كاراكردن نه‌خش سه‌رمایه‌گوزارى وه‌خاتر به‌رزه‌وكردن راده‌ى ئابوورى له‌هه‌رێم

شفق نيوز

ڕوى له‌لى كه‌ن ئه‌را ده‌سكه‌فتن ده‌رفه‌ت سه‌رمایه‌گوزارى وه‌ جووریگ كاره‌یلیان ئاسانه‌ له‌هه‌رێم و هه‌وڵ به‌شداریكردن ده‌ن له‌مه‌یدان سه‌رمایه‌گوزارى، ئنجا به‌شدارى كومپانیایه‌یل له‌مه‌سه‌له‌ى سه‌رمایه‌گوزارى پرووژه‌یل جوراوجوور له‌هه‌رێم نه‌خش كارایگ دیرێد له‌خاسه‌وكردن داهات دارایى، یه‌یش بیجگه‌ ئه‌وه‌ك نه‌ختینه‌و پویل بیگانه‌ ده‌سه‌وه‌ر ئه‌كا له‌وه‌ر زیایبوین تواناى به‌رهه‌مدارى له‌گشت كه‌رته‌یل ئابوورى له‌چوارچیوه‌ى ده‌سكه‌فتن گه‌وراترین وزه‌ى به‌رهه‌مهاوریاى له‌ئابوورى هه‌رێم كوردستان وه‌ل به‌شه‌وكردن سه‌رمایه‌گوزاریه‌یل له‌بان كه‌رت و چالاكیه‌یل وه‌و شیوه‌ ك به‌رزترین ئاست په‌ره‌داین ئابوورى له‌لى بكه‌فێده‌و له‌وه‌ختیگ دیاریكریاى وه‌ل دروسكردن ره‌سمیگ سیاسى نازگ ئه‌را سه‌رمایه‌گوزارى ك ئامانجى بته‌وكردن ستوینه‌یل سه‌رمایه‌گوزارى بوودو هویچ كیشه‌و گرفتیگ له‌وه‌رده‌م بڕیاره‌یلى نه‌یلێد وه‌ك وه‌خشین له‌باج و بڕیگ زه‌مانه‌ت و ئمتیازه‌یل له‌وه‌ر خاتر متمانه‌داین وه‌كومپانیایه‌یل.

ئیمه‌ گشتمان زانیم ك مه‌سه‌له‌ى سه‌رمایه‌گوزارى لایه‌نه‌یل خاسى گرێده‌ خوه‌ى جویر زیایبوین له‌داهات نه‌ته‌وه‌یى و مقه‌یه‌تیكردن له‌سه‌نگ وقیمه‌ت پویل و چشته‌یل تر. ئنجا سه‌رمایه‌گوزارى چ ناوچه‌یى چ بیگانه‌، هه‌ر نه‌خش گه‌ورایگ دیرێد و كاراس له‌پرووسه‌ى بنیاتناین و كاروان په‌ره‌داین ئابوورى وه‌هه‌رێم. دى ئداره‌ى هه‌رێم ئى سیاسه‌ته‌ گرته‌وه‌ر و له‌ڕوى ئابووریه‌و پیشكه‌فتن خاسیگ وه‌خوه‌یه‌و دیه‌ وه‌تایبه‌ت هاوردن كومپانیایه‌یل سه‌رمایه‌گوزارى بیگانه‌ له‌مه‌یدان نه‌فت، ئنجا نه‌ك هه‌ر وه‌ته‌نیا سه‌رچه‌وه‌یل نه‌فت، به‌ڵكوو كه‌رته‌یل تر جویر گه‌شت وگوزار و پرووژه‌یل نیشته‌جیكردنیش ك ئه‌ویش پیشكه‌فتن خاسیگ وه‌خوه‌یه‌و  دیه‌. وه‌ل ئه‌وه‌یشا كومپانیایه‌یل جه‌هانى ریككه‌فتنه‌یل فره‌یگ وه‌ل ئداره‌ى هه‌رێم كوردستانا ئمزا كردنه‌ ئه‌را دروسكردن میوانخانه‌یل پیشكه‌فتگ له‌هه‌ردوگ پاریزگاى هه‌ولێر و سلێمانى جویر كومپانیاى رۆتاناو هیلتۆن و ماریوت و بیست و...هتد. كومپانیاى بیست ویسترن و هیلتۆن وه‌ل هه‌رێم ریككه‌فت له‌بان دروسكردن میوانخانه‌ى په‌نج ئه‌ساره‌ میوانخانه‌یل تر له‌هه‌ولێر پایته‌خت كوردستان ك له‌ساڵ 2013 كووتایى وه‌پى تیه‌ێد. وه‌گووره‌ى ئامار ره‌سمى وزاره‌ت پیشه‌سازى و بازرگانى هه‌رێم كوردستان ئه‌وه‌ ده‌ركه‌فتگه‌ ك 1217 كومپانیاى بیگانه‌ له‌هه‌رێم كاركه‌ن و زوورم ئى كومپانیایه‌یله‌ له‌مه‌یدان ئاڵشت وئوڵشتكردن ئابوورى خه‌ریك كاركردنن.

وه‌ل ئه‌وه‌یشا ئداره‌ى هه‌رێم كوردستان قاپى له‌وه‌رده‌م سه‌رمایه‌گوزارى كومپانیایه‌یل بیگانه‌و ناوچه‌یى وازكردگه‌ له‌پاریزگاى ساێمانى ئه‌را دروسكردن پرووژه‌یگ گه‌وراى نیشته‌جیكردن ك 2500 یه‌كه‌ى نیشته‌جى گرێده‌ خوه‌ى، ك خه‌رج ئى پرووژه‌یله‌ وه‌ 17 ملیار دۆلار مه‌زه‌نه‌ كریه‌ى له‌ناونى كه‌رته‌یل جوراوجوور و له‌وانه‌یش نیشته‌جیكردن و بازرگانى و گه‌شت و گوزار.

شایه‌ن باسه‌، حكوومه‌ت هه‌رێم كوردستان راسه‌وكردنه‌یل خاسیگ له‌یاساى سه‌رمایه‌گوزارى ئه‌نجام داگه‌ له‌وه‌ر كیشانن زیاتر سه‌رمایه‌گوزراى، یه‌یش بیجگه‌ ئه‌وه‌ك كومپانیایه‌یل عراقى و توركى و لوبنانى و ئماراتى و كوه‌یتى و ئۆرپى و ئه‌مریكى له‌هه‌رێم وجوود دیرن و یه‌یش هیشتگه‌ گه‌شتكه‌ر بیگانه‌ زیاتر ڕوى له‌هه‌رێم بكه‌ن.

 

محه‌مه‌د عه‌لى