ئاينده‌ى ده‌وڵه‌ت له‌ عراق

شفق نيوز

ئى ده‌وڵه‌ته‌ هه‌ر له‌ سه‌رتاى دامه‌زراننى و له‌گشت قوناغه‌يل رووژگارى خواست تونڕه‌وه‌يل نه‌ته‌وه‌يى له‌ژير په‌رده‌ى نيشتمانى شارده‌وه‌و وه‌ شيواز چه‌فتيگ مامڵه‌ وه‌ل كيشه‌يل ره‌وا كرد و عاباى سيه‌و چه‌واشه‌كارى و خه‌ڵه‌تانن له‌وه‌ر كرد و شكه‌ست هاورد له‌ ساده‌ترين ئه‌ركه‌يلى و خنكيا له‌ناو رسوايى له‌ زوورم قوناغه‌يلى، چوينكه‌ ريڕه‌و ئستغلال كيشه‌يل گرته‌وه‌ر وه‌خاتر دروسكرن قه‌يران و وه‌رده‌وامى له‌ ئداره‌كردنى، ئه‌ويش وه‌ شيوه‌يگ ك بگونجيه‌ێد وه‌ل به‌رژه‌وه‌ندى فه‌رمانڕه‌وايه‌يل و ده‌سكه‌فت خه‌يرات ئه‌رايان ئاسانه‌و بكاو هه‌ر وه‌و خاتريشه‌ ئايين و نيشنمانيه‌ت و دروشمه‌يل نيازپاكى و وه‌فادارى وه‌ جووريگ هاورده‌ كار تا بتويه‌نێد زاڵ بدێده‌ بان گرفته‌يل له‌ڕى فه‌ن وفێله‌يل دوشمنكارانه‌ى.

گشت ئه‌وانه‌گ زاڵ بوينه‌ بان گه‌ردن ده‌وڵه‌ت له‌ عراق هه‌ر له‌ سه‌ره‌تاى دامه‌زراننى تا رووژ ئمڕوو پشت وه‌ ئايدۆلۆجياى فاشيزم نه‌ته‌وه‌يى يا تايفى و مه‌زه‌وى قويليگ به‌سان و گشتيانيش خنكيان له‌ناو سته‌مكارى و گه‌ناته‌كارى و دوير بوين له‌ سفه‌ته‌يل خاس و رووشنهويرى و گوزاره‌يل خاس نيشتمانى و هه‌ر له‌وه‌ر ئه‌وه‌يش وه‌ل كورد وه‌ رووحيه‌تيگ به‌رزتر مامڵه‌ كرديان و حاشا له‌ مافه‌يليان كردن و مه‌ينه‌تى هاوردنه‌ تويشيان و دوشمانكارانه‌ مامڵه‌ وه‌ليانا كرديان و چه‌ك له‌وه‌رانوه‌ريان هاوردنه‌ كار له‌وه‌ختيگ ك هيزدار بوياتان و هه‌ر وه‌ختيگيش كزه‌و بوياتان داواى دانيشتن و ريككه‌فتن كرديان وه‌گشت شيوازيگ وه‌بى ئه‌وه‌گ سياسه‌ت و ريڕه‌و خوه‌يان ئاڵشت بكه‌ن.

له‌ى وڵاته‌ ك هه‌رچه‌نى باس له‌ شارستانيه‌ت و پيشكه‌فتن و نيشتمانى و سه‌روه‌رى ئه‌كريه‌ێد وه‌ل هه‌وڵ ئه‌وانه‌گ وه‌ل شه‌پۆل فكرى و ئنسانى ده‌ركه‌فتن له‌ناونى حزبه‌يل و هه‌وڵه‌يليان ئه‌را لاوردن كيشمه‌كيشه‌يل نه‌ته‌وه‌يى و مه‌زه‌وى و كاركردن له‌ژير چه‌تر دياريكردن ناو ده‌وڵه‌ت و هه‌يبه‌تى جوور ئه‌وه‌گ له‌شوون شووڕش ته‌مووز 1958 و له‌شوون ريككه‌فتن ئادار 1970 ناونى كورد و به‌عس روێدا، وه‌لێ گشت ئه‌و هه‌وڵه‌يله‌ شكه‌ست هاورد، چوينكه‌ گفت له‌ى عراقى وه‌رده‌وام ئاماژه‌ وه‌ ره‌گه‌زپه‌رسى و سته‌مكارى و دروسكردن خوسه‌و كينه‌ت له‌ناونى پيكهاته‌يل كردياد وه‌گشت شيوازه‌يل خراويگ تا ره‌سيه‌ مه‌سه‌له‌ى له‌ده‌سداين ئنتما ك ريڕه‌و راسكانى خوه‌ى نه‌گرت و هويچ يه‌كسانى و ئنساف و دادگه‌رييگ وجوود نه‌ياشت بيجگه‌ نگه‌رانى و مه‌ينه‌تى و تاڵانكردن خێر وبه‌ير وڵاته‌گه‌.

گشت ئه‌و روێداگ و كرده‌وه‌يله‌ له‌يوا كرد تاك عراقى له‌يوا ئحساس بكا ك مقه‌يه‌تى له‌ ماف و كه‌رامه‌تى ناكريه‌ێدد و سته‌مكاره‌يل گشت ياسايگ ژيرپا خستن، ئيسه‌يش ك شيوازيگ تر هه‌س له‌ مامڵه‌كردنيان و دوياى نزيكه‌ى وه‌سه‌رچكن نزيكه‌ى سه‌د ساڵ له‌بان هه‌وڵ دامه‌زرانن ده‌وڵه‌ت، وه‌لێ نوڕێد هيمان ئى وڵاته‌ له‌ بار نازگيگ ژيه‌ێد و بار سياسى له‌تى ناسه‌قامگيره‌ له‌ گشت وه‌خته‌يليگ فيشتر و گه‌ناته‌كارى له‌تى وه‌رده‌وامه‌ وه‌شيوه‌يگ فيشتر له‌ هه‌ر گه‌ناته‌كارييگ له‌ جه‌هان و سه‌دان مليار له‌ خه‌زينه‌ى دزرياگه‌و زوورم خزمه‌تگوزارييگ له‌تى گومه‌و بيكارى له‌تى فريه‌و حاڵه‌ت كه‌مده‌سى ها فراوانبوين و ده‌سڵاته‌يليش ناتويه‌نن زه‌مانه‌ت ئازادى هاووڵاتيه‌يل بكه‌ن و هه‌ر وه‌و خاتريشه‌ عراق كه‌فته‌سه‌ ئه‌گه‌ر ومه‌گه‌ر فراوانيگ و روێداگه‌يل ئه‌وه‌ نيشان ئه‌يه‌ن ك كۆنترۆڵكردن ئى وڵاته‌ سه‌خته‌و هه‌ر له‌وه‌ر ئه‌وه‌يش ئه‌تويه‌نيم بويشيم ئاينده‌ى ده‌وڵه‌ت له‌ عراق روى وه‌ره‌و حاڵه‌ت ناده‌وڵه‌تى ئه‌كا.

سوبحى ساڵه‌يى