تا په‌نجه‌ى خوه‌مان نه‌گه‌زیم

شفق نيوز

له‌وه‌ر خاتر دامه‌زرانن ئى جووره‌ رژیمیگ سیاسى وه‌ى شیوازه‌ ك كه‌فێده‌ وه‌رچه‌و هه‌ر له‌ساڵ 2005 تائیسه‌؟

 

ئایا چه‌ بویشیمنه‌ سه‌ده‌ها هه‌زار خێزان شه‌هیدو قوربانیه‌یل و كه‌مئه‌ندامه‌یل و سزادریاگه‌یل و ده‌سپیچگ چه‌ ئه‌ڕایان باریمنه‌و له‌وه‌ك ئیسه‌ رویئه‌یاد و له‌ ڕه‌فتار ئى ده‌زگایه‌یل رژیم تازه‌ هه‌ر له‌ گه‌ناته‌كارى بگر تا ره‌سێده‌ زوڵم و دویاكه‌فتن وه‌ جووریگ ك له‌ ئه‌وساى سه‌رده‌م رژیم وه‌رین زیاتره‌؟

 

وه‌ل ئه‌وه‌یشا ئمڕوو زوورم خه‌باتكار و ئاده‌میزاده‌یل پاك و دڵسووزیش شه‌رمه‌زارن له‌ مناڵ و خێزان و كه‌س وكاریان، چوینكه‌ ئه‌وسا مزگانى خوه‌ش وه‌پیان دریا رژیمیگ وه‌ هه‌گبه‌ى تازه‌ى دادگه‌رى كوومه‌ڵایه‌تى و ده‌سپاكى و فه‌رمانڕه‌واى دڵسووزه‌و ئه‌یه‌یده‌ وجوود، وه‌ل ده‌وڵه‌تیگ خه‌ڵوه‌ت دیكتاتۆرى و حزبه‌یل فاشیست!

 

به‌ڵى گشتمان مزگانى ده‌وڵه‌ت هاووڵاتیبوین وه‌پیمان دریا نه‌ك ده‌وڵه‌ت هووزایه‌تى و حزب و دین و مه‌زه‌و، مزگانى رژیمیگ سیاسى مه‌ده‌نى دیمۆكراسى وه‌پیمان دریا ك حورمه‌ت گشت دین و ره‌گه‌ز و مه‌زه‌وه‌یل بگرێد وه‌بێ جیاوازى.

 

ئایا خه‌بات گشتمان و له‌بان گشت ئاسته‌یل حزب و جمشت و تاكه‌یل له‌وه‌ر ئه‌وه‌ بى ك مه‌ردمانیگ گه‌ناته‌كار بچنه‌ گژ  پایه‌یل دیمۆكراسى و شكه‌ستخواردگترین سیستم وه‌ڕیه‌وبردن و دارایى و سیاسى دامه‌زرنن؟

 

ئایا جى باوه‌ڕه‌ گشت كاریگ وه‌ رووژ و شه‌ویگ چه‌واشه‌وه‌ بوود ئه‌را ره‌فتاره‌یلیگ ناپه‌سه‌ن و بى وینه‌؟ ئیمه‌ ئه‌وه‌ك هووكاره‌ى بویمنه‌ له‌ داب و نه‌ریت و ئه‌خلاق له‌لاى گشت نه‌ته‌وه‌و دین و لایه‌نه‌یلیگ ك هاوسایگد یا میوانیگد ده‌نگ بكه‌ید ئه‌را نانخواردن یا ئه‌را شامكردن یا ئه‌را خوه‌شى و ته‌نگییگ ، نه‌ك ئه‌را سندووق ده‌نگداین تا كه‌سیگ هه‌ڵوژنید نوێنه‌رایه‌تیید بكا.

 

ئنجا ئه‌گه‌ر ته‌ماشاى ده‌زگایه‌یل بڕیارداین و جیوه‌جیكردن بكه‌یم، هه‌ر له‌ یه‌كه‌م مه‌شق ده‌نگداین بایه‌سه‌ پاك و بیگه‌رد بویاتاد، نه‌ك فه‌تواو فه‌رمان هووزایه‌تى له‌تى حوكم بكردیاد ك ده‌رئه‌نجامه‌گه‌ى ئه‌وه‌ بوى ئازادى هه‌ڵوژانن زه‌فت كردو بڕیگ گه‌ناته‌كار حوكم له‌تى كه‌فته‌ ده‌سیان چ له‌ ئه‌نجوومه‌ن نوێنه‌ره‌یل یا ده‌سڵات جیوه‌جیكار ، ننجا خوه‌زیه‌و هه‌ركه‌سیگ له‌ ئیمه‌یش خاس تاریخ و ره‌فتار هه‌ر یه‌كیگ له‌وانه‌ زانن ك بوینه‌سه‌ وه‌زیر و وه‌رپرس و نوێنه‌ر ملله‌ت له‌ غفڵه‌تیگ.

 

ئیسه‌یش ملیۆنه‌ها كه‌س له‌ روڵه‌یل عراق په‌نجه‌ى خوه‌یان گه‌زین ئه‌را ئه‌و ده‌نگه‌یله‌ ك له‌ هه‌ڵوژاردنه‌یل گوزه‌یشت دانه‌ى ئى نوێنه‌ره‌یله‌ ك ئمڕوو وجوود دیرن، بیگومان ئاشكراس ك زوورم مه‌ردم ئیسه‌ په‌شیمانه‌و بوینه‌ له‌بان ده‌نگداین وه‌ى كه‌سه‌یل شكه‌سته‌ ك ره‌سینه‌سه‌ ده‌زگایه‌یل ده‌وڵه‌ت.

 

هه‌ر له‌وه‌ر ئه‌وه‌یش گشتمان بایه‌سه‌ ئه‌و راسیه‌ بزانیم ك ساڵه‌یل گوزه‌یشت چه‌ رویداو چه‌ هاته‌ تویش مه‌ردم له‌وه‌ر باوه‌ڕكردن وه‌ شێخه‌یل هووز و بڕیگ له‌ پیاوه‌یل دینى و سیاسى ك مكوڕن له‌بان ئه‌وه‌ك ده‌وڵه‌ت وه‌ره‌و ده‌زگایه‌یل دینى یا مه‌زه‌وى و ره‌گه‌زى و دیكتاتۆرى بووه‌ن، ئنجا بایه‌سه‌ وه‌ راسیه‌و كار بكه‌یم له‌وه‌ر خاتر گه‌ردین له‌ شوون كه‌سه‌یلیگ ك وه‌ هه‌ق نوێنه‌رایه‌تى مه‌ردم بكه‌ن و پاك و دڵسووز بوون و دویر بوون له‌ حه‌رام و ئامانج ده‌سكه‌فتن حوكم و ده‌سڵات و جاریگ تر ڕێ نه‌دریه‌ید كه‌سه‌یل گه‌ناته‌كار ده‌سه‌ڵات وه‌ربگرن.

 

كفاح مه‌حموود كه‌ریم

ج. ا