هونه‌ر مامڵه‌كردن وه‌ل غه‌ڵه‌تكاره‌یل!

شفق نيوز

 

چاره‌سه‌ر غه‌ڵه‌ت هونه‌ریگه‌و له‌بان چه‌نه‌ها بنه‌ما دامه‌زریاگه‌ جوور:

یه‌كه‌م: مناكردن غه‌ڵه‌تكار فره‌جار ده‌رئه‌نجام خاس له‌لى نیه‌كه‌فیده‌و، بایه‌سه‌ خوه‌د له‌لى دویر بگرید، چوینكه‌ سروشت ئاده‌میزاد له‌یواسه‌ ك خوه‌شى له‌ مناكردن نیاید.

دویه‌م: وه‌ربه‌س لیخن و ته‌ماوى له‌وه‌رچه‌و غه‌ڵه‌تكار دویره‌و بخه‌، چوینكه‌ غه‌ڵه‌تكار جارجاریگ هس وه‌ ئه‌وه‌ ناكا غه‌ڵه‌ت كردگه‌و نیه‌ود ئیمه‌یش راسه‌وخۆ مناى بكه‌یم، هه‌ر له‌وه‌ر ئه‌وه‌یش بایه‌سه‌ ئه‌و په‌رده‌ له‌بان چه‌وى لاوه‌یم تا هس بكا غه‌ڵه‌ت كردگه‌.

سێیه‌م: وه‌كارهاوردن وشه‌و قسه‌یل نه‌رم و مه‌یلكیش ئه‌را خاسكردن غه‌ڵه‌ت كاریگه‌رییگ ئه‌فسوونى دیرید له‌بان دڵ و ده‌روین و هس ئاده‌میزاد، ئه‌را نموونه‌ وه‌ كه‌س غه‌ڵه‌تكار بویشیم" ئه‌گه‌ر له‌یوا بكرداید ئه‌وه‌ خاستر بوى" یا " پیشنیار كه‌م ئه‌و كاره‌ بكه‌ید، راد چه‌س؟" یا بویشیده‌پى " وه‌پیم خوه‌شه‌ وه‌و شیوازه‌ ره‌فتار بكه‌ید"، چوینكه‌ ئى قسه‌یله‌ خاستر و گونجیاگترن له‌ وشه‌یل زه‌خمكه‌ر و ناوه‌جى.

چواره‌م: وازهاوردن له‌ مشتومڕ و دریژه‌دان وه‌ قسه‌ى جدال له‌ چاره‌سه‌ركردن غه‌ڵه‌ت، چوینكه‌ فره‌جار زه‌ره‌ده‌یلى له‌ قانجازى فیشتره‌.

په‌نجه‌م: خوه‌د بخه‌ شوون غه‌ڵه‌تكار و ئه‌وسا بگه‌رده‌ شوون چاره‌سه‌ر بزان كام ره‌فتاریگ گونجیاگه‌و كام ره‌فتار ناجووره‌، ئنجا هه‌ركامیان گونجیاگتره‌ ئه‌وه‌ هه‌ڵوژن.

شه‌شه‌م: وه‌ نه‌رمى هه‌ڵسووكه‌فت وه‌ل غه‌ڵه‌تكاره‌یل بكه‌، چوینكه‌ وه‌ نه‌رمى چاره‌سه‌ر غه‌ڵه‌ت كریه‌ید.

هه‌فته‌م: له‌وه‌ختیگ ئاده‌میزاد غه‌ڵه‌ت ئه‌كا، كریه‌ید ئه‌را چاره‌سه‌ركردن غه‌ڵه‌ته‌گه‌ رى و شوون له‌یوا له‌وه‌ر بگیریه‌ید تا كه‌سه‌گه‌ خوه‌ى غه‌ڵه‌ته‌گه‌ى خوه‌ى بویندیده‌وه‌و چاره‌سه‌ر ئه‌و غه‌ڵه‌ته‌ بكا.

هه‌یشته‌م: له‌وه‌ختى ره‌خنه‌ له‌ كه‌سیگ گرید، لایه‌ن خاس و خراویشى بخه‌ ڕوى تا له‌وه‌رانوه‌ر ره‌خنه‌یلد قه‌بول بكاو له‌وژدانه‌و هس بكا ره‌خنه‌ له‌لى گرید.

 

ئاده‌میزاد غه‌ڵه‌ت ئه‌كا له‌ كاره‌یلى، وه‌لى بایه‌سه‌ ریژه‌یگ خاسى له‌تى بوودو نه‌بایه‌د ئه‌و ریژه‌ فه‌رامووش بكریه‌ید.

 

یاسین ئه‌حمه‌د

ا. ج