وڵاتیگ بى حكوومه‌ت و مه‌ردمانیگ نه‌فام و خوه‌شباوه‌ڕ!!

شفق نيوز

له‌عراق ئه‌نجام دریاس، وه‌لى تویه‌نیم بویشیم تائیسه‌ وڵات بى حكوومه‌ته‌و مه‌ردمانیگ نه‌فام و خوه‌شباوه‌ڕیش له‌نه‌فامى و نارووشنهویرى خوه‌یان وه‌ل گشت هه‌وایگا شه‌ن خوه‌یان كه‌ن و ئه‌وه‌ك له‌دونیا نیه‌زاننه‌ى چه‌س ته‌نیا چاره‌نویس و ئاقبه‌تیانه‌!!

مه‌سه‌له‌ى دیموكراسى و فیدراڵى و فره‌یى و ژیان هاوبه‌ش، ك له‌وه‌ختیگ ده‌سڵات وه‌ده‌س دڕنده‌ترین رژیمه‌و بوى(رژیم به‌عس)گه‌وراو بویچگ مه‌ردم ئى وڵاته‌ شیوه‌ن ئه‌وه‌ كردیان ئه‌و سستمه‌یله‌ بایگه‌ وجوود تا له‌ساى ئه‌و دیموكراسى و فیدراڵیه‌ به‌خته‌وه‌ر بژیه‌ن، وه‌تایبه‌ت هیز ئۆپۆزسیۆن ك شوون و ماوایان دویره‌ وڵات و غوربه‌ت بوى و  هه‌میشه‌ چه‌ویان وه‌ دڵگیرى خاك عراقه‌و بوى چ رووژیگ بایگ خوه‌یان له‌وڵات بویننه‌و تا هه‌ناسه‌ى ئوخه‌ى و خوه‌شى هه‌ڵكیشن، ئه‌یه‌ بیجگه‌ باسكردن و قه‌وڵداین و ئشاره‌تكردنیان ئه‌را ژیان برایانه‌و ئاشتى له‌ناونى گشت نه‌ته‌وه‌و چینه‌یل جیاجیاو دانیشتنیان له‌بان یه‌ك سفره‌و به‌شكردن گشت هه‌قه‌یل زه‌فتكریاگیان له‌ناونى گشت لایه‌نه‌یل و هه‌میشه‌ وتیان خه‌یرو به‌یر وڵات بایه‌سه‌ ئه‌را مه‌ردم وڵات بوودو ئه‌وه‌ك چه‌نه‌ ناخوینیگ هه‌قى بریاس بایه‌سه‌ بایگه‌و ئه‌ڕاى. وه‌لى ئاشكراس هویچ قه‌وڵ و بڕیاریگ له‌جى خوه‌ى نه‌وى و بار یا وه‌زعه‌گه‌ وه‌دڵ به‌رژه‌وه‌ندخوازه‌یل چه‌رخیاو زیاتر وه‌زه‌ره‌د ملله‌ت بى پشت وپه‌نا شكیاوه‌.

ئه‌وه‌ك له‌عراق ئاڵشت بوى دویاى رمیان رژیم وه‌رین، ته‌نیا ئازادى قسه‌كردن بى ماناو هه‌ڕه‌شه‌و گوڕه‌شه‌س ك له‌لایه‌ن كه‌سه‌یلیگه‌و جویر ئازادى گوزارش له‌ى ره‌فتاره‌ كه‌ن، وه‌نا ئه‌گه‌ر بایمنه‌ پاى واقع دوینیم دكتاتۆریگ نه‌مه‌ند سه‌دان و بگر هه‌زاران دكتاتۆر شوونى گرت، تونڕه‌وى و ته‌كڕه‌وى و خوسه‌و كینه‌ت هه‌مان چشته‌و له‌مامڵه‌و ڕه‌فتار شۆڤێنیه‌ت زیاتر هویچ دیموكراسیه‌ت و ئنفتاحیگ له‌لى نیه‌كریه‌یگه‌ دى، ته‌عریب و داگیركردن هه‌ر وه‌رده‌وامه‌، زوڵم و تاوان زیاتره‌و بویه‌، گه‌ناته‌كارى و خیانه‌تكردن له‌ماڵ ملله‌ت مه‌رز بڕیه‌و بى شماره‌، دژایه‌تى یه‌كترى و مه‌سه‌له‌ى چینایه‌تى و ره‌گه‌زى هیملن ڕیشگى هه‌رمه‌ندگه‌، له‌وه‌یش زیاتر ده‌یه‌ها وزاره‌ت بى مانا دامه‌زریاگه‌و له‌بان هساو فه‌قیر و بى درامه‌ت نه‌ ئه‌ركیان دیاره‌و نه‌یش كار خاسیگ له‌لى كه‌فیگه‌و، وه‌ل ئه‌وه‌یشا ناكووكى و كیشمه‌كیش ناونى لیست ده‌سڵاتدار و لایه‌نه‌یل تر هه‌ر وه‌رده‌وامه‌و گشتى وه‌ زه‌ره‌د ملله‌ت سته‌مدیده‌ ته‌واو بوود.

له‌لایگ تریشه‌و به‌ش فره‌یگ دروسكردن كیشه‌و گرفت له‌لایه‌ن خود په‌رله‌مان و ئه‌ندامه‌یلى بویه‌سه‌ ته‌وقیگ و یه‌قه‌ى ملله‌ته‌گه‌ كردگه‌، هه‌ر ئه‌ندامیگ  وه‌ ئاره‌زوو خوه‌ى ته‌سریح ده‌یگ و تاوانبار لایه‌نه‌یل تر ئه‌كا، كوردیش له‌ى ناونیه‌ باوه‌ڕى وه‌هویچ سیاسه‌تیگ  نه‌مه‌ندگه‌، چوینكه‌ زانیگ له‌گشت لایگه‌و غه‌در و خیانه‌ت له‌لى كریه‌یگ و هه‌قى فه‌وتیه‌یگ ، مادده‌ى 140و قانوون نه‌فت و غاز هیمان خه‌ویگه‌و جیوه‌جى نه‌ویه‌، هه‌ر داواكارى و خواستیگ له‌لایه‌ن كورده‌و هه‌زار و یه‌ك مانا له‌لى ده‌ركریه‌یگ و ڕه‌ته‌و كریه‌یگ ، دانیشتن و گفتوگوو لایه‌ن كوردى وه‌ل وه‌رپرسه‌یل حكوومه‌ت به‌غدا بیجگه‌ وه‌خت كوشتن ده‌رئه‌نجام خاسیگ له‌لى نه‌كه‌فته‌سه‌و، چوینكه‌ حكوومه‌ته‌ ناته‌واوه‌گه‌ى به‌غدا هیمان له‌ سیاسه‌ت ته‌كڕه‌وى و خود چه‌سپانن زیاتر زووانیگ تر ناورده‌سه‌ كار به‌رژه‌وه‌ندى گشتى له‌لى بایگه‌ وجوود. له‌وه‌خت حكوومه‌ت و په‌رله‌مانیش هه‌رچى قسه‌و باسه‌ بوى(قه‌وڵیگه‌و دریا)وه‌لى مالكى هه‌ر ده‌سى له‌ته‌خت ده‌سڵات گیر كرد جویر حكوومه‌ته‌یل تر وه‌رجه‌ خوه‌ى(ئاو وه‌ جاممان په‌یمانه‌ نه‌كرد)و ته‌كجمیگ نه‌یا هه‌ق و چاره‌نویس كورد.

ئه‌گه‌ر بایمنه‌ پاى راسى، ئمڕوو له‌عراق ئه‌قڵیه‌تیگ دویاكه‌فتگ كریه‌یگه‌ دى، مه‌ردمان فره‌یگ هه‌ن جویر ئه‌وه‌ك سه‌ره‌تا ئشاره‌ت وه‌پى كردیم، وه‌بى ئه‌وه‌ك بزانن مه‌سه‌له‌ چه‌س لایه‌نگرى خوه‌یان نیشانده‌ن ئه‌را هه‌ر بڕیار و باوه‌تیگ دژ هه‌قه‌یل ڕه‌واى كوردو له‌لایه‌ن نیه‌ت پیسه‌یله‌و گه‌مه‌ وه‌ ئه‌قڵیان كریه‌یگ ، سستم فیدراڵى وه‌ جیایى زانن و جیوه‌جیكردن مادده‌ى 140و چاره‌نویس ناوچه‌یل داوڕیاگ له‌ هه‌رێم كوردستان وه‌  دروسكردن سه‌روه‌خوه‌یى و كیشانن نه‌خشه‌ى ده‌وڵه‌تبوین ده‌نه‌ قه‌ڵه‌م، هه‌ر له‌وه‌ر ئه‌وه‌یش دوینید له‌یوا له‌لایه‌ن ده‌مبه‌تاڵه‌یل حكوومه‌ته‌و مه‌ژگیان پڕه‌و كریاگه‌ باسكردن ئى مه‌سه‌له‌ جویر (بڤه‌)س له‌لایان. ئمڕوو حكوومه‌ت هه‌ڵوژریاگ له‌ى وڵاته‌ خاوه‌ن بڕیار خوه‌ى نیه‌و هه‌ر لایه‌نیگ و گوزریگ ناسه‌ ئاو، یه‌یش راسه‌وخۆ كاریگه‌رى خراویگ كرده‌سه‌ بان جموجویل بڕیگ له‌ده‌سڵاتداره‌یل وڵات، وه‌ل ئه‌وه‌یشا هه‌ر پاریزگایگ ئه‌را خوه‌ى ده‌وڵه‌تیگه‌، ده‌وڵه‌تیش هه‌ڵویست خوه‌ى وه‌ ته‌واوى نیشان نه‌یاگه‌و ڕووژیگ دووسه‌و ڕووژیگ دوشمن، ئه‌و ڕووژه‌ ك دووس كورده‌ خوه‌ى له‌ ناو قویلایى كیشه‌و گرفت دوینیگه‌و ك یه‌كسه‌ر په‌نا به‌یگه‌ وه‌ر ئه‌قڵیه‌ت كورد ئه‌را چاره‌سه‌ر جویر ئه‌وه‌ك له‌ناونى لیسه‌ته‌یل سه‌ركه‌فتگ ڕویداو له‌لایه‌ن ده‌سپیشخه‌رى یا موبادره‌گه‌ى سه‌رۆك هه‌رێم كوردستان مه‌سعود بارزانى ره‌سانه‌یانه‌ كنار ئارام و ریگه‌چاره‌یگ ئه‌رایان دوینریاوه‌ له‌دانیشتن هه‌ولێر گشت حزب و لایه‌نه‌یل نا یه‌كه‌و له‌وه‌ر خاتر پیكهاوردن حكوومه‌ت. ئه‌و رووژیشه‌ ك دوشمنن سیاسه‌ت له‌ناوبردن و بیبه‌شكردن وه‌لمانا تیه‌رنه‌ كار و پشت له‌ هه‌قه‌یل ره‌وامان كه‌ن.

جى داخه‌ تا ئیسه‌ ئیمه‌ى كورد دووس و دوشمن خوه‌مان نه‌ناسیمنه‌، چوینكه‌ له‌ڕوى سووزداریه‌و مامڵه‌ى برایانه‌ وه‌ل نه‌یاره‌لمانا كه‌یم و خه‌یمنه‌ى قاڵب ئنسانیه‌ت، وه‌لى له‌یوا دیاره‌ ئى جووره‌ ماڵه‌یگ له‌ زه‌ره‌د زیاتر چشتیگ تر له‌ئه‌وان له‌لى نیه‌كریه‌یگه‌ دى، چوینكه‌ مه‌سه‌له‌ى ئنسانیه‌ت له‌لاى دكتاتۆر و شۆڤێنیه‌یل چه‌واشه‌ى ده‌ستوور سه‌ركوتكه‌ریانه‌و هویچ خزمه‌تیگ وه‌ به‌رژه‌وه‌ندى و مه‌رام پیسیان نیه‌ڕه‌سنیگ .

ده‌سڵات مه‌ركه‌زى به‌غدا ئه‌گه‌ر خوه‌ى وه‌ خاوه‌ن وه‌رپرسیاریه‌تى بزانیگ و ماڵى شپرز نه‌ود ئه‌ڕاچه‌ بایه‌سه‌ بیده‌نگ بویاتاد له‌بان ئه‌و هه‌مگه‌ تووپوارانكردن و كاولكاریه‌ له‌لایه‌ن تووپخانه‌یل ئیران و ته‌یاره‌یل جه‌نگى توركیه‌ ك گیان ده‌یه‌ها كه‌س بیتاوان له‌تى بویه‌ قوربانى بیجگه‌ زه‌خمداربوین هاووڵاتیه‌یل فره‌یگ  وه‌ل ویرانكردن چه‌نه‌ها ئاوایى له‌ مه‌رز هه‌رێم؟ یه‌یش ماناى ئه‌وه‌سه‌ ئیمه‌ى كورد له‌هه‌ق ئنسانیه‌ت جیاوه‌ كریایمنه‌و خود حكوومه‌ت كزى و كه‌مهیزیمان توایگ له‌وه‌ر خاتر ئه‌وه‌ك بتویه‌نیگ زاڵ بووده‌ بان گشت هه‌قه‌یل زه‌فتكریاگمان!

مه‌سه‌له‌ى ئشاره‌تكردن وه‌ خودكیشاننه‌وه‌ى وه‌زیره‌یل و متمانه‌یش له‌ى دویاخره‌ له‌ حكوومه‌ت مالكى له‌لایه‌ن كورده‌و له‌بان جیوه‌جیكردن 19 خاڵ داواكارى له‌ریككه‌فتننامه‌ى ناونى به‌غداو هه‌ولێر، ئاكام ئه‌و ده‌رئه‌نجامه‌یله‌سه‌ ك نه‌گه‌تیڤ دیاردا له‌هه‌ڵویست و یه‌كلانه‌كردنه‌وه‌ى لایه‌ن وه‌رانوه‌ر ده‌رهه‌ق وه‌ ئه‌ركه‌، ك یه‌یش چه‌وه‌ڕى سه‌ردان شاند حكوومه‌ت هه‌رێم له‌لى كریه‌یگ ئه‌را دانیشتن وه‌ل كاروه‌ده‌سه‌یل و لایه‌ن په‌یوه‌ندیدار له‌ حكوومه‌ت مه‌ركه‌زى له‌به‌غدا، ك ئى مه‌سه‌له‌ خوازیار ئه‌وه‌سه‌ كلتوور دكتاتۆرى و ده‌سڵات داگیركردن یه‌كلاوه‌ بكریه‌یگ، چوینكه‌ جیوه‌جى نه‌كردن ئى هه‌قه‌یله‌ ماناى دكتاتۆریه‌ت و زه‌فتكردن هه‌ق ملله‌تیگه‌.

 

جه‌مال ئه‌ركه‌وازی