وه‌ره‌و وه‌جه‌هانی كردن كێشه‌ی كورد فه‌يلی

شفق نيوز

روى ك رووژگار دیاریكریاگیگ بڕى و له‌تى له‌بار سه‌ختیگ ژیایم له‌و وه‌خته‌یله‌ جوور زاراوه‌ى كووچ وه‌پیكردن و بى سه‌روشونكردن و ده‌ركردن و دویره‌وخستن و فه‌رامووشكرن، ئه‌وه‌ ئمڕوو زاراوه‌یل تازه‌یگ له‌لامان په‌یا بوى و شوون ئه‌و زاراوه‌یل كویه‌نه‌ گرت و خوه‌ى له‌ژیان فه‌یلى چه‌سپان جوور داواكارى قه‌ره‌بووكردن و ماڵ و موڵك زه‌فتكریاگ و هاوردنه‌وه‌ى له‌كار ده‌ركریاگه‌یل و كیشمه‌یش موڵكدارى و هاوردنه‌وه‌ى ده‌ركریاگه‌یل...هتد، ك فره‌ ئه‌یه‌رنه‌یانه‌ كار، هه‌رچه‌ن بڕیگ له‌لیان چه‌ن شیه‌وكردنیگ گرێده‌ خوه‌ى.

 

 

ئیمه‌ چه‌ودیرى ئه‌و چشته‌یله‌ كه‌یم ك وه‌بوونه‌ى كیشه‌ى فه‌یلیه‌و ڕوی ئه‌یاد، ئمجا له‌ هه‌ولێگ ئه‌را به‌راوردكردن له‌ناونى ئه‌ڕاى چوینه‌یل جووراوجوور له‌باوه‌ت ئى كیشه‌و چوینیه‌تى ره‌فتاركردن وه‌لیا، دوینیم ك ئاكام بشیوى له‌هه‌ڵویست و حه‌ماسیه‌ت زیاتر له‌وه‌رانوه‌ر هویچ بڕیاریگ خاس یا خراو نییه‌و هه‌ولێگ نییه‌ ئه‌را شیه‌وكردنى وه‌گووه‌رى باوه‌ڕ خودى یا شه‌خسى و گوزارش وه‌ خواست یا زه‌روره‌ت ناكا له‌بان هویروڕاى خاوه‌ن كیشه‌گه‌.

 

ئیسه‌ مه‌یدان سیاسى خالیه‌ له‌ پرۆژه‌و ده‌رخستن كرده‌یى و ئه‌قڵانى و خالیه‌ له‌ وتار جیگیر و پڕه‌ له‌ ده‌رخستن و فكره‌ى سفت و تون و ناگونجیه‌ێد وه‌ل هه‌ڵكه‌فت ئمڕوو ك ئه‌ویش وه‌ختیه‌و ناكاریگه‌ره‌، بڕیگ له‌ هه‌ڵویسته‌یل زه‌نگ مه‌ترسى كوتن و هه‌ڕه‌شه‌ى ئاسایش و ئاشتى و یه‌كگرتن كوومه‌ڵگاو ده‌وڵه‌ت ئه‌كا وه‌شیوه‌یگ گشتى، ك بایه‌سه‌ ئه‌و مه‌ترسیه‌ لاوه‌یم وه‌ زووان ئه‌قڵ و دانایى و خوه‌ندنه‌وه‌ى واقع و ره‌فتار و هه‌ڵسووكه‌فت له‌بان ئى بنه‌ما.

 

وه‌گووه‌رى كاركردنمان له‌مه‌یدان ره‌سانن، دوینیم ئه‌و پشتگیرى میدیاییه‌ ك له‌ كیشه‌گه‌مان ئه‌كریه‌ێد ئه‌و ئاست خاس و ئه‌و ئومیده‌ نه‌یرێد، ئه‌را نموونه‌: دوینیم ك هه‌زاران نویسه‌ر و شاره‌زا له‌ڕووڵه‌یل چین فه‌یلى و مه‌ردمان تر له‌عراق و جه‌هان قه‌ڵه‌میان به‌رهه‌م فره‌یگ دیرێد، وه‌لى چه‌نیگ له‌لیان وه‌ وه‌رده‌وام قه‌ڵه‌میان خستنه‌ خزمه‌ت كیشه‌ى فه‌یلى و چه‌ودیریكردن كاره‌گه‌یان؟ چه‌نیگ له‌لیان باوه‌ته‌یل بڵاوكریاگ تایبه‌ت وه‌ فه‌یلى ئه‌خوه‌نیده‌و له‌بان ماڵپه‌ڕه‌یل ئه‌لكترۆنیمان؟ ئایا تویه‌نیم شماره‌ى دوینه‌ر و گووشته‌كن به‌رنامه‌یل په‌یوه‌س وه‌ى كیشه‌ دیارى بكه‌یم؟

 

وه‌باوه‌ڕم ئه‌نجامه‌گه‌ى دڵخوه‌شكه‌ر نییه‌، ئمجا له‌جیاى ئه‌وه‌ك بكه‌یمنه‌ى كیشه‌یگ جه‌هانى ك خوه‌یشى شایسته‌ى ئه‌وه‌سه‌، ناتویه‌نیم راى گشتى ناوچه‌یى وه‌ربگریم وه‌و جووره‌ ك هویر بخریه‌ێده‌ لاى، ئمجا كاره‌سات راسكانى و تیه‌ڵ ئه‌وه‌سه‌ ك ئه‌و چشته‌یله‌ له‌بان كورده‌یل فه‌یلى نویسیه‌ێد ده‌گمه‌ن خوه‌نریه‌نه‌و، وه‌ل ئه‌وه‌یشا ئاماره‌یل دقه‌تدار جه‌خت له‌وه‌ كه‌ن ك كه‌مترین باوه‌ته‌یل له‌ڕوى خوه‌نستنه‌و كه‌فتنه‌سه‌ به‌ش باوه‌ته‌یل كیشه‌ى فه‌یلى.

 

مه‌سه‌له‌گه‌ى مه‌سه‌له‌ى خوه‌شه‌ویسى یا كینه‌ت نییه‌، به‌ڵكوو كیشه‌یگه‌ له‌شیواز ده‌رخستن باوه‌ت ك له‌بنه‌ڕه‌ته‌و ناپه‌سه‌نه‌و ئیسه‌یش له‌ساى ئى هه‌مگه‌ كیشمه‌كیش و به‌رژه‌وه‌ندى و هه‌وه‌جه‌ى مه‌ردمان تر ئه‌را پشتگیرى له‌ كیشه‌یلیان نه‌ك كیشه‌ى ئیمه‌، كه‌سیگ نییه‌ گووش له‌ كیشه‌ بگرێد.

 

له‌ساى قه‌یرانه‌یل سه‌خت ك هاتیه‌سه‌ تویش كوومه‌ڵگاو ئه‌وله‌ویه‌ت چاره‌سه‌ریش ك دریاسه‌ به‌رژه‌وه‌ندى چینایه‌تى و له‌وه‌ر ئه‌وه‌ك په‌یوه‌ندیداره‌یل وه‌كاروبار فه‌یلى بى قسه‌و هه‌ڵویستن، دى ئاساییه‌ ئه‌یاكه‌مان خه‌تا له‌واكه‌مان بگریم و حاشا له‌ هه‌وڵداینى بكریه‌ێد، وه‌ل ئه‌وه‌یشا ئه‌ڵڵاجه‌وى نییه‌ فه‌تواى كه‌سه‌یلیگ بژنه‌فیم و خوه‌یان دویر بوون له‌ كرده‌وه‌ى و حاشا له‌و هه‌مگه‌ كاره‌یله‌ بكه‌ن ك ئه‌نجامى دایمنه‌و له‌شوونى گه‌ردیمنه‌.

 

جوورایه‌تى له‌ گشت چشتیگ هه‌س ته‌نیا خودا نه‌ود ك یه‌كیگه‌، گشتمان دگان وه‌ فره‌یى دینى و مه‌زه‌و و چینه‌یل ئه‌نه‌یم، دى ئایا ئه‌را دگان وه‌ جوورایه‌تى و جیاوازى له‌ ڕا و شیواز كاركردن له‌كیشه‌ى یه‌تیمیگ جوور كیشه‌گه‌مان نه‌نه‌یم؟

 

من داواكارم نه‌ف له‌ئه‌زموون ماڵپه‌ڕ شه‌فه‌ق وه‌ربگرن، چوینكه‌ گامه‌یل پڕ متمانه‌یگ ناگه‌ وه‌ره‌و وه‌جه‌هانى كردن كێشه‌گه‌ وه‌گووره‌ى ئه‌و هه‌وڵ و ته‌قلا ك وه‌ زایه‌ ناچێدو هه‌ر فكره‌و ئه‌ڕاى چوینیگ له‌تى بخریه‌ێده‌ ڕوى سه‌دان كه‌س دویننه‌ى و خوه‌ننه‌ى، وه‌مه‌رج ئه‌وه‌ك وه‌ جووریگ بوود حورمه‌ت گشت خوه‌نه‌واره‌یل له‌وه‌رچه‌و بگرێد ك گه‌ردنه‌ شوون زانیارى بنه‌مادار و په‌سه‌ن.

 

عه‌لى حسێن فه‌یلى

ج