سيمفۆنيای نه‌مری.. ك بدێده‌ كورديگ فه‌يلی

شفق نيوز

وه‌لێ هه‌نای مه‌سه‌له‌گه‌مان ده‌سكرده‌ گوزاره‌كردن فه‌يلی، ئه‌وه‌سه‌ ك كورد ناتونڕه‌وه‌، شيعه‌ی بيلايه‌نه‌، دڵسووز نا په‌يوه‌سه‌، ته‌نياسه‌و واز له‌كه‌س نايه‌رێد، كويه‌ی خه‌مه‌ وه‌لێ كه‌س خه‌مين ناكا، شايه‌ت سفه‌ت خراو بياشتود وه‌لێ هه‌ق كه‌س ناخواد.

ده‌رئه‌نجاميش خاوه‌ن ئی وژدان ئنسانييه‌ دوينيمنه‌ی جاريگ ته‌نياس له‌ وڕته‌گه‌ی(كوردستان)، وه‌لێ مه‌رجه‌ له‌بانی ئسپات كوردبوين خوه‌ی ئه‌را ئاسايش بكاو ئسپات فه‌يليه‌ت خوه‌ی ئه‌را وه‌رپرسيگ توركمانی له‌ تاپوو بكا ئه‌گه‌ر مه‌يل تاپووكردنيگ داشت و جارجاريگيش دوير ئه‌گرێد له‌ بيگانه‌ ئه‌را ئسپاتكردن عراقيه‌ت خوه‌ی له‌ به‌غدا له‌ ده‌زگای ره‌گه‌زنامه‌، چوينكه‌ گشت كه‌سيگ هه‌وڵ وه‌ده‌سهاوردن كتاو لايه‌نگری ئه‌يه‌ن.

كيشه‌ی فه‌يليه‌يل جوور نيمچه‌ زه‌ردينه‌يگه‌ له‌ناو خايگ، ك ئه‌گه‌ر تووكه‌گه‌ی وه‌ ده‌سيگ ده‌ره‌كیه‌ پاك نه‌كريه‌ێد(غوربه‌ت)ژيانی فه‌نا ئه‌دێ، وه‌لێ خا ئه‌گه‌ر وه‌ده‌س ناوه‌كی(نيشتمان)تووكه‌و گيريا ئه‌وه‌ ئاسوو ژيانی زينگه‌و ئه‌دێ.

مه‌ردمان فريه‌يگ وه‌ كينه‌ته‌و باسمان ئه‌كه‌ن يا حوكم له‌بان هه‌ڵكه‌فتمان ئه‌كه‌ن، ئه‌وانه‌ هه‌ر خوه‌يان دوينن و ته‌شبيهيان وه‌ ئيمه‌ ئه‌كه‌ن و باوه‌ڕيان ئه‌وه‌سه‌ ك دونيا شوونيگ تيه‌ريك و چه‌ود له‌تی به‌سياگه‌ له‌ناوڕاس نويريگ ك رووشنيايی ئه‌ياده‌ ژيانمان.

ئه‌گه‌ريش گشت چشتيگ زفت كردن و ئه‌گه‌ر پشتگووشمان خستن و فه‌رامووشمان كردن و هويچ هساويگ ئه‌رامان نه‌كردن، ئه‌وه‌ ئيمه‌ شوون ئه‌را گشتلايگ سازيم و ئازايه‌تی ديرێم ك ناوه‌ڕووكه‌گه‌ی ئيمانداريه‌ وه‌ كيشه‌گه‌مان، ئمجا ئه‌وانه‌ داخداريگ له‌بانيان و ئه‌وانه‌ غافڵن له‌وه‌گ رووحمان ئازاده‌و ئاشقه‌ ئه‌را ناسنامه‌گه‌مان، ك يه‌يش هووكاره‌ ئه‌را ئه‌وه‌گ هه‌زاران جار وه‌ ئاسانی كوشيه‌يم و دوياخريش ئه‌يه‌يمنه‌ دونيا، ئمجا لناو لاشه‌مان نه‌ك ته‌نيا هه‌ر گووشت وجوود ديرێد، به‌ڵكوو ديد وهوێر وڕايش وجوود ديرێد ك يه‌يش دژ خوسه‌و كينه‌ته‌.

عه‌لی حسێن فه‌يلی