نه‌خش ستراتیجى په‌یوه‌ندیه‌یل ده‌یشت له‌ سه‌ندیكاى ڕووژنامه‌نویسه‌یل عراقى

شفق نيوز

هه‌وڵ وته‌قلاى دبلۆماسى ئامانجه‌یل گه‌وراو به‌رژه‌وه‌ندیه‌یل باڵاى ده‌وڵه‌ت جى وه‌جى ناكاو بایه‌سه‌ ڕیگه‌یگ  خاستر بگریه‌یگه‌ وه‌ر ئه‌را ته‌واوكردن ئه‌و ئامانجه‌یله‌و ناوى نان دبلۆماسى مللى یا هیز نازگ. بیگومان وڵاته‌یل یه‌كگرتگ  ئه‌مریكا په‌یڕه‌و ئى جووره‌ سیاسه‌ته‌ كردن و ته‌نانه‌ت به‌عزیگ  له‌ وڵاته‌یل كۆمنیست شیوعى ك ناسریانه‌ وه‌ كه‌ناڵه‌یل بى جموجویل ره‌سمى.

وه‌زع ئیسه‌ى عراق و ئه‌و گرفت و ناكووكى و ده‌خاڵه‌تكردن هه‌رێمى و ده‌ره‌كیه‌یله‌، ئه‌وه‌ ئه‌ڕامان ئاشكرا ئه‌كا، ك په‌یوه‌ندیه‌یل عراقى و پرووسه‌ى سیاسى وه‌ جه‌وه‌ڵیگ  له‌ وه‌فر پیچیاگه‌و ئى جه‌وه‌ڵیشه‌ شكه‌ست وه‌ كه‌ناڵه‌یل ره‌سمى سیاسى و دبلۆماسى هاوردو نه‌یشت بتاویه‌یگه‌وه‌، ك هه‌رچه‌نى هه‌ڵویسته‌گه‌ گه‌رم بوى و روى وه‌ڕوى بوینه‌وه‌ى گه‌ورا هاته‌ تویش وڵاته‌گه‌و ملیاره‌ها دۆلار وه‌تاڵان چى له‌وه‌رخاتر خاسه‌وكردن سیماو روخسار عراق له‌چوارچیوه‌ى عه‌ره‌بى مللى و ره‌سمى، وه‌لى كه‌سه‌یل تر له‌ عراقیه‌یل تائیسه‌یش هس وه‌ مه‌ترسى گه‌ورا كه‌ن، ئه‌ویش وه‌گووره‌ى یادگاریه‌یل گوزه‌یشت و ڕویداگه‌یل تاریخى و مه‌زه‌وى دویر له‌ڕاسى و كه‌سه‌یلیگ  هه‌ن بف له‌ خوڵه‌كوو كه‌ن و ئاگر گه‌رم كه‌ن له‌ناونى عراق و مه‌سه‌له‌ى عه‌ره‌بى و ئسلامى. ك چاره‌سه‌ر ئى كاریشه‌ كه‌فته‌سه‌ لاى سه‌ركرده‌یل خاوه‌ن ڕاى و كوومه‌ڵگاى مه‌ده‌نى وه‌ گووره‌ى ستراتیجیه‌تیگ  دراسه‌تكریاگ ك به‌شدارى جموجویل ریكخریاگه‌یل عراقى بكاو له‌وه‌رجه‌ گشتیانیش ڕووژنامه‌نویس و هونه‌رمه‌ند و پاریزه‌ره‌یل و گرووپه‌یل تر له‌وه‌ر خاتر ده‌سوه‌پیكردن جموجویلكردن كارا یا فه‌عالیگ  وه‌ لایه‌نه‌یل هاوشیوه‌ى خوه‌ى له‌وڵاته‌یل عه‌ره‌بى و ئسلامى و جه‌هان تر له‌وه‌ر خاتر سازداین گفتوگوو راسه‌وخۆ ئه‌را بنیاتناین پیه‌ڵ له‌یه‌كه‌وڕه‌سین له‌ناونى ملله‌ت عراق و ئه‌و ملله‌ته‌یله‌ تا بتویه‌نیگ  ژینگه‌یگ  بنه‌ڕه‌تى دروس بكا له‌ڕاى هاوبه‌ش و هاوكار بووگ ئه‌را باوه‌ڕكردن وه‌ حكوومه‌ته‌یل تا واقعه‌گه‌ قه‌بوول بكه‌ن له‌وه‌ر خاتر هاوردنه‌وه‌ى په‌یوه‌ندیه‌یل و خاسه‌وكردنى له‌عراق.

ئى مه‌سه‌له‌ له‌ دروسكردن سیماى تازه‌یگ  ئه‌را عراق و عراقیه‌یله‌وه‌ ده‌س وه‌پى ئه‌كا ئه‌را ئه‌و ملله‌ته‌یله‌و له‌هه‌مان وه‌خت له‌ڕى هووكاره‌یل ره‌سانن یا ئعلام و گرووپه‌یل سه‌ندیكا یا نقابى و پیشه‌ییه‌وه‌ جى وه‌جى كریه‌یگ، وه‌ى جووریشه‌ ئه‌و ریكخریاگه‌یله‌ تویه‌نن زیاتر بانه‌ مه‌یدان و جوانتر نه‌خش یا ده‌ور خوه‌یان نیشان بیه‌ن و خاستر له‌ سه‌فاره‌ته‌یل ته‌قلیدى ك نه‌خشه‌یلیان وه‌رته‌نگه‌و بووگ له‌ناو نه‌خشه‌یل ڕه‌سمى ناكاریگه‌ر و زوورم كادره‌یلى جویر زندانیكریاگن له‌ باڵه‌خانه‌ى سه‌فاره‌ته‌گه‌و نیه‌زانن چه‌ ڕویده‌یگ  له‌ ده‌وروه‌ریان.

بیگومان ئى ستراتیجى مللیه‌ هه‌وه‌جه‌ وه‌ بودجه‌ یا میزانیه‌و بڕیاره‌یل دیریگ  له‌ په‌رله‌مان وه‌شیوه‌یگ  ژیارى یا حزارى و نه‌رم له‌وه‌ر خاتر وه‌ڕیكردن ئه‌و سه‌فیره‌یل مللیه‌ ئه‌را گشت ده‌وڵه‌ته‌یل جه‌هان له‌جیاى ئه‌و هه‌زاره‌ها شاند یا وه‌فده‌یل حكوومه‌ته‌ ك هه‌ر خه‌ریك پیاسه‌كردنن له‌ بازاڕه‌یل جه‌هان.

دویاخریش بایه‌سه‌ گرینگى یا ئه‌همیه‌ت نه‌خش په‌یوه‌ندیه‌یل ده‌ره‌كى له‌وه‌رچه‌و بگریم و بزانیم سه‌ركه‌فتن خاسیگ  وه‌ده‌س تیه‌ریگ  ئه‌گه‌ر بایگ  و جى وه‌جى بكریه‌یگ  و گشت هه‌وه‌جه‌یگ  ئه‌ڕاى دابین بكریه‌یگ، ك هویچ گومانیگ له‌ ئه‌نجامى نیه‌كریه‌یگ  و ئه‌وه‌نه‌ سه‌ركه‌فتگه‌.