گشت سه‌ره‌تایگ كووتایى دیرێد ته‌نیا كورده‌یل فه‌یلى نه‌ون

شفق نيوز

داواى هه‌ق كورده‌یل فه‌یلى ئه‌كا، وه‌تایبه‌ت له‌شوون ئه‌وه‌ك دادگاى باڵاى تاوانه‌یل له‌ 29/ ته‌شرین دویه‌م 2010 ئه‌و كاره‌ساته‌یله‌ ك هاته‌ تویش ئى چینه‌ وه‌ له‌ناوبردن وه‌جه‌م "جینۆساید"له‌ قه‌ڵه‌مدا، یه‌یش بیجگه‌ ده‌نگه‌یل تر ك هاوردنه‌وه‌و هه‌قداین وه‌كورده‌یل فه‌یلى ڕه‌ته‌و ئه‌كا.
باوه‌ڕ ناكه‌یم كه‌سیگ ئاگادار نه‌ود له‌ مه‌زڵوومیه‌ت ئى چین ئاشتیخوازه‌ له‌روڵه‌یل ملله‌ت عراقى ك گشت تاوانه‌یلیگ ده‌رهه‌قیان ئه‌نجام دریاو هویچ ملله‌تیگ له‌تاریخ ئنسانیه‌ت جوور كاره‌سات كورده‌یل فه‌یلى ناته‌سه‌ تویشى و له‌فه‌رهه‌نگ ئه‌و تاوانه‌یله‌ هویچ تاوانیگ دڕه‌نده‌تر له‌و تاوانه‌یل كووچ وه‌پیكردن زووره‌ملیه‌ نه‌ویه‌ ك ده‌رهه‌ق ئى چینه‌ ئه‌نجام دریا.
له‌جه‌هان كاره‌ساته‌یل كووچ وه‌پیكردن زووره‌ملى رویدا، وه‌لى تاوان كورده‌یل فه‌یلى له‌وانه‌ گشتى زیاتر بوى وه‌ ئه‌وه‌ك ئى تاوانه‌ دژ فه‌یلیه‌یل وه‌رده‌وام بوى ئه‌را زیاتر له‌ 15ساڵ ك له‌ساڵ 1969ده‌س وه‌پیكردو له‌ساڵ 1988ته‌واو بوى، ك یه‌یش له‌یاساى تاوانه‌یل یاسایى وه‌لى ئویشن"تاوانه‌یل جیوه‌جیكریاگ وه‌رده‌وام". ئه‌و تاوانه‌یله‌ ك رویدا له‌ده‌وڵه‌ته‌یل تر جه‌هان تا ماوه‌ى دیاریكریاكیگ ته‌واو بوى ته‌نیا ئى تاوانه‌یله‌ وه‌رده‌وام بوى ئه‌را ساڵه‌یل فره‌یگ و فیشتر بوى له‌و كاره‌ساتیشه‌ ك هاته‌ تویش ئه‌رمه‌نه‌یل.
مه‌سه‌له‌ى كوردایه‌تى گوناهیگ بوى له‌سه‌رده‌م رژیم رمیاگ و فه‌یلییش تاوان بوى، ئنجا ئه‌ڵڵاجه‌وى ها له‌ورا ده‌نگه‌یل فره‌یگ  له‌دونیا وتیاد با بژیه‌ى ئاده‌میزاد، وه‌لى له‌عراق داواى مردن كورده‌یل فه‌یلى و مناڵ و ژن و پیر و جوانیان كردیان و داواى مردن زووان و ڕشانن خوین و زه‌فتكردن ماڵ و موڵكیان كریا!
وه‌رجه‌ چه‌ن رووژیگ وزاره‌ت هه‌قه‌یل ئاده‌میزاد ئاهه‌نگ رووژ نیشتمانى كورده‌یل فه‌یلى ساز كردو دروشمه‌گه‌ى"زه‌مانه‌تكردن هه‌قه‌یل كورد فه‌یلى"بوى، ئایا ئى وزاره‌ته‌ له‌بان كام هه‌ق قسه‌ ئه‌كا ك تائیسه‌یش له‌شوون رمیان رژیم دكتاتۆر ده‌نگه‌یلیگ هه‌ن هه‌ڕه‌شه‌ى كووچ وه‌پیكردن زووره‌ملى له‌كورد كه‌ن، وه‌لى ئیجاره‌ له‌سه‌رده‌م دیموكراسى، ك دى نیه‌زانیم ئاقبه‌تى چوینه‌؟
گشتتمان زانیم ك پیشنیار یاسا ئه‌وه‌ بوى سه‌ندووق قه‌ره‌بووكردن ئه‌را كه‌س وكار قوربانیه‌یل له‌ناوبردن وه‌جه‌م دامه‌زریه‌ى و ئاماجى ئه‌وه‌ بوود قه‌ره‌بوو قوربانیه‌یل راپه‌ڕین شه‌عبانیه‌و زه‌ره‌دمه‌نه‌یل دوجه‌یل و زه‌لگاوه‌ویل و توركمان و كاره‌سات هه‌ڵه‌بجه‌و بارزان و ئه‌نفال و كورده‌یل فه‌یلى و هاووڵاتیه‌یل عراقى بكا ك زه‌ره‌د گیانى و ماددى و لاشه‌یى هاته‌ تویشیان له‌لایه‌ن رژیم وه‌رین له‌وه‌ر هووكار سیاسى و ره‌گه‌زى و چینایه‌تى وه‌تایبه‌ت ئه‌وانه‌ك بڕیاره‌یل دادگاى تاوانه‌یل گرته‌یانه‌و ك بایه‌سه‌ قه‌ره‌بوو بكریه‌ن، وه‌لى جى داخه‌ فراكسیۆنه‌یلیگ هه‌ن له‌ئه‌نجوومه‌ن نوێنه‌ره‌یل ناڕازیین له‌ى بڕیار پیشنیار كریاگه‌و شایه‌ت له‌وه‌ر ئامانجه‌یل سیاسى بوود.
له‌گشت ده‌وڵه‌ته‌یل جه‌هان ملله‌ت راپه‌ڕین ئه‌نجام دانه‌و ده‌نگه‌یلیش به‌رزه‌و بویه‌ ئه‌را ئاڵشتكارى له‌ژیانیان و ئه‌وانیش تیه‌ڵى رووژگار تام كردنه‌، وه‌لى ئه‌ڵڵاجه‌وى ئه‌وه‌سه‌ ك بیگانه‌یل داواى هه‌ق كورده‌یل فه‌یلى كه‌ن ك شایه‌ت به‌رژه‌وه‌ندى خودى له‌تى داشتوون یا له‌وه‌ر خاتر دعایه‌ى هه‌ڵوژانن یا وه‌ڕاسى دووس كورده‌یل فه‌یلیین وه‌بى به‌رژه‌وه‌ندى، وه‌لى دوینید خود كورد فه‌یلى ته‌كان له‌خوه‌یان نایه‌ن ئه‌را هاوردنه‌وه‌ى هه‌قه‌یلیان و بڕیگ له‌لیمان كه‌فته‌سه‌ ده‌ریایگ له‌ خه‌یاڵ و هیمان له‌شوون خوه‌ى نیشتگه‌و جموجویل ناكاو منیش له‌یوا دوینم ك رووژیگ تیه‌ید وه‌هار كورد فه‌یلى بوینمه‌ چه‌و، ئنجا ئویشن گشت سه‌ره‌تایگ كووتایى دیرێد و منیش ئویشم كورده‌یل فه‌یلى كووتایى نه‌یرن.

ئیسرا شاواز

ج