ئایا میدیاى كوردى چه‌‌وه‌‌ڕێ ڤیزا ئه‌‌كا؟

شفق نيوز

وه‌‌ل گشت كه‌‌م و كوڕییگ تویه‌‌نستگه‌‌ ڕۆڵ خوه‌‌‌ى له‌‌ ناو كومه‌‌ڵگا‌ى كورده‌‌وارى له‌‌ هه‌‌رێم بازى بكا، وه‌‌لى میدیاى كوردى له‌‌ ده‌‌یشت هه‌‌رێم كوردستان و له‌‌ ناوچه‌‌یل داوڕیاگ و وه‌‌تایبه‌‌ت له‌‌ به‌‌غدا و شاره‌‌یل تر ناو‌ڕاس وباشوور عێراق ‌تویه‌‌نم وه‌ جورئه‌‌ته‌‌و‌ بویشم ها له‌‌ ئاستێگ فره‌‌ نزم ‌و له‌‌ ئاست ململانیه‌‌گه‌‌‌ نییه‌ له‌وه‌ر ئه‌وه‌گ شوماره‌ى ئه‌و ده‌زگایه‌یل ره‌ساننیه‌ ك له‌و ناوچه‌یله‌ هه‌ن له‌ شوماره‌ى په‌نجه‌یل ده‌س زیاتر نین‌. ره‌‌سانن كوردی تائیسه‌‌ نه‌‌تویه‌‌نستگه‌‌ مه‌‌زڵومیه‌‌ت ملله‌‌ت كورد بڕه‌‌سنێده‌‌‌ شه‌‌قام عه‌‌ره‌‌بى و له‌‌ ڕێ ئه‌‌وانه‌‌و‌ ئه‌‌را پێكهاته‌‌یل تر و هه‌‌ر وه‌‌یخاتره‌ تائیسه‌‌یش هاووڵاتى عه‌‌ره‌‌ب شك وگومان دیرێ‌ له‌‌ گشت ئه‌‌و سیاسه‌‌ته‌‌یل‌ دوشمنكارانه‌‌و ئه‌‌و هه‌‌مگه‌‌ زوڵم وسته‌‌مه‌‌ ك‌ له‌‌ سه‌‌رده‌‌م رژیم دیكتاتۆرى وه‌‌رانوه‌‌ر وه‌‌ ملله‌‌ت كورد كریاگه‌‌. ئمڕوویش وه‌ حوكم زاڵبوین لایه‌‌نه‌‌یل مه‌‌زهه‌‌بى ك بڕێگیان هامیته‌‌ن وه‌‌ هویر و باوه‌‌ڕ مه‌‌زهه‌‌بى و شوفێنى لێوا ته‌‌زریقى ‌كه‌‌نه‌‌ مه‌‌ردم ك گوایا كورد گشت مافه‌‌یل خوه‌‌ى و ته‌‌نانه‌‌ت‌ زیاتریش له‌‌وه‌‌ وه‌‌ده‌‌سهاوردگه‌‌و ئه‌‌وه‌‌ نه‌‌فت عه‌‌ره‌‌به‌ ك‌ كوردستان وه‌‌پێ ئاوه‌‌دانه‌‌و ‌كریه‌‌ێد ‌و له‌‌ ڕێ میدیا وه‌‌ گشت جووره‌‌گانیه‌‌وه‌‌ و له‌‌ ڕێ گرده‌‌وبوین حزبى و بوونه‌یل ئاینى ته‌‌قالا كه‌‌ن‌ تا وه‌‌پییان كریه‌‌ێ بوشایى دویر و دریژیگ بخه‌‌نه‌‌ ناونى هه‌‌ردو نه‌‌ته‌‌وه‌‌ی كورد و عه‌‌ره‌‌ب‌.

ئمجا ئه‌‌را ئه‌‌وه‌‌گ ئیمه‌ بتویه‌‌نیمن كاریگه‌‌رى له‌‌ بان ره‌‌وت رویداگه‌‌یل داشتویمن ‌بایه‌‌د كار له‌‌ بان ڕاى گشتى یا شه‌‌قام عه‌‌ره‌‌بى بكه‌‌یم ك ئه‌‌گه‌‌ر وه‌‌رگرییش له‌‌ مافه‌‌یلمان نه‌‌كه‌‌ن وه‌‌لاى كه‌‌مه‌‌و نه‌‌ونه‌‌ وه‌‌ربه‌‌سیگ له‌‌ ڕێ مافه‌‌یل ڕه‌‌واى ملله‌‌ت كورد وه‌‌ تایبه‌‌ت له‌‌ ناوچه‌‌یل داوڕیاگ. یه‌‌كێگ له‌‌ شێوازه‌‌گان ئه‌‌وه‌‌سه‌‌ ك ئیمه‌‌ بیجگه‌‌ له‌‌ وهه‌ێز كردن ڕه‌‌سانن له‌‌ ناوچه‌‌یل عه‌‌ره‌‌بنشین ناو‌ڕاس و باشوور عراق بتویه‌‌نیمن پیه‌‌ڵ په‌‌یوه‌‌ندى وه‌‌ل مه‌‌ردم و جه‌‌ماوه‌‌ر دروس بكه‌‌یم و ئه‌‌وه‌‌یش ئاسان نیه‌‌ود مه‌‌گه‌‌ر له‌‌ ڕێ كورده‌‌یل فه‌‌یلى ك‌ خوه‌‌یان له‌‌و ناوچه‌‌یله‌‌ نیشته‌‌جان و جووره‌‌ هامیته‌‌بوینیگ وه‌‌ل ئه‌‌و مه‌‌ردمه‌‌‌ دیرن و بیجگه‌‌ له‌‌وه‌‌یش لایه‌‌نه‌‌ مه‌‌زه‌‌بیه‌‌گه‌‌ نه‌‌خش خوه‌‌ى دیرێ‌. میدیاى كوردى له‌‌ناوچه‌‌یل ناو‌ڕاس وباشوور عێراق، ئیسه‌‌ له‌‌ گشت وه‌‌ختیگ زیاتر هه‌‌وه‌‌جه‌‌ وه‌‌ شیه‌‌وكردن ‌و ڕێكخستنێگ زانستییانه‌‌ دیرێ‌، تا له‌‌و لاوازى دیاریه‌‌ نجاتى بوود، ك‌ له‌‌قه‌‌یرانه‌‌گان وه‌‌ ئاشكرایى وه‌‌پیه‌‌و دیاره‌‌. وه‌‌داخه‌‌و‌ تا ئه‌‌مڕوو‌ لایه‌‌نه‌‌یل په‌‌یوه‌‌ندیدار له‌‌ ئاست ئى گرفته‌‌ ده‌‌س‌ له‌‌بان ده‌‌س وسیانه‌‌ و هویچ هه‌‌نگاوێگ نه‌‌نانه‌‌ ئه‌‌را نجاتداینى، وه‌‌یخاتره‌‌ بارودوخه‌‌گه‌‌ هه‌‌وه‌‌جه‌‌ وه‌‌ بڕێگ هه‌‌نگاو خاسسازیانه‌‌ له‌‌ میدیاى كوردى دیرێ‌ له‌‌ده‌‌یشت هه‌‌رێم كوردستان وه‌‌گشتى و له‌‌شار به‌‌غداى پایته‌‌خت عێراق وه‌‌تایبه‌‌تى. ئیمه‌‌ له‌‌ده‌‌یشت هه‌‌رێم كوردستان هه‌‌وه‌‌جه‌‌ وه‌‌ ڕه‌‌ساننێگ وهه‌ێز دیریم‌ وهه‌‌ر دو زووان كوردی و عه‌‌ره‌‌بى، وه‌‌ تایبه‌‌ت له‌‌ى سه‌‌رده‌‌مه‌‌ ك‌ میدیا، نه‌‌خش گه‌‌ورایگ دیرێَ له‌‌ بان بنیاته‌‌یل ئابوورى ‌و سیاسى ‌و كومه‌‌ڵایه‌‌تى ‌و كلتورى، ته‌نانه‌ت له‌‌بان شێواز ره‌‌فتار و هویره‌‌وكردن‌ و ئاست ڕووشنهویرى، هه‌‌ر چه‌‌نیگ ته‌‌كنه‌‌لۆجیا و فراوانبوین ته‌‌كنیك ره‌‌سانن و كوالیتى وه‌‌ره‌‌و نوا بچوود، ئى نه‌‌خشیشه‌‌ كاریگه‌‌ریى زیاتره‌‌و ‌بوود.

ئه‌‌گه‌‌ر له‌‌ چه‌‌ن ده‌‌یه‌‌ى گوزه‌‌یشته‌‌ له‌‌باشوور كوردستان ڕێكخستن خاڵ بنه‌‌ڕه‌‌تى و وه‌هێزى جمشت كوردى بویه‌‌، وه‌لى ئیسه‌‌ میدیا ستوونێگ وهێزتره‌‌، كه‌‌ره‌‌سه‌‌یگ گرنگ داناین و بردنه‌‌وه‌‌و ته‌‌نانه‌‌ت مه‌‌نین‌ و له‌‌ ناوچینه‌‌، وه‌‌یخاتره‌‌ ره‌‌ساننێگ وه‌هێز "كاریگه‌‌ر" له‌‌ى وه‌‌خت ئیسه‌‌ هه‌‌وه‌‌جه‌‌یگ گرنگه‌ ئه‌‌را‌ كورد له‌‌ده‌‌یشت هه‌‌رێم كوردستان. وه‌‌ل ئه‌‌و پێشكه‌‌فتن فراوانه‌‌ ك میدیا وه‌‌ خوه‌‌یه‌‌و دیه‌‌سه‌‌ى‌، له‌هه‌‌مان وه‌‌خت ئه‌‌و جه‌‌نگ دویه‌‌كه‌‌‌ ك وه‌‌ گولله‌‌ و ڕشیان خوین ئه‌‌كریا، ئمڕوو ڕه‌‌سانن جه‌‌نگێگ ده‌‌روینى سه‌‌ختتر ‌و كاریگه‌‌رتر له‌‌ جه‌‌نگ گولله‌‌ ئه‌‌كا ك‌ شاره‌‌زایه‌‌یل بواره‌‌گه‌‌ "میدیا" وه‌‌ تازه‌‌ترین تفه‌‌نگ سه‌‌رده‌‌م ده‌‌نه‌‌ى قه‌‌ڵه‌‌م، وه‌‌لى كورد له‌‌ده‌‌‌یشت هه‌‌رێم كوردستان نه‌‌ك ئه‌‌و چه‌‌كه‌‌ وه‌‌كار نه‌هاوردیه‌‌, ته‌‌نانه‌‌ت كه‌‌فتگه‌‌سه‌‌ وه‌‌ر ده‌‌سڕێژ چه‌‌ك ڕه‌‌سانن حزب ولایه‌‌نه‌‌یل‌ سیاسى دوشمن كورد!

كه‌‌مى ئامرازه‌‌یل ڕه‌‌ساننى كوردى له‌‌ده‌‌‌یشت هه‌‌رێم كوردستان وه‌‌ هه‌‌ر سێ شێوه‌‌گه‌‌ى (خوه‌‌نریاێ، دوینریاێ، ژنه‌‌فریاێ) لێوا كردگه‌‌ ك‌ تائیسه‌‌ كورد نه‌‌تویه‌‌نستگه‌‌ له‌‌ناو‌ڕاس وباشوور عێراق ڕاى گشتى ئه‌‌را باوه‌‌تێگ دیاریكریاێ دروس بكا، ك‌ یه‌‌كێگه‌‌ له‌ ئه‌‌ركه‌‌یل فره‌‌ گرنگ ڕه‌‌سانن، یه‌‌یش ته‌نیا په‌‌یوه‌‌ندى وه‌‌ تواناو ئاست ڕووشنهویرى مید‌یاكاره‌‌یل ئیمه‌‌ نه‌‌یاشتگه‌‌, به‌‌ڵكم مه‌‌وداى میدیاى كوردى ته‌‌نیا ناوچه‌‌یل هه‌‌رێم گرتگه‌‌سه‌‌ وه‌‌ر‌. وه‌‌گوره‌‌ی ئاماره‌‌یل له‌هه‌‌رێم كوردستان زیاتر له‌‌ 800 هۆكار ڕه‌‌سانن هه‌‌س‌ وه‌‌لى ئایا له‌‌ده‌یشت هه‌‌رێم كوردستان ئه‌‌و شوماره‌‌ چه‌‌نیگه‌‌؟!. ڕاسه‌‌ ك‌ میدیاى ئیمه‌‌ له‌‌شوون ڕمیان ڕژیم وه‌رین عێراق وه‌‌ره‌‌ونواچینێگ وه‌‌رچه‌‌و داشتگه‌‌‌‌، وه‌‌لى وه‌داخه‌و ته‌نیا له‌‌ چوارچیوه‌‌ى جوگرافیایگ دیاریكریاێَ بویه‌‌و له‌‌سنوور پارێزگایل هه‌‌رێم كوردستان گوزه‌‌ر نه‌‌كردگه‌‌‌.

 

ئاراس جه‌‌واد