كورده‌یل فه‌یلى كوچگ بنه‌ڕه‌ت شووڕش ئه‌یلوولن

شفق نيوز

سه‌رده‌م ملله‌ت كورد وه‌گشتى و مێژوو باشوور كوردستان وه‌تایبه‌ت، ك له‌ 11/9/1961 په‌یا بوى تا رویداین پیلان ناوده‌وڵه‌تى گه‌ورا له‌بان شوڕش و ملله‌ته‌گه‌مان له‌ ئاكام رێككه‌فتن شه‌ش ئادار خیانه‌تكار ساڵ 1975، ئمجا هه‌رچه‌ن كورده‌یل فه‌یلى به‌شیگن له‌ ملله‌ت كورد، وه‌ل ئه‌وه‌یشا نه‌خش گرنگ و گه‌ورایگ داشتن له‌و شوڕشه‌ وه‌ پشتگیرى سیاسى و ئابوورى و رووشنهویرى.

 

كورده‌یل فه‌یلى خاوه‌ن هسیگ نه‌ته‌وه‌یى و نیشتمانیین و رووژیگ له‌ رووژان پشت له‌و ئه‌ركه‌ نه‌كردنه‌ ك هه‌وڵیگ بویه‌ ئه‌را سه‌ركه‌فتن روڵه‌یل هاوڕه‌گه‌زیان وه‌ قوربانى و دارایى و گیان و رووڵه‌یلیان، ك له‌وه‌ر خاتر كوردو كوردستان پێشكه‌شى كردنه‌.

 

له‌ى باوه‌ته‌و، سه‌ركرده‌یل له‌ پارت دیمۆكرات كوردستان وه‌تایبه‌ت ئه‌وه‌ك له‌و شۆڕشه‌ به‌شدارى كردگه‌ ئویشن: كورده‌یل فه‌یلى كوچگ بنه‌ڕه‌ت شۆڕش ئه‌یلوولن و به‌شدارى فره‌یگ له‌تى داشتن ك مێژوو تومارى كردگه‌ له‌بان ئاست دارایى و گیانى، چوینكه‌ شۆڕش ئه‌یلوول له‌وه‌ختیگ ده‌س وه‌پیكرد تواناى دارایى نه‌یاشت له‌ هه‌رێم كوردستان، ئمجا له‌وه‌ر ئه‌وه‌ك كورده‌یل فه‌یلى قورسایى ئاشكرایگ داشتن له‌مه‌یدان بازرگانى له‌ عراق، هه‌ر له‌وه‌ر ئه‌وه‌یش به‌شیگ له‌ خه‌رج شۆڕش گرتنه‌ مل وه‌ گووره‌ى ئه‌ركه‌یلیان ك پشتگیرى خواست لایه‌ن ره‌سانن یا میدیایى شۆڕش كردن له‌ دامه‌زرانن ئێزگه‌ى"ده‌نگ كوردستان" ك زووانحاڵ شۆڕش بوى له‌ناوچه‌ى"گرده‌ ڕه‌ش"، ئى ئێزگه‌ هه‌واڵه‌یل سه‌ركه‌فتن پێشمه‌رگه‌ بڵاوه‌و كردیاد بیجگه‌ رویوه‌ڕوى بوین ره‌سانن ده‌سڵات دوشمنه‌یل . له‌بان ئاست گیانییش هه‌زاران له‌ ڕووڵه‌یل جایه‌ڵ جوان كورد فه‌یلى واز له‌ كار و خوه‌ندن خوه‌یان هاوردن و روى كردنه‌ جه‌وه‌ڵه‌یل كوردستان ئه‌را وه‌رگریكردن له‌ خاك و ناسنامه‌، ئمجا بڕیگ  له‌و كه‌سایه‌تیه‌یل به‌رز ئى  پێكهاته‌ ك روى كردنه‌ كویه‌یل كوردستان پێكهات له‌ كه‌سایه‌تیه‌یل به‌رز جوور: حه‌بیب محه‌مه‌د كه‌ریم سكرتێر گشتى پارت دیمۆكرات كوردستان و حسێن فه‌یلى ئه‌ندام مه‌كته‌ب سیاسى پارت دیمۆكرات و یه‌دوڵڵا كه‌ریم سه‌رۆك یه‌كێتى جوانه‌یل كوردستان و عادل موراد سه‌رۆك یه‌كێتى قوتابیه‌یل كوردستان و زه‌كیه‌ ئسماعیل حه‌قى سه‌رۆك یه‌كێتى ژنه‌یل كوردستان و قه‌مه‌رناز ك یه‌كه‌مین ژن كورد فه‌یلیه‌ له‌ شۆڕش ئه‌یلوول چه‌ك گرته‌ ده‌س ك بیجگه‌ ئه‌وه‌ك چه‌ك وه‌ده‌سیه‌و بوى له‌هه‌مان وه‌خت په‌رسداریش بوى و چاره‌سه‌ر نه‌خوه‌ش و زه‌خمداره‌یل كردیاد له‌ هێز پێشمه‌رگه‌ وه‌ تایبه‌ت و ژن و مناڵه‌یلیش وه‌گشتى، یه‌یش بیجگه‌ كه‌سایه‌تیه‌یل تر له‌ى پێكهاته‌ ك وه‌ل ئه‌وه‌یشا خوین رووڵه‌یل فره‌یگیانیش له‌بان خاك كوردستان رشیاو خوه‌یان كردنه‌ قوربانى له‌وه‌ر خاتر بنیاتناین ئاینده‌یگ پڕ له‌ دادگه‌رى كوومه‌ڵایه‌تى و یه‌كسانى.

 

ئمڕوویش كورده‌یل فه‌یلى وه‌رده‌وامن له‌بان ئه‌و سه‌ره‌تاى خه‌بات و قوربانیداینه‌ ئه‌گه‌ر بزانن ك مه‌ترسییگ هه‌س له‌بان ئه‌زموون دیمۆكراسى یا رێڕه‌ویگ  وه‌ره‌و دیكتاتۆریه‌ت تازه‌ و گله‌وخواردن ئه‌را وه‌رجه‌ 2003 له‌عراق، ئه‌وان بوونه‌ یه‌كه‌مین كه‌س له‌ ڕویوه‌ڕوى بوینه‌وه‌ى گشت كرده‌وه‌یگ دژ وه‌ كوردو كوردستان و شۆڕشیگ تر جوور شۆڕش ئه‌یلوول وه‌رپا ئه‌كه‌ن ئه‌را مقه‌یه‌تیكردن له‌ ده‌سكه‌فته‌یل.

 

وه‌ل ئه‌وه‌یشا شماره‌یگ له‌ ملله‌ته‌یل جه‌هان و رێكخریاگه‌یل ناوده‌وڵه‌تى و حزبه‌یل سیاسییش لایه‌نگر  شۆڕش ئه‌یلوولن ك باوه‌ڕ وه‌ ئازادى ئاده‌میزاد و هه‌ق بڕیار چاره‌نویس ملله‌ته‌یل دیرێد، چوینكه‌ له‌ به‌رنامه‌ى ئى شۆڕشه‌ ئه‌وه‌ بوى ك دگان وه‌ هه‌ق نه‌ته‌وه‌و دین و مه‌زه‌وه‌یل بنریه‌ید، ك وه‌ل ئه‌وه‌یشا دروشم" دیمۆكراسى ئه‌را عراق و خود موختارى ئه‌را كوردستان" به‌رزه‌و كردو هه‌ر له‌وه‌ر ئه‌وه‌یش بویه‌ ماوایگ ئه‌را ئه‌و عراقیه‌یله‌ ك زوڵم و سته‌م له‌لیان كریا له‌لایه‌ن رژیم سته‌مكار.

 

بیجگه‌ ئه‌وه‌یش مه‌یدانیگ بوى ئه‌را چالاكیه‌یل جووراوجوور جمشت نیشتمانى خه‌باتكه‌ر له‌عراق و بویه‌ ناوه‌ندیگ ئه‌را ئازادیخوازى گشت رووڵه‌یل كوردستان و عراقیه‌یل. ئمجا ئه‌وه‌ك ئمڕوو كورد له‌سایه‌ى به‌خته‌وه‌ره‌ ئه‌ویش له‌ئاكام ئه‌و ده‌سكه‌فته‌یل هه‌رێم كوردستانه‌سه‌ جوور په‌ره‌سه‌ندن و پێشكه‌فتن له‌ گشت بواره‌یل ژیان له‌ساى هێز سه‌ركردایه‌تیه‌ مێژووییه‌گه‌ى و ئازایه‌تى و قوربانى ملله‌ته‌گه‌ى وه‌تایبه‌ت كورده‌یل فه‌یلى ك خه‌بات وه‌رده‌وامیگ داشتن و قوربانیه‌یل فره‌یگ دان له‌ خودبه‌خشه‌یل ك هه‌میشه‌ گیان ئه‌را كورد و كوردستان دانه‌.

 

محه‌مه‌د عه‌لى سه‌ماوى

ج. ا