كورد فه‌يلی.. ساڵه‌يلگ له‌ دڵته‌نگی و خوسه‌و گومبوين، تاكه‌ی؟

شفق نيوز

دويای ئازادكردن عراقيش و په‌يابوين حوكم شيعه‌يش مافه‌يل كورد فه‌يلی فه‌رامووش كريا له‌وه‌ر ئه‌وه‌گ سه‌ر وه‌ نه‌ته‌وه‌ی كوردن، يه‌يش هه‌چه‌نی شيعه‌مه‌زه‌ون، دی وه‌و حاڵةو مه‌ندن وه‌بی ئاڵشتكاری بار ژيان و گوزرانيان وه‌ره‌و خاستر و تائيسه‌يش كورد فه‌ويلی له‌ دام و ده‌زگايه‌يل ره‌گه‌زنامه‌و عه‌قارات و دادگايه‌يليش وه‌شيوه‌ی خراويگ مامڵه‌ وه‌ليانا ئه‌كريه‌ێد و هيمان تائيسه‌يش ياسايه‌يل و رينمايه‌يل رژيم به‌عس ده‌رهه‌قيان وجوود ديرێد و هيمان بڕيگ له‌و كارمه‌نده‌يل شيعه‌و سنيه‌ مه‌ندنه‌ ك خراوترين تاوانه‌لييگ له‌وه‌رانوه‌ر فه‌يليه‌يل هاورديانه‌ كار له‌و دام و ده‌زگايه‌يله‌و ئه‌و زوره‌ی داعشی فاشيستيه‌ دژايه‌تی كورده‌يل فه‌يلی ئه‌كه‌ن و هه‌ر جوور ته‌به‌عيه‌ی ئيرانی ته‌ماشايان ئه‌كه‌ن.

حزبه‌يل و مه‌رجه‌عه‌يل شيعه‌يش رۆڵ نائنسانی و خراويگ ديرن له‌ وه‌رانوه‌ر كورده‌يل فه‌يلی و ته‌نيا ئه‌را ئامانجه‌يل هه‌ڵوژاردن ئستغلاليان ئه‌كه‌ن و دويای هه‌ڵوژاردن پشت له‌ليان ئه‌كه‌ن و نموونه‌يش ئه‌را ئه‌وه‌ هه‌ڵوژاردنه‌يل دويای رميان رژيم بوی له‌ باره‌ی هه‌ڵويست ئه‌و حزبه‌يله‌ له‌ مه‌سه‌له‌ی كۆتاو ئه‌و حزبه‌يله‌ دژ ئه‌و مافه‌ بوين و گشتيان ريككه‌فتن له‌بان نه‌داين كۆتا وه‌ كورده‌يل فه‌يلی له‌ په‌رله‌مان عراقی!!

له‌ی رووژه‌يليشه‌ دوينيم وه‌گشتی هه‌ڕه‌شه‌ له‌ كورده‌يل ئه‌كريه‌ێد و كورده‌يل فه‌يلی وه‌تايبه‌ت، ئه‌ويش وه‌ وه‌جيهيشتن ماڵ و موڵك و ده‌رچگنيان له‌ عراق جوور پلانيگ ته‌مامكه‌ر ئه‌را كرده‌وه‌ی رژيم به‌عس گوڕوه‌گووڕ. دی وه‌و جووره‌ كورده‌يل فه‌يلی له‌سای حوكم شيعه‌يش مافه‌يل ره‌وای خوه‌يان وه‌رنه‌گرتن و له‌وانه‌يش ره‌گه‌زنامه‌ و هاوردنه‌وه‌ی موڵكه‌يليان و يه‌كسانی له‌ مامڵه‌كردن وه‌لياناو چشته‌يل تر و ته‌نانه‌ت ئاسايش و سه‌قامگيری خاسيگيش نه‌يرن و هس وه‌ هاووڵاتيبوين راسكانييش ناكه‌ن و له‌ تارمايی و فه‌رامووشكردن و دويره‌وخستن و بيبه‌شی ژيه‌ن تائيسه‌يش.

گرينگيداين نه‌مر مه‌لا مسته‌فای بارزانی وه‌ كورده‌يل فه‌يلی

نه‌مر مه‌لا مسته‌فای بارزانی سه‌ركرده‌ی مێژوويی گرنگی فريه‌يگ دا كورده‌يل فه‌يلی و وه‌و جووره‌ ته‌ماشايان نه‌كرد ك سه‌ر وه‌ مه‌زه‌و شيعه‌ن، ئه‌را نموونه‌يش: ره‌حمه‌تی حه‌بيب محه‌مه‌د كه‌ريم سكرتێر وه‌رين پارت ديموكرات كوردستان كانديد كرد ئه‌را پۆست يگر سه‌رۆك كۆمار عراق ئه‌را جيوه‌جيكردن ريككفه‌تن ئادار 1970، وه‌لێ ريژم به‌عس ئه‌و كانديده‌ ره‌ته‌و كرد وه‌ مه‌هانه‌ى ئه‌وه‌گ كورد فه‌يليه‌و له‌ ته‌به‌عيه‌ى ئيرانيه‌.

جى داخه‌ دوياى راپه‌ڕين شه‌عبانيه‌و زاڵبوين شووڕش كورد و بنياتناين هه‌رێم كوردستان، حكومه‌ت هه‌رێم و هويچ حزبيگ كوردستانى كار له‌بان ئه‌و ريڕه‌و دادگه‌رانه‌و ئنسانى و نه‌ته‌وه‌يى و ژياريه‌ نه‌كردن ك بارزانى نه‌مر خه‌بات ئه‌ڕاى كرد و ئه‌و حزب و لايه‌نه‌يله‌ وه‌هويچ شيوه‌يگ گرينگى نه‌يانه‌ پشتگيرى راسكانى و راسگووانه‌ى كورده‌يل فه‌يلى زوڵمليكرياى و دريغيكه‌ر بوين ده‌رهه‌قيان و كيشه‌گه‌يان له‌هويره‌و بريا.

ئمجا ئه‌گه‌ر حكومه‌ت ناوه‌ندى به‌غدا مافه‌يل كورد فه‌يلى پشتگووش خست له‌وه‌ر ئه‌وه‌گ له‌ نه‌ته‌وه‌ى كوردن، ئه‌ى هووكار چه‌ بوى هيز و حزبه‌يل كوردستانى ئى قه‌واره‌ى كورد زوڵمليكرياگه‌ له‌هويره‌و بردن؟

وه‌ل ئه‌وه‌يشا مه‌ينه‌تى ئه‌و خيزانه‌يل كووچ وه‌پيكرياگ فه‌يليه‌ له‌ هوير ناكه‌يم ك تائيسه‌يش له‌ كه‌مپه‌يل ئيران ژيه‌ن له‌ى بار سه‌ختيگ و هويچ كه‌س و لايه‌نيگيش پرسيار له‌ حاڵيان ناكا، ئايا ئه‌وانه‌ له‌ نه‌ته‌وه‌ى كورد نيين؟ كى بزانێد؟ شايه‌ت له‌ نه‌ته‌وه‌ى ديو بوون وه‌ قه‌وڵى بڕيگ له‌ خوتبه‌ده‌ره‌يل شيعه‌!!

م . د . قاسم مه‌نده‌لاوی