قه‌ڵه‌م پاكه‌يل سه‌ربازه‌يل راسيين

شفق نيوز

نيه‌فاميه‌يگ و كۆت ئه‌و چشتيشه‌ ك فاميه‌يگ وه‌ غه‌ڵه‌ت فاميه‌يگ،ئه‌يه‌ ڕاسيگه‌ ك له‌ ناوچه‌گه‌ وجوود ديريگ و عراق نموونه‌يگه‌ ك تويه‌نيم بويشيم زياترين ئازادی له‌ وڵاته‌يل ناوچه‌گه‌ ديريگ وه‌جووريگ ده‌سه‌ڵات قسيه‌كردن جوور چه‌ك سياسی و كۆمه‌ڵايه‌تيگه‌ .

ئاشكراس ك عراق ئمڕوو له‌ ده‌سڵات دكتاتۆری ئه‌را ده‌سڵات ديمۆكراتی ئاڵشته‌و بويه‌ و بويه‌سه‌ وڵاتيگ له‌ ئازادی ڕه‌سانن و ڕووژنامه‌نوێسی رێز و ئحترام گريگ وه‌لی ئه‌ی ئازاديه‌ وه‌رجله‌ وه‌خت گۆنجياگ خوه‌ی بويه‌ وه‌جووريگ هاووڵاتی عراقی وه‌يه‌كجار پانا ڕيگه‌ی تازه‌يگ ك ئه‌رای ئاماده‌ نه‌كرياگه‌ و نيه‌تويه‌نيگ و ئه‌و تواناييه‌ نه‌يريگ ك ئه‌ی جوور ئاست هويريگ وه‌په‌له‌ قه‌بوول بكا . ملله‌ت عراق له‌ی وه‌خته‌ ته‌قالا ئه‌كا ئه‌را تيره‌و كردن خوه‌ی و لاوردن گشت زۆڵمه‌يليگ له‌ ده‌سڵات دكتاتۆری وه‌رين وه‌جی مه‌نگه‌و پيشكه‌فتن جوور وڵاته‌يل بيگانه‌ و ئه‌را سه‌رخستن ئه‌ی ئامانجه‌يله‌ وه ‌وه‌خت هه‌وه‌جه‌ ديرێ . ئيمه‌ تويه‌نيم له‌ حاڵه‌ت ته‌ندرۆستی رووشنهويری و راگه‌ياندنی ئه‌ی وه‌ختمانه‌ سوود وه‌ر بگريم تا هاووڵاتی عراقی بتويه‌نيگ هه‌رچه‌ زويتر هويره‌يل خوه‌ی گرده‌و بكا و له‌ بۆشايی هويری دويری بگريگ و بتويه‌نيگ رێگه‌ی كۆمه‌ڵگايگ ئه‌را خوه‌ی دامه‌زرنيگ ك پڕ له‌ ئازادی و مافه‌يل ياساييه‌ وه‌ گشت زه‌نجيره‌يل دوياكه‌فتنيگ له‌دريژه‌ی ساڵه‌يل له‌ملی بويه‌ بوڕيگ وه‌ گام هه‌ڵگريگ وه‌ره‌و وه‌ڕاسی فامستن باوه‌ته‌يل و په‌يا كردن رێگه‌ی راس خوه‌ی .

له‌يراسه‌ ك ئه‌وانه‌يگ قه‌ڵه‌مه‌يل پاكيگ ديرن و نويسه‌ره‌يل و رووشنهويره‌يل و ئعلاميه‌يل شه‌رفدار تويه‌نن ڕێگه‌ی راس نيشان هاووڵاتی عراقی بيه‌ن و ده‌سمه‌يه‌ت بيه‌ن ئه‌را سه‌ركه‌فتن ئامانجه‌يل هاووڵاتی عراقی . ڕووژنامه‌نويسی و ڕه‌سانن ده‌سڵات چوارم له‌ وڵاته‌ و ئه‌ی ناوه‌ ك ئه‌رای هه‌ڵوژرياس راسه‌و هاووڵاتی تويه‌نيگ له‌ڕيگه‌ی ئه‌ی ده‌سڵاته‌ وه‌ڕاسی وه‌ل ديمۆكراتی ئاشناوه‌ بوود وه‌ تويه‌نيگ ئه‌و دوياكه‌فتن و نه‌فاميه‌ ك وه‌خاتر سياسه‌ته‌يل ده‌سڵات وه‌رين تويشی هاتگه‌ وه‌ل ئايه‌نده‌يگ پێشكه‌فتگ و ڕووشن ئاڵشته‌و بكا .