ماڵئاوایى یه‌كجارى هونه‌رمه‌ند په‌یكه‌رساز حوسێن مایخان

شفق نيوز

حوسێن مایخان وه‌پیمان ڕه‌سى، له‌وه‌ختیگ ك پرسه‌ و سه‌ره‌خوه‌شى خوه‌مان ئاراسته‌ى كه‌س و كار و بنه‌ماڵه‌گه‌ى كه‌یمن، كووچ كردن حوسێن مایخان هونه‌مه‌ند وه‌ خه‌ساره‌تیگ گه‌وراى هونه‌ر عیراقى وه‌گشتى و كوردى ده‌یشت هه‌رێم كوردستان ده‌یمنه‌ قه‌ڵه‌م.

ڕه‌حمه‌تى حوسێن مایخان وه‌دریژى عومر پڕ له‌مه‌ینه‌تى و سه‌ختى خوه‌ى، قه‌ڵه‌م و چه‌كوشه‌گه‌ى ته‌رخان كرد ئه‌را خزمه‌ت هونه‌ر په‌یكه‌رسازى عیراقى و كوردى و تا ئاخرین نه‌فه‌س ژیانى هه‌وڵ و ته‌قه‌لادایه‌ ئه‌را خزمه‌تكردن هونه‌ره‌گه‌ى و هونه‌رمه‌نده‌یل كورد ده‌یشت هه‌رێم وه‌ كاركردنى له‌ سه‌ندیكاى هونه‌رمه‌نده‌یل عیراقى.

ڕه‌حمه‌تى له‌ ساڵ 1947 له‌ شار خانه‌قین كوردستانى هاتیه‌سه‌ دونیا و هه‌ر له‌ورا خوه‌نین سه‌ره‌تایى ته‌مام كردیه‌ و ئنجا بنه‌ماڵه‌گه‌ى ناچار بوینه‌ وه‌ره‌و شار به‌غداى پایته‌خت بار بكه‌ن، و له‌ورایشه‌ خوه‌نین ناوه‌ندى و دویاناوه‌ندى ته‌مام كردیه‌ و چویه‌سه‌ په‌یمانگاى كارگێڕى یا ئیداره‌ و له‌ ساڵ 1973 له‌و په‌یمانگا ده‌رچویه‌، به‌هره‌مه‌ندى گه‌ورایگ له‌ هونه‌ر په‌یكه‌سازى داشتیه‌ و ئه‌را ئه‌وه‌گ وه‌شیوه‌یگ زانستى وه‌رده‌وامى بیه‌یده‌ كاره‌گه‌ى له‌ ساڵ 1977 په‌یمانگاى هونه‌ره‌یل جوان وه‌ پله‌ى نایاب (ئمتیاز) ته‌واوكردیه‌ و هه‌وڵدایه‌ له‌ ئه‌كادیمیاى هونه‌ره‌یل جوان بخوه‌نى وه‌لى له‌وه‌ر ئه‌وه‌گ وه‌ به‌عسى نه‌ویه‌، له‌لى قه‌بوول نه‌كردنه‌ له‌ورا شه‌وه‌كیان بخوه‌نى و ناچار بویه‌ ئیواران بخوه‌نى و له‌ ساڵ 2001 له‌ ئه‌كادیمیاى هونه‌ره‌یل جوان ده‌رچویه‌.

هه‌ر له‌ ساڵ 1978وه‌ چالاكى هونه‌رى خاسیگ داشتیه‌ و له‌ چه‌ندین خول و پیشانگا له‌ ناو و له‌ ده‌یشت وڵات به‌شدارى كردیه‌ و چه‌ندین به‌ڵگه‌نامه‌ى پسپۆرى له‌ كاره‌یل هونه‌رى برنجه‌یى وه‌رگردیه‌، له‌ چه‌ندین فه‌رمانگه‌ى حكوومى كار كردیه‌ جوور شاره‌وانى به‌غدا – فه‌رمانگه‌ى هونه‌ر شیوه‌كارى، وه‌زاره‌ت ڕووشنهویرى، مۆزه‌خانه‌ى به‌غدادى... ئه‌ندامیش بویه‌ له‌ كوومه‌ڵه‌ى شیوه‌كاره‌یل عیراقى و سه‌ندیكاى هونه‌رمه‌نده‌یل عیراقى، و سه‌ندیكاى ڕووژنامه‌نویسه‌یل كوردستان ...  و چه‌ندین وتار و په‌یجوورى له‌باوه‌ت هونه‌ر شیوه‌كارى و په‌یكه‌رسازى له‌ ڕووژنامه‌ و گۆڤاره‌یل عیراقى بڵاوكردیه‌...

له‌ى چه‌ن وه‌خت دویاییه‌ تویش بیمارییگ كوشنده‌ هاتیه‌ و ئه‌وه‌ بوى له‌ ڕووژ په‌نجشه‌ممه‌ 10 ئادار 2011 دویا هه‌ناسه‌ى ژیان پڕ له‌ مه‌ینه‌تى كیشا و  وه‌كووچكردنى كه‌ل گه‌ورایگ خسته‌ ناو هونه‌ر په‌یكه‌رسازى و شیوه‌كارى كوردستانى و عیراقى و خه‌م و په‌ژاره‌ى گه‌ورایگ خسته‌ ناو دڵ كه‌سوكار و ڕه‌فیق و ڕووڵه‌یل چین كورده‌یل ده‌یشت هه‌رێم و ته‌مام هونه‌ردووسه‌یل و ڕووشنهویره‌یل.

 

انا لله و انا الیه‌ راجعون