شووڕش ئه‌یلوول مێژوویگه‌ هه‌رگز له‌هویر ناچید

شفق نيوز

  ئى شووڕشه‌ له‌ 11ى ئه‌یلوول ساڵ 1961 له‌ سه‌ده‌ى گوزه‌یشت ده‌س وه‌پیكرد، وه‌ جووریگ ك سه‌ركردایه‌تى كورد وه‌ سه‌رۆكایه‌تى بارزانى نه‌مر گشت توانیاگ هاورده‌ كار وه‌خاتر سه‌رخستنى و ره‌سین ئه‌را كنار ئاسووده‌یى، ك سه‌ركردایه‌تى دقه‌ت گشت ئه‌و خاڵه‌یله‌ كرد ك په‌یوه‌سن وه‌ شووڕشه‌و له‌ڕوى سیاسى و لۆجیستى و له‌هه‌مان وه‌خت نه‌ف له‌ ئه‌زموونه‌یل جمشت و شووڕشه‌یل جه‌هانى وه‌رگرت.

ئه‌و سه‌ركه‌فتنه‌یل گه‌ورا ك له‌گشت روییگه‌و له‌ساى ئى شووڕشه‌ جیوه‌جى بوى ، ئه‌قڵ دوشمنه‌یل خسته‌ خه‌یاڵ وه‌رجه‌ دووسه‌یل، هه‌ر له‌وه‌ر ئه‌وه‌یش ریز و حورمه‌ت له‌ سه‌ركردایه‌تى شووڕش گرتن.

له‌و شووڕشه‌ مه‌فره‌زه‌یل پێشمه‌رگه‌ په‌لامار سه‌نگه‌ر دوشمنه‌یل دیان له‌ كوردستان و گشت ئه‌و شوونه‌یله‌ له‌ژیر ده‌سیان ئازاد كردیان ك ئه‌وان داگیرى كردیان، ته‌نانه‌ت ده‌رچگه‌یل ئه‌كادیمى سه‌ربازیه‌یلیش سه‌ریان سوڕ مه‌ند له‌وه‌رده‌م ئه‌و هه‌مگه‌ سه‌ركه‌فتنه‌یل پێشمه‌رگه‌.

ئه‌و شووڕشه‌ وه‌ گورجى هه‌وره‌ تریشقه‌ فراوانه‌و بوى، وه‌جووریگ ك مه‌فره‌زه‌ى پێشمه‌رگه‌ له‌ناوچه‌یل كوردستانى جوور خانه‌قین و مه‌نه‌لى و كه‌ركووك په‌یوه‌ندى وه‌پیه‌و كردیان، ته‌نانه‌ت باره‌گاى سه‌ركردایه‌تى له‌ناوچه‌ى بارزان بوى ك قه‌ڵاى ئازادیخواز نه‌ته‌وه‌یى كورد بوى و نزیكه‌ى هه‌زار كیلۆ مه‌تریش دویر بوى له‌ناوچه‌یل خانه‌قین و ده‌وروه‌رى، ئنجا نه‌خش سه‌خت له‌و شووڕشه‌ ئه‌وه‌ بوى ك كادر پیشكه‌فتگ داشت و ته‌نانه‌ت له‌ناو خود به‌غدایش كار كردیان و كرده‌وه‌یل سه‌ختیگیش جیوه‌جى كردیان.

وه‌رجه‌ ده‌س وه‌پیكردن شووڕش، ریككه‌فتنیگ ئه‌نجام دریا له‌ناونى عه‌بدولكه‌ریم قاسم و بارزانى نه‌مر ك له‌ یه‌كێتى سۆڤێت جاران بوى و ئه‌وه‌ بوى بارزانى گله‌و خوارد ئه‌را عراق و ئه‌را كوردستان و دویاى دقه‌تكردن مه‌سه‌له‌گه‌ وه‌ل گشت لایه‌ن و سه‌ركرده‌یل و دویاى ره‌زامه‌نى گشتى، ئه‌وه‌ بوى له‌شوون ماوه‌یگ له‌ 11ى ئه‌یلوول 1961 ئاشكراى ئه‌و شووڕشه‌ كریا.

ئنجا په‌یامنێر رووژنامه‌یل و ئاژانسه‌یل جوراوجوور هه‌واڵ، وه‌تایبه‌ت ئه‌وانه‌ك سه‌ردان سه‌نگه‌ر شیره‌ كوڕه‌یل پێشمه‌رگه‌ كردیان و چه‌ویان كه‌فتیاده‌ بارزانى نه‌مر له‌ ناوچه‌ى بارزان، گشت ئه‌وانه‌ جه‌خت له‌وه‌ كردیان ك بارزانى له‌گشت روییگه‌و گه‌وراترین سه‌ركرده‌یگه‌و جه‌نگاوه‌ره‌یل كوردیش زرنگترین جه‌نگاوه‌ر جه‌هانن.

له‌ سه‌ره‌تاى ده‌س وه‌پیكردن شووڕش شماره‌ى پێشمه‌رگه‌ كه‌م بوى، وه‌لى دویاخر وه‌ل سه‌ركه‌فتن هیز پێشمه‌رگه‌ له‌گشت شوونه‌یل كوردستان جوور مزگانى خوه‌شیگ بوى ئه‌را مه‌ردم كورد و ملله‌تیش دڵنیا بوى له‌ سه‌ركه‌فتن شووڕش، ك ئیسه‌یش ریڕه‌و ئه‌و شووڕشه‌ هه‌ر جیگیره‌ له‌ دڵ ملیۆنه‌ها كورد له‌ده‌یشت و له‌ناو كوردستان.

ئنجا هه‌واڵ سه‌ركه‌فتن پێشمه‌رگه‌ هه‌میشه‌ له‌ ئێزگه‌ى ده‌نگ كوردستانه‌و بڵاو كریا، ك هه‌رچه‌نى حكوومه‌ت شیوایشیو خستیاده‌ بان به‌رنامه‌یلى، وه‌لى رووڵه‌یل ملله‌ت گشت ئه‌و هه‌واڵه‌یله‌ ژنه‌فتیان و ئه‌و ئیزگه‌یشه‌ بویه‌ مایه‌ى دڵخوه‌شى مه‌ردم كورد، هه‌ر له‌وه‌ر ئه‌وه‌یش تویه‌نیم بویشیم دانایى بارزانى نه‌مر ئه‌و شووڕشه‌ ره‌سانه‌ كنار ئاسووده‌یى و دویاخریش بویه‌ ته‌نیا رییگ ئه‌را خه‌بات ملله‌ت كوردستان و له‌ رووژه‌یل ته‌نگ په‌نا وه‌پى بردیان، ك ئیسه‌یش ئه‌وه‌ك له‌ساى سه‌ركردایه‌تى مه‌سعود بارزانى سه‌رۆك هه‌رێم و خه‌باتكاره‌یل ئه‌نجام گرید له‌گشت بواره‌یل هه‌ر له‌ به‌ر ئه‌و شووڕش ئه‌یلوول ئازادیخوازه‌سه‌ و گشت ئى ده‌سكه‌فته‌یل كوردستانیشه‌ له‌ به‌ر ئه‌و شووڕش گه‌وراسه‌.

هه‌زاران سڵام له‌ ملله‌ت كوردستان و سه‌ركرده‌ى دڵسووز و سه‌ر ریز و نه‌وازش چه‌منیم ئه‌را رووح شه‌هیده‌یل كوردستان و خه‌باتكه‌ره‌یل ئه‌و شووڕش گه‌وراو گشت پێشمه‌رگه‌ى كوردستان ك و هه‌زاران سڵام له‌ شووڕش ئه‌یلوول و خه‌باتكه‌ره‌یلى وه‌ بوونه‌ى 52یه‌مین ساڵیادى.

ئسماعیل بانمیلى

ج . أ