مه‌رز ناونى كوردستان وعراق

شفق نيوز

كووراس، یا ته‌نیا ئه‌و زانن بویشن له‌فڵان شوون تا فڵانه‌ خاڵ و دى ئه‌و باقى مه‌رزه‌گه‌ نیه‌ناسن وه‌ كاملایا په‌ڕیگه‌وه‌، ئمجا له‌ى باوه‌ته‌وه‌، په‌نا به‌یمنه‌ وه‌ر كتاو جوگرافیاى كوردستان ك وه‌ى جووره‌ باس له‌مه‌رز ناونى كوردستان و عراق ئه‌كاو ئویشیگ: ئى مه‌رزه‌ وه‌ خه‌ت پانى 33ى باكوور ده‌س وه‌پى ئه‌كاو دویاخر كه‌مه‌ كه‌مه‌ وه‌ره‌و ڕووژئاوا بووگه‌وه‌ تا ڕه‌سیگه‌ خه‌ت دریژى 46 ڕووژهه‌ڵات وه‌چه‌ن كیلۆمه‌تریگ  له‌باشوور ئاوایى (سیمام)ه‌وه‌، ك دویاخر وه‌ل ئه‌و خه‌تا تیه‌یگه‌ خواره‌وه‌. ئمجا دویاى چه‌ن كیلۆمه‌تریگ پیچه‌و ئه‌كا وه‌ره‌و ڕووژئاواو دویاخریش وه‌ شاروچكه‌ى جه‌سانا په‌ڕیگه‌وه‌و ئمجا ئه‌و خه‌ته‌ ڕویه‌و باكوور بووگه‌وه‌.

دویاى ئه‌وه‌یش وه‌ ڕووژئاواى ئاوایى(ئه‌شان میرزا ئابادا) دریژه‌و بووگ ئه‌را ڕووژئاواى ئاوایه‌یل (سوڵتان و حاجى محه‌مه‌د و عه‌بدول عه‌ترۆز)، تاڕه‌سیگه‌ ڕووژئاواى شاروچكه‌ى (به‌له‌درووز).

دویاى ئه‌وه‌یش وه‌ ڕووژئاواى ئاوایه‌یل (سه‌لمان ئه‌لسه‌عدوون و به‌نى باعس و چیچان) وه‌ره‌و ڕووژئاواى شاروچكه‌ى مقدادیه‌(شاره‌بان)په‌ڕیگه‌وه‌و دریژه‌و بووگ تا ڕه‌سیگه‌ چه‌م سیروان، دى وه‌ل ئه‌و ئاو سیروانا چه‌ن كیلۆمه‌تریگ  كیشیگ  تا ره‌سیگه‌ ڕیژگاى ئاو چیچان و دویاخریش پیچه‌و ئه‌كا وه‌ره‌و ڕووژئاواو باكوور ڕووژئاوا بڕیگ  تا ڕه‌سیگه‌ كویه‌ى (حه‌مرین).

ئمجا وه‌ل ئه‌و جه‌وه‌ڵا دریژه‌و بووگ تا ره‌سیگه‌ ئاو داقووق و دى وه‌ل ئاوه‌گه‌یا چووگ وه‌ره‌و باكوور ڕووژئاوا تا ڕه‌سیگه‌ كویه‌ى مه‌كحوول و مكێحل، دویاخریش وه‌به‌رزترین شوونه‌یلیا په‌ڕیگه‌وه‌و دریژه‌و بووگ ئه‌را (فه‌تحه‌) تاره‌سیگه‌ ئاو دجله‌، ئمجا له‌ورا وه‌ل ئاو دجله‌یا وه‌ره‌و باكوور وه‌چه‌ن كیلۆمه‌تریگ دریژه‌و بووگ تا نزیك شار موسڵ. دویاخریش وه‌ باشوور ئه‌و شاره‌ په‌ڕیگه‌وه‌ ئه‌را ڕووژئاواو له‌وه‌را پیچه‌و ئه‌كا تا ڕه‌سیگه‌ باشوور ئاوایى (ئه‌لبویر)و ڕه‌سیگه‌ باشوور شاروچكه‌ى ته‌لعه‌فه‌ر. ئمجا له‌شوون ئه‌وه‌یش وه‌ باشوور ئاوایه‌یل (ته‌رمى و ئه‌برات و كابێرا) ڕه‌ى بووگ و ڕوى ئه‌كاده‌ باكوور ئاوایى (عه‌ین جه‌سان)و ئیجا دریژه‌و بووگ وه‌ره‌و ڕووژئاواو دویاخر دریژه‌و بووگ وه‌ره‌و باشوور ئاوایى قه‌ره‌داغ و له‌وراوه‌ ئه‌را باكوور ئاوایه‌یل (شادووق و سه‌باحیه‌)و له‌شوون ئه‌وه‌یش وه‌ره‌و باشوور ئاوایى حامرنى درژه‌و بووگ و ئیجا وه‌ باكوور ئاوایى قیكسرۆك و دویاخریش باشوور ئاوایى داله‌و سه‌كینیه‌ بڕیگ تا ڕه‌سیگه‌ خه‌ت دریژى 41 ڕووژهه‌ڵات، دویاخریش وه‌ زه‌نجیره‌ جه‌وه‌ڵ جه‌ریبا وه‌ره‌و مه‌رزه‌یل ناونى كوردستان سووریا په‌ڕیگه‌وه‌.

وه‌ى جووره‌ مه‌رز ناونى كورستان و عراق ئاشكراس ئه‌را گشتمان و گشت خاكه‌گه‌مان ناسیمن له‌كوورا تا كووراس.