاو كه‌رخه‌ كووتایى وه‌پى هات له‌وه‌خت گله‌وخواردنى له‌ خوزستانه‌وه‌ ئه‌را ناوچه‌گه‌ى خوه‌ى و له‌شوون ئه‌ویش حكوومه‌ت زه‌ندى (جه‌لاله‌دین پاشى قه‌یتویلى) دانا جویر حاكم ، ئمجا مه‌ردم ناوچه‌گه‌ جه‌لاله‌دین وه‌دڵیان نه‌وى و (كاكى كوڕ شه‌فى كوڕ قه‌مه‌ر) كریا حاكم له‌ناوچه‌گه‌و دى ماڵیمانه‌یل خوه‌یان ده‌سڵاتدار كاراى ناوچه‌گه‌ بوین تا وه‌خت هاتن حوكم قاجارى ك لوڕستان راسه‌وخۆ كه‌فته‌ ژیر ده‌سڵات ئه‌وان و حوكمه‌گه‌یش جیواز بوى ئه‌را ناوچه‌ى پشتكویه‌.