ئازادى له‌ناونى ترس و ئاسایش

شفق نيوز

 

هه‌ر كوومه‌ڵگایگ له‌هه‌ر لایگ جوگرافیاى ئى جه‌هانه‌ بوود، وه‌گووره‌ى هه‌ڵكه‌فت كوومه‌ڵایه‌تى و كلتوورى و بار شارستانى خوه‌ى قیمه‌تیگ ئه‌را ئه‌و ده‌سكه‌فت گرینگ ئازادیه‌ داناگه‌، هه‌ر له‌وه‌ر ئه‌وه‌یش وه‌ دریژایى هه‌زاران ساڵ ده‌یه‌ها ملیۆن ئاده‌میزاد له‌وه‌ر خاتر ئه‌و هه‌قه‌یل خودایى و ئنسانیه‌ گیانیان به‌خشانه‌، چوینكه‌ ئازادى ته‌نیا پاڵنه‌ر رووح مه‌ندنه‌وه‌و پاڵنه‌ر وه‌رده‌ه‌وامبوین ئاده‌میزاده‌ له‌ ژیان.

له‌هه‌ر شوونیگ بویدو هه‌ركه‌سیگ بوید و له‌هه‌ر پایه‌یگ كوومه‌ڵایه‌تى وه‌ هه‌ر مه‌هانه‌یگ ده‌س ئه‌را مانایه‌یل ئازادى بووه‌ید و بتواید وه‌ ئاره‌زوو خوه‌د باریده‌ى كار، ئه‌وه‌ بیگومان بویده‌ ئامانجیگ ئه‌را ئه‌وانه‌ك له‌وه‌ر خاتر رزگارى و ئازادى هه‌وڵ ده‌ن وه‌ چه‌واشه‌ى ئه‌وانه‌گ كه‌ش ئازادى دویره‌و خه‌ن.

هه‌قه‌یل له‌ سروشته‌و ئه‌را ئاده‌میزاده‌یل هاوشیوه‌و یه‌كسانن، چوینكه‌ گشت كه‌سیگ وه‌ جیاوازى ره‌گه‌ز و دین و ره‌نگ و نه‌ته‌وه‌و بار هه‌ڵكه‌فته‌ى جه‌سه‌یى هه‌مان پیكهاته‌ى ئنسانى دیرید، ماناى ئه‌وه‌سه‌ له‌بان گشت ئه‌و پاڵنه‌ره‌یل غه‌ریزه‌یى و فسیۆلۆجى و بایلۆجیه‌یله‌ دروس كریاگه‌ ك وه‌رانوه‌ره‌گه‌ى دیریده‌ى، هه‌ر له‌وه‌ر ئه‌وه‌یش هاوبه‌شییگ جیانه‌كریاگ پیكهاته‌ى جه‌سه‌یى و گیانى هه‌س له‌ ئاده‌میزاد، ئنجا له‌ هه‌ر شوونیگ بوید له‌ى بان گووشه‌ى زه‌ویه‌ له‌ڕوى نرخ ئازادیه‌و هه‌مان ئه‌و هه‌ق ئازادیه‌ دیرید ك وه‌رانوه‌ر دیریده‌ى، یه‌یش وه‌و مانا ئه‌وه‌ك ئازادى وه‌رته‌نگه‌و ئه‌كا ئه‌وه‌ سروشت و چاره‌نویس نیه‌، به‌ڵكوو كرده‌وه‌یل ئاده‌میزاده‌.

ئه‌رك ئیمه‌ له‌ى وڵاته‌ قورتاركردن ئازادیه‌ له‌ ترس و پاوه‌نكردن، ئه‌ركمان وه‌دیهاوردن ئاسایش كوومه‌ڵایه‌تى و مقه‌یه‌تیكردن به‌رژه‌وه‌ندیه‌یل هاوبه‌شه‌و ئه‌ركمان مقه‌یه‌تیكردن ئارامیه‌، چوینكه‌ هویچ وه‌ختیگ له‌ كیشمه‌كیش و دژایه‌تیكردن مه‌حاڵه‌ بتویه‌نیم ئارامى و سه‌قامگیرى بارمنه‌ ده‌س و ناتویه‌نیم فه‌رهه‌نگ و كلتوور و تاریخه‌گه‌مان وه‌ ئه‌مانه‌ته‌و جیواز بكه‌یم ئه‌را نه‌وه‌یل ئاینده‌.

هه‌ر له‌وه‌ر ئه‌وه‌یش هویچ ریگه‌یگ تر نیه‌ بیجگه‌ گونجیان و هه‌وڵ وه‌یه‌وژیان و خوه‌ندنه‌وه‌ى یه‌كترى و مقه‌یه‌تیكردن به‌رژه‌وه‌ندیه‌یل هاوبه‌ش ك مایه‌ى مقه‌یه‌تیكردن ئه‌و قه‌واره‌سه‌ ك وه‌ دریژایى هه‌زاران ساڵ دروسى كردیمه‌.

ئازاد وه‌رتى

ج . أ