مه‌یل دوشمن داشتوید

شفق نيوز

ئه‌راد په‌یا بوود، ئنجا ئه‌یه‌ چوین په‌یا بوود چوین خوه‌مان له‌لى دویره‌و بخه‌یم؟ شلیه‌ت هویچ ئاده‌میزادیگ نه‌وگ ك وه‌رده‌وام له‌قسه‌و ره‌فتار و له‌گشت وه‌زعیگى سه‌د له‌سه‌د راس بوود، غه‌ڵه‌ت هه‌ر كریه‌یگ، هه‌ر له‌وه‌ر ئه‌وه‌یش ئه‌گه‌ر تویه‌نستید بوشیده‌ كه‌سیگ تن غه‌ڵه‌تید، ئنجا یه‌یش وه‌ ته‌ماشاكردنیگ یا ده‌نگ یا جویله‌یگ یا وشه‌یگ بوود، ئه‌وه‌ چه‌وه‌ڕى چه‌ له‌لى كه‌ید؟

بیگومان تن له‌ى حاڵه‌ته‌ په‌لامار زیره‌كى و نازكردنى داید وه‌ خود وه‌خوه‌یه‌وه‌، ئه‌ویش هه‌وڵ ده‌یگ كاردانه‌وه‌ یا ڕه‌دفعل بیاشتووگ، ك ئه‌ویش مكوڕبوینیه‌ له‌بان هویروڕاى خوه‌ى یا هه‌ڵویسته‌گه‌ى و یه‌یش بیگومان وه‌ زه‌حمه‌ت تیه‌یگه‌ شوون خوه‌ى. هه‌ر له‌وه‌ر ئه‌وه‌یش بایه‌سه‌ هه‌میشه‌ هه‌وڵ بیه‌یم ك وه‌ ئه‌وه‌ ده‌س وه‌پى نه‌كه‌یم ك وه‌ كه‌سه‌یل تر بویشیم: ئیوه‌ غه‌ڵه‌تین، چوینكه‌ ئى سه‌ره‌تا بووده‌ هووكار وه‌رگرى یا دیفاعكردن و یه‌یش شیواز فره‌ خراویگه‌ له‌ هه‌ڵسووكه‌فت، چوینكه‌ هس دوشمنكارانه‌ له‌لى په‌یا بوود. هه‌ر له‌وه‌ر ئه‌وه‌یش بایه‌سه‌ فره‌ وه‌ئاگادارى و هوشیاریه‌وه‌ غه‌ڵه‌ته‌یل ده‌سنیشان بكریه‌یگ ، ك وه‌شیوازیگ بوود كه‌س وه‌رانوه‌ر له‌یوا هس نه‌كا ڕه‌خنه‌ له‌لى گرید، وه‌ل ئه‌وه‌یشا چشته‌یل نادیار بایه‌سه‌ وه‌ك چشته‌یل له‌هویربریاگ بخریه‌نه‌ ڕوى، سوقراتیش ئویشیگ : ئه‌و ته‌نیا چشته‌ ك زانمه‌ى ئه‌وه‌سه‌ ك من هویچ نیه‌زانم.

ئه‌گه‌ر هات و چشتیگ ژنه‌فتید و زانستید ك غه‌ڵه‌ته‌، خاستر ئه‌وه‌سه‌ خاوه‌ن قسه‌گه‌ له‌ناكاو نه‌شكنیده‌وه‌و له‌جواود بویشید: ئه‌یه‌ خاسه‌، وه‌لى له‌یوا بزانم من فكره‌یگ تر دیرم له‌ى باوه‌ته‌وه‌، بیگومان وه‌یه‌یش هس وه‌رانوه‌ره‌گه‌د له‌وه‌رچه‌و گرید، وه‌لى دوینید زوورممان ئه‌و ره‌فتار و سفه‌ته‌ نه‌یریم و له‌ هه‌مان وه‌خت كه‌سه‌یل فره‌یگیش هه‌ن له‌وه‌ختى ره‌خنه‌ له‌لیان گیریه‌یگ  نیه‌وان بچنه‌ ژیر هه‌قه‌وه‌و خوه‌یان وه‌راس و مه‌نتقى زانن و هویچ وه‌ختیگیش ئاماده‌ نین هویروڕاى خوه‌یان ئاڵشت بكه‌ن و ره‌خنه‌گه‌ وه‌ته‌واوى له‌وه‌رچه‌و بگرن وه‌هویچ شیوه‌یگ .

له‌یرا چشتیگ تر هه‌س، ك ئه‌ویش ئه‌وه‌سه‌ له‌وه‌ختى تواسید بوشیده‌ كه‌سه‌یل تر غه‌ڵه‌تین، ئه‌وه‌ بویشه‌ خوه‌دیش شایه‌ت منیش غه‌ڵه‌ت بووم له‌یه‌و هه‌وڵ بیه‌ وه‌خاسترین شیوه‌ گوزارش بكه‌یدو نه‌یلید هویچ مشتومڕیگ له‌لى بكه‌فیگه‌وه‌، چوینكه‌ جویر ئه‌وه‌ك له‌سه‌ره‌تا باسى كردیم مه‌ردمانیگ هه‌ن نیه‌توان كه‌س وه‌پیان بویشیگ: غه‌ڵه‌تین و ناڕه‌حه‌ت بوون وه‌و قسه‌.